Kommunit aaqqissuussaanermik iluarsaaqqinnissamut tunngatillugu isumaliutaannut tunngavilersuutissat ilassaattut ulloq 10. oktobari 2006 nittartakkakkut saqqummiupparput regnearki kommunit qanoq katiterneqarnissaannik oqallinnermi periarfissatut taaneqartut pingasut tunngavigalugit naatsorsukkanik imalik. Maanna kisitsisit taakku quppernerup matuma ataani takuneqarsinnaasutut iluarsivavut siunissami kommunit qanoq katitigaanissaannik periarfissatut ataatsitut isikkoqalersoq tunngavigalugu.
Kommuniulersussat qanorpiaq ateqarumaarnersut suli nalugatsigu taaguutit uku atorallarpavut:
Kujataa (Qaqortoq, Narsaq, Nanortalik)
Nuuk (Nuuk, Paamiut, Ivittuut, Ittoqqortoormiit, Ammassalik)
Qeqqa (Sisimiut, Maniitsoq)
Avannaa (Qaanaaq, Upernavik, Uummannaq, Ilulissat, Qasigiannguit, Qeqertarsuaq, Aasiaat, Kangaatsiaq)
Kisitsisit kommunit 2006-imut budgetiini kontoni pingaarnerniittut atorlugit taamaaliorpugut. Taamaattumik kommunit aggornilersorneqarnerata nutaap kommuninut naligiissaarutinut ataatsimoortumillu tapiissutinut qanoq kinguneqarumaarnera katiterinermi eqqarsaatigineqanngilaq. Akileraarutit procentiisa assigiinnginnerat aamma naatsorsuinermi iluarsineqanngilaq.
