Oqaloqatigiinneq, suleqatigiinneq sunniuteqaqataanerlu

Paasissutissiiuarneq, oqaloqatigiinneq suleqataasunillu piaartumik akuulersitsisarneq suleqatigiillualersitsisarput aammalu allanngortitsiartuaarnissap tamanut naammaginartumik iluatsittumillu pinissaanut aalajangiisuujumaarlutik.

Taamaattumik kommuniulersussani nutaani suleqataasut naammaginartumik iluatsittumillu akuleriilersinneqassappata iluarsaaqqinniarnermi piaartumik pisortaasut suleqataasullu kommunit killeqarfii maanna atuuttut akimorlugit oqaloqatigiilertariaqarput.

Oqaloqatigiinnertigut taakkunatigut suleqataasut iluarsaaqqinnissami ataatsimoortumik aammalu sumiiffinni ataasiakkaani suliassat pillugit akuulersinneqarlutillu ilisimatinneqassapput.

Malittarisassani atuuttuni, sulisut sinniisoqarnerat pillugu isumaqatigiissutini kiisalu suleqatigiinneq sunniuteqaqataanerlu pillugu tunngavissatut isumaqatigiissummi aaqqissuussaanermik iluarsaaqqinnikkut kommunini pissusiulersussat immikkut ittut naatsorsuutigineqarsimanngillat.

Taamaattumik aaqqissuussaanermik iluarsaaqqinnissap piviusunngortinnissaanut ilaatillugu suleqatigiinnermut ataatsimiititaliaagallartunik tamanut atuuttunik pilersitsisoqartariaqarpoq.

Suleqatigiinnermut ataatsimiititaliaagallartut tamanut atuuttut suleqatigiinnermut malittarisassanut atuutereersunut tapertaassapput.

Suleqatigiinnermut ataatsimiititaliaagallartut tamanut atuuttut

Suleqatigiinnermut ataatsimiititaliaagallartoq tamanut atuuttoq aaqqissuussaanermik iluarsaaqqinnissamut atatillugu kommunini kattuttussanngortuni suleqataasut pisortaasullu sinniisaasa peqataaffigissavaat.

Ataatsimiititaliaagallartumik taamaattumik ataatsimik pilersitsisoqartariaqarpoq kommunit siunissami kattullutik ataasiulersussatut naatsorsuutigineqartut akornanni.

Suleqatigiinnermut ataatsimiititaliaagallartup tamanut atuuttup pilersinneqarnissaanut piffissaq

Kingusinnerpaamik Inatsisartut kommunit taaneqartut kattunnissaannik aalajangernerata kingorna kommunit taakku ataatsimiititaliaagallartumik taamaattumik pilersitsisariaqarput.

Suleqatigiinnermut ataatsimiititaliaagallartup tamanut atuuttup suliassai

Suleqatigiinnermut ataatsimiititaliaagallartup tamanut atuuttup siunertaraa iluarsaaqqinnissami suliat ineriartornerata oqaloqatigiissutigisarnissaa ilisimatitsissutigisarnissaalu.

Iluarsaaqqinnerup kommunit killeqarfii akimorlugit sulisunut inatsiseqarnikkut, aningaasarsiornikkut isumaginninnikkullu kingunerisassai oqaloqatigiissutigineqarsinnaasariaqarput, soorlu:

• sulinermi sulisoqarnermilu atugarisat ataatsimut isigalugit,
• organisationip nutaap takussutissartaa nassuiarneqarneralu,
• sulisunik nuussinissamik pilersaarutit,
• nuussinissap qaqugu pinissaa,
• sulisut sumi inissisimanissaat,
• ilinniaqqittarnermut tunngasut,
• teknologiimik IT-systeminillu nutaanik atuilernissaq.

Tamakkua saniatigut soorlu makku pisariaqarsinnaapput:

• allanngortiterinissap sulisunut pingaarutaanik ilisimatitseqatigiittarnissaq,
• iluarsaaqqinniarnermut tunngatillugu tusatsiakkanik piviusunik tunngaveqanngitsunik naqqiinerit,
• Kommunini ataasiakkaani sulisut kommunimut ataatsimut kattunnermi ataatsimuulernissaat oqilisarniarlugu suliffinni naleqartitanik kulturinillu oqallisiginninneq.

Suleqatigiinnermut ataatsimiititaliaagallartoq tamanut atuuttoq kommuninilu suleqatigiinnermut ataatsimiititaliat atuuttut ulluinnarni suleqatigiinnermi sapinngisamik akuutinneqassapput suleqataasut aaqqissuussaanermik iluarsaaqqinnerup ineriartorneranik piviusunngortinneqarneranillu paasinninneruleqqullugit.

Taamaattorli suleqatigiinnermut ataatsimiititaliat atuuttut tassaajuassapput pissutsinik aaqqissuussaanermik iluarsaaqqinnermik aallaaveqanngitsunik ilisimatitsissuteqartarlutillu oqallisiginnittartussat, ulluinnarni ingerlatsineq eqqarsaatigaluguttaaq.

