Inatsisartut suleriaasianni § 32 naapertorlugu aalajangiiffigisassatut siunnersuut kingulianiittoq Naalakkersuisut matumuuna saqqummiuppaat:
Pisortat ingerlatsiviinik iluarsaaqqinnermik Naalakkersuisut suliarinneqqinnissaat pillugu Inatsisartut aalajangiiffigisassaattut siunnersuut.
(Naalakkersuisut siulittaasuat)
Tunngavilersuut:
Aaqqissuussaanermut ataatsimiititaliap isumaliutissiissutaa UPA 2006/15-imi Inatsisartut oqaluuserisimasaat Naalakkersuisut innersuutigissavaat. Isumaliutissiissummik Inatsisartut oqaluuserinninnerat tunngavigalugu Naalakkersuisut siunnersuutigaat pisortat ingerlatsiviinik iluarsaaqqinnermik Naalakkersuisut suliarinneqqinnerat ingerlanneqassasoq kinguliini taaneqartutut.
Kommunit kattutsinneqarnerat
Naalakkersuisut peqquneqarput 2007-imi upernaakkut ataatsimiinnermi maannakkut kommu-nit 18-iusut kommuninut sisamanut naligiissunut, sapinngisamik nunami imminnut qanittut tamarmik immikkut 8.000-init amerlanerusunik innuttalinnut, kattutsinneqarnissaat pillugu inatsisissatut siunnersuummik saqqummiusseqqullugit. Ukiut 2006/07 nikinnerat sioqqullugu kommunit kattunneqarnissaannut kissaatiminnik kommunit saqqummiussissapput. Kommunit nutaat l. maj 2009-mi atuutilersumik pilersinneqassapput.
Kommunit kattutsinneqarnissaannut atatillugu pisariaqartumik aaqqissuussaanikkullu aalajangiisarnissat isumagineqarnissaat pillugu ilanngullugu Naalakkersuisut peqquneqarput kommunit kattutsinneqarnissaannut ataatsimiititaliaq pillugu inatsisissatut siunnersuummik 2007-imi upernaakkut ataatsimiinnissami saqqummiusseqqullugit. Kattutsitsinissanut ataatsimiititaliat maannakkut kommunalbestyrelsiusunit pilersinneqassapput.
Kikkut tamat qanimut oqartussaaqataanerisa nakussatsinneqarnissaa
Illoqarfmni aamma nunaqarfmni aqutsisut oqartussaasutut piginnaatitaaffiisa nakussatsinneqarnissaannut aammalu najukkani ingerlatsinermi suliassanut innuttaasut peqataatinneqarnerulernissaannut periarfissanik misissueqqullugit Naalakkersuisut peqquneqarput. Misissui-nermi inatsisilianut pioreersunut naleqqiullugu periarfissat aammalu inatsisiliornikkut allanik suliniuteqarnissaq pisariaqartinneqarnersoq, matumanittaaq kommuninut qinersisarnerit pillugit maleruagassat naleqqussarneqassasut imaalillugit kommunalbestyrelsiulerumaartuni sumiiffiit sinniisuutitaqarsinnaaneri qularnaarlugu, nalilersorneqassapput. Misissuineq inatsisissatullu siunnersuutaajunnartut kingusinnerpaamik Inatsisartut 2008-mi ukiakkut ataatsimiinneranni Naalakkersuisut saqqummiutissavaat.
Pisortat qaraasaasiaqarnikkut atortorisaat
Qarasaasiaqarnikkut atortunik innuttaasunik kiffartuussinermut aamma pisortat oqartussaasuisa akornanni attaveqatigiinnermut pitsaanerulersitsisinnaasunik pilersitsinissamut periarfissat Kanukoka suleqatigalugu misissoqqullugit Naalakkersuisut peqquneqarput.
Qarasaasiaqarnikkut atortut kommunit killeqarfii akimorlugit aamma Namminersornerullutik Oqartussat kommunillu akornanni siunissami ajornaatsumik attaveqaataasinnaanissaat kissaatigineqarpoq. Taamaattumik ingerlatseqatigiiffik ataatsimoorussaq, qarasaasiaqarnikkut aallaaviit ataatsimoorussat (fælles IT-platform), qarasaasiaqarnikkut atortut ataatsimoorussat aamma atortunik nutaanik ataatsimoorluni ineriartortitsineq, matumanittaaq innuttaasut pulaffigisinnaasassaat pingaaruteqartut, pilersinneqartariaqarput.
Matumanittaaq piaartumik, ajornanngippallu 2007-imi upernaakkut, kommunit aamma Namminersornerullutik Oqartussat akornanni ingerlatseqatigiifflup ataatsimoorussap pilersinneqarnissaanut periarfissat Naalakkersuisut misissussavaat.
Tamakku oqaatigalugit siunnersuut Inatsisartunit akuersortumik oqaluuserisassanngortinneqarpoq.
