Attaveqaqatigiinnermut, tassa paasissutissiisarnermut oqaloqateqartarnermullu, suleriusissap qulakkiissavaa kommunit allanngortikkiartuaarneqarneranni aalajangersimasumik akuutinneqarluinnartumillu paasissutissiisarnissaq oqaloqateqartarnissarlu, anguniakkallu angujartuaarneranni paasissutissiisoqarlunilu oqaloqatiginnittoqartarnissaa aamma qulakiissallugu.

Kommunit allanngortikkiartuaarneqarneranni paasissutissiisarnerup oqaloqateqartarnerullu makku siunertarai:

• Pisariaqartitsisut kikkulluunniit paasissutissinneqartarnissaat qulakkiissallugu
• Paasissutissat tamarmik assigiimmik imaqarnissaat
• Maannakkut pisut sulisorisanut innuttaasunullu pissanganartuujunnaarsissallugit
• Tusatsiakkat aallaaviginaveersaartissallugit
• Sulisorisat innuttaasullu sunniuteqarnissaannut periarfississallugit
• Pisortat apeqqummut ataatsimut arlaleriarlutik akisariaqartannginnissaat qulakkiissallugu

Attaveqaqatigiittarnissamut suleriusissami taariikkavut tunngavigalugit paasissutissat paasinartut, assigiit oqallisigineqarnissaminnullu periarfissiisut saqqummiunneqartassapput. Pingaaruteqarpoq qulakkersimassallugu kina, sumik qaqugulu oqaaseqaateqassanersoq isumaqatigiissutigereersimassallugu, aammalu paasissutissat tusagassiortunut, suleqataasunut kommuninullu suleqatigineqartunut ataatsikkut nassiuttassallugit.

Paasissutissiisarnermi oqaloqateqartarnermilu suleriusissaq makkuninnga imaqassaaq:

• Suleriusissap siunertaa
• Kikkut angoriarneqarpat?
• Paasissutissani suut qitiutinneqarpat?
• Paasissutissiinermi aalajangersimasumi tusagassiisarfiit sorliit atorneqassappat?
• Kiap suna oqaaseqarfigaa?
• Paasissutissiissutaasartussat tulleriiaarneri aaqqissuunnerilu

Taakkua saniatigut isumassarsiatsialaassaaq eqqarsaatigissallugu allaffissornikkut ingerlatsiviit suliffeqarfiillu pisiortaasa kommunit allangortikkiartuaarneqarnerannut atasumik suleqataasunut qanoq paasissutissiisarneranni oqaloqatiginnittarnerannilu tapersersornissaat. Assersuutaasinnaavoq allanngortitsiartuaarnermut paasissutissiisarnissanut aallarniutissanik seqersittakkakkut saqqummiussassaliorneq.

Kommunit kattussuunissaannut suliniummi paatsuungalersinnaanerit apeqqutillu utikattut piingitsoorniarlugit kommunit nittartagaanni takutitassanik apeqqutigineqarajuttunik tulleriiaarisoqarsinnaavoq, taakkununngalu akissutit nalinginnaanerusut ilanngullugit.

Aaqqiissutissaq angusaqarnarnerusoq unaasinnaavoq apeqqutit akissutillu kommunit allanngortikkiartuaarneranni saqqummertartut aalajangersimasumik inissaqartinnissaat. Apeqqutit nalaanni akiffissamik allaffissaqassaaq – piffssallu pineqartup nalerpiaani akisoqarsinnaanngippat qaqugu akisoqarsinnaalissasoq allaffissalerlugu. Taassuma saniatigut apeqqutinut aalajangersimasunut tunngatillugu inummik attaveqarfiliisoqarsinnaavoq, taannalu aamma paasissutissanik amerlanerusunik pissarsiviusinnaassalluni. Apeqqutit akissutaallu imatut isikkulerlugit saqqummiunneqarsinnaapput:

Apeqqutit	Akissutit	Akisoqarsinnaavoq (ulloq)	Attaveqaat/paasissutissiisinnaasoq
1. Soraasitsiortortoqassava?
2. Kina pisortarilissavara?
3. Atofigisara qinnutigeqqissavara?
4. Suliffiga nuutinneqassava?
5. Sulinngiffisara allanngussava?
6. Atugarisakka allanngussappat?
Il.il.

Apeqquteqaataasartussat aallarnerlugit suleqataasut sunilluunniit ilinniagallit akornanni politikerinut pisortanullu apeqqusiorluni tulleriiaarisoqarsinnaavoq akineqarlutik inissinneqartussanik. Kommunillu kattuteqatissat ataatsimut nittartagartaassami quppernertut inissinneqarsinnavoq. KANUKOKA-p pilersaarutigaa iluarsaaqqinnerup nalaani kommuniulersussat tamaasa immikkut www.kanukoka.gl-imut atasumik nittartagaqartinniarlugit. Taanna iluarsaaqqinnerup nalaani paasissutissanik katersuivittut apeqquteqaateqarfittullu atorneqarsinnassaaq.

Periutsit pingaarnerusut sanitigut paasissutissiisarnissamik suliassaq pisumiit pisumut qanoq ingerlanneqarnersoq paaserusunnarsinnaavoq. Isumassarsiffissatut "Aaqqissuussaaneq - Strukturnyt", nr.2, atuarneqarsinnaavoq.