Aalajangiisarnerni sapinngisamik piaartumik ataatsimiititaliat akuutinneqartassapput oqallisiginnilluarnissamut periarfissaqaqqullugu, taamaalillutillu suleqataasut sinniisaasa isumaat siunnersuutaallu aalajangernermi tunngaviusunut ilaatinneqarsinnaaqqullugit.

Ataatsimiititaliat isumagissavaat sulisut tamarmik – allakkatigut oqaasiinnartigullu – ataatsimiititaliat suliaat pillugit ataavartumik ilisimatinneqartarnissaat.

Tamanna siunertamut iluaqutaasussatut isigineqaraangat pisortat sulisullu suleqatigalugit ilisimatitseqatigiiffiusumik ataatsimiititsisoqarsinnaavoq matuma qulaani eqqartorneqartut pillugit immikkut ittunik oqaluuserisassaqaleraangat.

Sinniisoqarneq

Suleqatigiinnermut ataatsimiititaliaagallartup tamanut atuuttup tamatigoortumik katitigaanissaat qulakkeerniartariaqarpoq, tassa kommunini pineqartuni tamani pisortaasut sulisullu sinniisoqartinneqarlutik aammalu pisortaasut sulisullu sinniisaat amerlaqatigiissinneqarlutik.

Suleqatigiinnermut ataatsimiititaliaagallartumi tamanut atuuttumi ilaasortat kommunini ataasiakkaani suleqatigiinnermut sunniuteqaqataanermullu ataatsimiititalianit qullersaasunit qinerneqartariaqarput pisortat sulisullu sinniisaasa akornannit, aammalu kommunini tamani pisortat sinniisaannik ataatsimik sulisullu sinniisaannik ataatsimik qinersisoqartariaqarpoq.

Kommunimi suleqatigiinnermut sunniuteqaqataanermullu qullersaasumik ataatsimiititaliaqanngippat sulisut sinniisaat kommunimi sulisunit qinerneqartariaqarpoq pisortaasullu akunnerminni sinniisussaminnik ataatsimik toqqaasariaqarlutik.

Ataatsimiititaliaagallartumi ilaasortaaneq atorunnaassaaq ilaasortap atorfik qinigaanerminut tunngaviusoq qimappagu.

Iluarsaaqqinnermi suliassat pillugit allaffissornikkut aqutsisoqatigiit suleqatigiinnermut ataatsimiititaliaagallartumi tamanut atuuttumi aalajangeeqataasinnaatik peqataatinneqarsinnaapput, tamanna pisariaqartinneqarpat, taamaalillutik iluarsaaqqinnermut tunngatillugu apeqqutissaajunnartut pillugit nassuiaateqarsinnaasarniassammata ilisimatitsissuteqarlutillu.

Suleriaasissaq il.il.

Suleqatigiinnermut ataatsimiititaliaagallartup tamanut atuuttup siulittaasua pisortaasunit qinerneqassaaq pisortaasut akornannit. Siulittaasup tullia ataatsimiititaliami sulisut sinniisaannit qinerneqassaaq sulisut sinniisaasa akornannit.

Ataatsimiititaliap siulittaasuata ataatsimiinneq aqussavaa. Siulittaasoq peqataasinnaanngippat siulittaasup tullia aqutsisuussaaq.

Siulittaasup siulittaasulluunniit tulliata pisariaqartikkaangagu ataatsimiittoqartariaqarpoq, kisianni kvartalimut minnerpaamik ataasiarluni. Aammattaaq ataatsimiittoqartariaqarpoq sulisut sinniisaasa amerlanerussuteqartut tamanna siulittaasumut siulittaasulluunniit tullianut kissaatigippassuk.

Ataatsimiinnerit piffissap suliffiusup nalaani ingerlanneqartariaqarput ilaasortaasullu ataatsimiititaliami suliassanut piffissaqartitaasariaqarlutik, tamatumanilu pisarnertut akissarsiaqaannassallutik.

Naammattumik siumut piffissaqartitsilluni ataatsimiigiaqqusisoqartariaqarpoq – minnerpaamik sapaatip-akunnerinik pingasunik.

Ataatsimiinnerit telefonikkut videokkulluunniit ingerlanneqartarnissaat sapinngisamik anguniartariaqarpoq angalanernut ikinnerpaanik aningaasartuuteqarnissaq pillugu.

Aningaasaqarneq

Ataatsimiititalianut tunngatillugu aningaasartuutit sulisitsisumit akilerneqassapput.

Qitiusumik isumaqatigiissut

KANUKOKA-p sulissutiginiarpaa tamanut atuuttunik suleqatigiinnermut ataatsimiititaliaagallartunik pilersitsisoqarnissaanik qitiusumik isumaqatigiissuteqartoqarnissaa.

Qitiusumilli isumaqatigiissuteqarniartarneq sivisunaarsinnaasarpoq. Taamaattumik kaammattuutigineqarpoq kingusinnerpaamik Inatsisartut kommunit taaneqartut kattunnissaannik aalajangernerata kingornatigut kommunit suleqatigiinnermut ataatsimiititaliaagallartunik tamanut atuuttunik pilersitsissasut najoqqutassiat matuma qulaaniittut naapertorlugit.