Ullut marluk atorlugit Aaqqissuussaanermut Isumalioqatigiissitap inassuteqaatai aallaavigalugit isumasioqatigiinneq ingerlanneqarpoq assullu uummaarissumik ingerlanneqarluni, ilaatigut isumalioqatigiissitat tikissimanngisaat ilanngullugit sammineqarlutik.
Isumasioqatigiittut tunngaviatigut isumaqatigiissutigaat Qaqortup Kommunia kommuninut eqqaamiuminut kattuttariaqartoq, matumani aallaavigineqarluni Aaqqissuussaanermut Isumalioqatigiissitat siunnersuutaat A2, tassalu avannamut Ivittuut Kommuniat aammalu Arsuk ilannguteriarlugu kujammut Nanortallip Kommunia ilanngullugu, aammalu killeqarfik sermersuaq pitarlugu tunumut atassasoq aamma isumaqatigiissutaalluni.
1. maj 2009 aallarnerfigalugu kattutaarneq pissanersoq ilaatigut eqqarsarnartoqartinneqarpoq, apeqquterpaalussuit manna tikillugu qulaajagassat naammaginartumik akissutissaqartinneqarsinnaassanersut aallaavigineqarmat.
Isumalioqatigiissitat saqqummiutaannut naleqqiullugit nalorninartinneqartut arlaqarput, aammalu nunaqarfinni aqutsisut atorunnaarsinneqarnissaannik oqariartuut isumaqatiginartinneqanngilaq, minnerunngitsumillu Qaqortup Kommuniani qinikkat pingaartippaat Namminersornerullutik Oqartussaniit kommuninut nussorniakkat aningaasartaasa pisariaqartitaasutut malinnaasinneqarnissaat.
Qaqortup Kommuniani qinikkat assut pissanganartippaat sisamanngorpat 23. februar 2006 kommunit kujataamiut Narsap Nanortallillu kommuniisa isumasioqatiginissaat assullu neriuutigineqarpoq paaseqatigiiffiusumik isumasioqatigiinnissaq piumaartoq.
Erseqqinnerusumik paasiniaassaguit saaffigissavat borgmesteri oqarasuaat 49 33 17 atorlugu.
Inussiarnersumik inuulluaqqusilluta
Simon Simonsen, borgmester
