Kiffartuussinernik assigiissaarineq qanoq isumaqarpa?

Tassa kommunit arlalitsigut kiffartuussineri naleqqussarneqassapput – imaappoq kommunit kattutereernerisigut innuttaasut kommunitoqqamut sorlermulluunniit atasimagunik assigiimmik kiffartuunneqarsinnaasariaqarput.

Kiffartuussinernik naleqqussaanerit immikkoortiterneqarsinnaapput inatsisilerinermik tunngaveqartunut politikkimillu tunngaveqartunut:

Inatsisilerinermik tunngaveqartut
1. Kiffartuunneqarnissamut periarfissat assigiinngisitaarsinnaanerannik assersuutissat. Tamatumani pingaartumik pineqarput oqartussaasut aalajangiiffigisaat, soorlu uku:

• Piginnaanngorsaqqinneq

• Utoqqarnik isumaginninnermi il.il. nalilersuisarneq

2. Akigititat gebyrillu assigiinngisitaarsinnaanerannik assersuutissat.

Soorlu makkunani akigititat gebyrillu kiisalu immikkut akuersissuteqartarnermut malittarisassat:

• Avatangiisinut pilersuinermullu tunngasutigut akigititat, soorlu eqqakkat imikoornerlu pillugit

• Ulluunerani paaqqinnittarfinnut akigititat

• Isertitakinneq pissutigalugu ulluunerani paaqqinnittarfinnut akiliuteqartitsinnginnissamik aalajangiisarnernut malittarisassat

Politikkimik tunngaveqartut
Kommunip nutaap iluani sumiiffinni assigiinngitsuni imaluunniit suliassaqarfiup taannaasup iluani suliffeqarfinni kiffartuussinerit naligiinngiiaartinneqarnissaat innuttaasut saallugit illersoruminaassinnaassaaq.

3. Neqeroorutit assigiinngisitaarsinnaanerannik assersuutissat.

• ”Kommunitoqqani” tamani innuttaasunik kiffartuussiveqarneq

• Kommunini tamani suliffissarsiuussisarfeqarneq

• Kommunini tamani sunngiffimmi klubbeqarneq

• Meeqqanut sullissinermi atuarfeqarnermilu ataatsimoortumik ”immikkut neqerooruteqarneq”

• Meeqqanut sullissinermi atuarfeqarnermilu ataatsimoortumik nakkutilliisoqarneq

4. Kiffartuussinerup annertussusiatigut assigiinngisitaartoqarsinnaaneranik assersuutissat.

• Innuttaasunik kiffartuussiviit ammasarfii suliassaasalu aalajangersagaanerat

• Atuarfinni, ulluunerani paaqqinnittarfinni utoqqarnillu isumaginninnermi atorfinnik amerlassusiliineq

• Bibliotekeqarnermi, nipilersornermik ilinniarfeqarnermi, katersugaasiveqarnermi aammalu sunngiffimmi kulturimilu allatigut neqeroorutissaqarnermi atorfinnik amerlassusiliineq tapiissutinillu agguataarineq

• Nalunaaqquttap-akunneri utoqqarnik isumaginninnermi ilinniartitsinermut atugassat kiisalu utoqqarnik isumaginninnermi eqqiaanermut angerlarsimaffimmilu ikiorteqarnermut aningaasaliissutit

• Suliffeqarnermi pinaveersaartitsinikkut suliniutit

• Isumaginninnermi suliffissaqartitsinermilu oqartussaaffinnik pilersaarusianik naleqqussaaneq

• Meeqqanut sullissinermi atuarfeqarnermilu, utoqqarnillu isumaginninnermi, ataatsimoorussamik pitsaassutsimut aalajangersagaqarnissaq

Ikaarsaariarnermi ataatsimiititaliat (kommunini nutaani kommunalbestyrelsinngortussat) tamatumunnga tunngatillugu makkuninnga isumagisassaqassapput:

• Maannakkut kommuniusuni kiffartuussinerit annertussusiisa isummerfiginissaat

• Siunissami kiiffartuussinerit qanoq annertutigisariaqarnerannik aalajangernissaq – sumilu pingaarnersiuisoqartariaqartoq

• Siunissami kiffartuussinerit qanoq aningaasalersorneqarnissaannik tamatumanilu aningaasatigut killiliussassanik aalajangiinissaq

Ikaarsaariarnermi ataatsimiititalianut siunnersuutit kattunnissamut aqutsisoqatigiinnit pilersinneqartunit suliarineqassapput, suliamilu tamatumani tunngaviusariaqarput aningaasatigut periarfissat maanna atuuttut.

Kattunnissaq kisiat pillugu ataatsimoortumik tapiissutit qaffanneqarnissaat ilimananngilaq. Taavalu aallaaviusariaqassaaq kiffartuussinerup qaffasinnerpaaffigisimasaani appaanissaq kiffartuussinerullu appasinnerpaaffigisimasaani qaffaanissaq.

Ikaarsaariarnermi ataatsimiititaliat atuutilerunik aalajangiissapput kiffartuussineq ataatsimut isigalugu qaffanneqassanersoq imaluunniit aningaasanik sipaaruteqarnissaq pillugu appartinneqassanersoq. Tamanna kommunit nutaassat aningaasatigut missingersuusiorfigineqarnerannut atatillugu pisariaqarpoq.

Suliap ingerlaqqinnissaa

KANUKOKA kommunillu peqatigiillutik arlalinnik suleqatigiissitaliorput iluarsaaqqinniarnermi kommuninut ikiuuttussanik. Kiffartuussinerit naleqqussaavigineqartariaqartut tamarmik allattorneqassapput. KANUKOKA-llu piffissanik suliassanillu pilersaarusiaa paasissutissartalersorneqassaaq kommunit iluarsaaqqinnissami piareersagassanut assigiinngitsunut atorsinnaasaannik.

Suleqatigiissitat suliaminnik naammassisaqariaraangata nittartakkami matumani taakkununnga linkiliisoqartassaaq. Atortussat suleqatigiissitanit pisut siulliit ukiup naalernerani saqqummiunneqarsinnaanngussangatinneqarput.