Kommuninngortussami kinaassuseqaqatigiilernissaq pingaaruteqarpoq – tamatumanilu pingaartut marluk taasariaqarput, tassa kommunip taaguutaa kommunillu ilisarnaataa.

 

Kommunit taaguutaat nutaat taajuminartuusariaqarput kommunimillu nittarsaassilluarsinnaasariaqar­lutik. Tamatumani allattaatsimi malittarisassat atuuttut aammattaaq eqqumaffigisariaqarput kom­munit taaguutaat assigiimmik malitaqarluni allanneqartarniassammata (takuuk KANUKOKA Nutaarsiassat nr. 3/2005 , qupp. 28).

Taakku aallaavigalugit ikaarsaariarnermi ataatsimiititaliat kommuneriligassartik taaguutissarsisariaqassavaat nunap immikkoortuani pinngortitap nunallu pissusiinut aammalu oqaluttuarisaanikkut kulturikkullu taasassartaanut ilisarnaataasumik. Ikaarsaariarnermi ataatsimiititaliat kingusinnerpaamik 1. aggusti 2008-mi aalajangissapput qanoq taaguusiiniarnerlutik – tamannalu Nunami Namminermi Pissutsit pillugit Allaffimmut nalunaarutigissavaat.

Kommunip ilisarnaatissaanik toqqaaneq

Kinaassuseqaqatigiilernissamut attuumassuteqartoq alla tassa kommunip ilisarnaatissaanik toqqaaneq. Kommunit ilisarnaataannik il.il. toqqaanissamut inatsisitigut tunngavissiisut tassaapput kommuninik aqutsinermut inatsit, kommunit aaqqissuussaanerannik iluarsaaqqinnissamut Inatsisartut inatsisaat kiisalu nioqqutissat ilisarnaataat pillugit inatsisit.

Kommunit ilisarnaataat nutaat Patent- og Varemærkestyrelsen-imi nalunaarsorneqaqqullugit Ikaarsaariarnermi ataatsimiititaliat saaffiginnissapput. Siunnersuut qanoq ilusiliinissamik piumasarisanut immikkut ittunut naapertuutissaaq, aammalu kommunip ilisarnaatissaatut imaluunniit naqitsisissaatut qinnutigisaq pillugu Rigsarkivimit (naalagaaffiup allagaateqarfianit) oqaaseqaammik ilanngussisoqassaaq. Ilisarnaatit pillugit Dan­markip naalagaaffiata siunnersortaa Rigsarkivimi atorfeqartoq kommuninit isumasiorneqarsinnaavoq. Kommunit ilisarnaataannut tunngatillugu piumasaavoq ilisarnaasiornermi qalipaatinik ilutsinillu aalajangiinermut najoqqutassiat unioqqutinneqassanngitsut.

Heraldik

Ilisarnaatit eqqornaveeqqutaasat ilisariuminartunik erseqqissunillu qalipaatilinnik assiliartallit ukiuni akullerni atugaalerput piaartumillu maleruagassalersorneqalersimallutik. 

Ilisarnaatinik eqqornaveeqqutaasanik tamakkuninnga eqqumiitsuliornermillu tamakkununnga tun­ngasumik ilisimasaqarneq heraldik-imik taaneqartarpoq.

Ilisarnaat eqqornaveeqqutaasaq paasiuminartuussaaq sapinngisamik ilisariuminartumik assiliartaqassalluni sapinngisamillu ikinnerpaanik qalipaasersugaassalluni.

Eqqornaveeqqutaasaq assiliartaalu ikittunnguanik qalipaaserneqassapput akusaanngitsunik (tinkturinik). Ilisarnaasiornermi qalipaatit sisamaapput: aappaluttoq, tungujortoq, qernertoq, qorsuk kiisalu sungaartoq qaqortorlu. Qalipaatit kingulliullugit taaneqartut marluk saviminiusanik taaneqartarput, kuultiusaasinnaallutik siilviusaasinnaallutillu. Qalipaatit siulliullugit taaneqartut sisamat qalipaativinnik taaneqartarput. Saviminiusat qalipaativiillu qaleriissinniarneqartarput, soorlu liiveq kuultiusaq aappaluttumik tunngavilerlugu. Taamaalilluni eqqornaveeqqutaasap assiliartaa ungasianiit ilisariuminarnerussaaq. Ilisarnaasiornermi qalipaatinik atuinermut malittarisaq tamanna ullutsinni assiliartaliornermi pingaartitanut naapertuuppoq. Qalipaatit ilisarnaammut ilaalluinnarput assilissatulli pingaartigalutik taamungaannarlu allanngortiterneqarsinnaanatik. Ilaannilu qalipaatit aalajangersimasut toqqarneqartarput assersuutaasumik isumaqartillugit.

