Suliassiissusiornissami anguniagaavoq:

• Suliassap imaata annertussusiatalu qulaajarnissaa
  
• Suleqatigiissitat suliaasa ingerlaavartumik immersortuarnissaat
  
• Suliamik aqutsisut suleqatigiissitallu suliaasa erseqqissunik sinaakkusernissaat naammassinissaannullu piffissaliinissat

Suliassiissummi minnerpaamik makku allaaserineqarsimassapput:

• Suliassap siunertaa tunuliaqutaalu
  
• Inuttalersuinissaq
  
• Suleqatigiissitat suliaminni anguniagassaat anguniagassaasalu ilaat (delmål)
  
• Suliassap ingerlanera piffissalersuinerlu
  
• Nalunaarusiortarnissaq

Suleqatigiissitat ilaannut suliassiissut imatut aaqqissuunneqarsinnaavoq:

1. Sammisassaq: suliassap immikkoortua suleqatigiissitat suliarisassaat soorlu atuarfeqarfik pillugu sulialinnut suliassiisut: Atuarfiit

2. Suliassaq: suleqatigiissitat suliassaasa allaaserinerat, soorlu sullinneqarnerup pitsaassusaanut, aaqqissuunneqarneranut, inuttalersorneqarneranut il.il.ullumikkut pissutsit aallaavigalugit paasiniaaqqissaarnerit pisariaqartut, kiisalu ajornartorsiutinik paasinninneq aalajangernissamullu tunngavissanik piareersaaneq

3. Suleqatigiissitat inuttalersornerat: suleqataasussat aqqi, kina siulittaasuussava, allaffissornikkut aqutsisunik suleqatigiissitaqarpat tassani inuk attaveqaataasussaq

4. Piffissalersuineq: allaffissornikkut aqutsisunut nalunaarusiortarnissat ullulerneri

5. Anguneqartussanik piumasaqaatit: suleqatigiissitat naammassisaasa allaaserinerat, soorlu tunniunneqassapput Anguneqartussanik piumasaqaat 1,soorlu killiffigisamik paasiniaaqqissaarneq, Anguneqartussanik piumasaqaat 2, ajornartorsiutinik paasinninneq apeqqutillu politikikkut aalajangiiffigineqartussat, Anguneqartussanik piumasaqaat 3, aalajangiinissamut tunngavissanik aallarniusiorneq il.il.

6. Suliassap ingerlanera: assersuut: suleqatigiissitaq qanoq suleriuseqassava, allaffissornikkut aqutsisunik suleqatigiinnillu allanik oqalliseqateqartarnissap ataqatigiissaarinerullu qulakkeernissaat

Politikikkut allaffissornikkullu aqutsisunut suliassiissutit taagorneqareersutut imaqartinneqarluarsinnaapput, aamma pingaaruteqarpoq suliassiissummi nassuiarneqarsimassasoq politikikkut allaffissornikkullu aqutsisut sunik aalajangiinissaminnut pisinnaatitaanersut. Suliamik aqutsisut suliassaminnik aallartitsinnginneranni isumassarsiatsialaavoq kattukkiartuaarnerup nalaani piffissalersuilluni tunngaviusumik malinneqartussamik pilersaarusiornissaq. Piffissalersuinissamik KANUKOKAp siunnersuutaa aallavittut atorneqarsinnaavoq immaqalu suliassaq immikkoortukkuutaarlugu allaaserineqartarsinnaavoq suliap ingerlanerani imartusiartortinneqarsinnaasumik.

Quppernerup matuma ataaniipput politikkikkut allaffissornikkullu aqutsisunut suliassiissutinik assersuutissat Danmarkimeersut.