Ilisarnaatit pioreersut isikkui suliareqqinneqarsinnaapput. Kisianni tulluarnavianngilaq kommunerujussuanngortoq ilisarnaasiussallugu eqqornaveeqqutaasamik kommuniusimasut tamarmik immikkut ilisarnaataannik katitigaasumik.

Kommunit arlallit kattuppata tamatigut tulluartuunavianngilaq ilaata ilisarnaataa kommunimut nutaamut ilisarnaasiutissallugu, kommuniusimasut ilaata taaguutaa taaguusiunneqaraluarpalluunniit. Ilisarnaatip assiliartaa sumiiffiup pissutsimigut immikkoorutaanik ilaannilu oqaluttuarisaanikkut taasariaqartortaanik takussutissiisarpoq. Oqaluttuarisaanermut tunngasut assiliartaliunniussaannut pissutissaqarluartarpoq. Aammali periarfissaq iluatsillugu nutaaliornissaq orniginarnerusinnaasarpoq.

Kommunit heraldik tunngavigalugu ilisarnaateqaannarnissartik kissaatigippassuk Rigsarkivi tamatumani suleqataarusuppoq.

Rigsarkivimi heraldikimik suliaqartoq: Seniorforsker Nils G. Bartholdy, Rigsarkivet, Rigsdagsgården 9, 1218 København K.
Tlf. (+45) 33 92 23 23
e-mail: ngb@ra.sa.dk

Kommunip ilisarnaataata nalunaarsorneqarnissaanik qinnuteqarnermi immersugassaq

Qinnuteqaat uunga nassiunneqassaaq: Patent- og Varemærkestyrelsen, Helgeshøj Allé 81, 2630 Taastrup.

Una tooruk: Kommunip ilisarnaataata nalunaarsorneqarnissaanik qinnuteqarnermi immersugassaq [linkia atorunnaarsimavoq]

Kommunit ilisarnaataannik nioqqutissat ilisarnaataattut illersuineq qaqugumulluunniit atuussinnaagaluarpoq, kisianni nalunaarsorneqarneri ukiut qulinngorneri tamaasa nutarterneqartartussaapput.

Kommunit ilisarnaatitoqaat

Kommunitoqqat atorunnaarpata kommunit ilisarnaataat nalunaarsuiffimmi allassimajunnaassapput.

Kisianni kommunit ilisarnaatitoqaat nakkutigisinnaajuarumagaanni nioqqutissat ilisarnaataat pillugit inatsisit atorneqarsinnaapput.

Kommunit ilisarnaatitoqaasa isumannaarneqarnissaannut tunngatillugu Patent- og Varemærkestyrelsen imaattunik kaammattuuteqarpoq:

• Kommunit nutaat kommunitoqqat ilisarnaataannik nalunaarsuisitsissapput. Tamanna pisariaqarpoq kommunitoqqat atorunnaartinnagit, tassa kommunitoqqat tamatumunnga akuersisinneqartariaqassammata. Kommunitoqqat atuukkallarnerminni akuersissuteqassapput, tassa 2008 naatinnagu.
• Nioqqutissat ilisarnaataat nioqqutissanut kiffartuussinernullu assigiinngitsunut klassilersorlugit immikkoortiterneqartarput. Klassit 45-pput. Illersugaaneq pitsaanerpaaq anguneqartarpoq klassinut 45-nut tamanut nalunaarsuisitsinikkut. Kaammattuutigaarput kommunit ilisarnaatitoqaat kiffartuussinermi klassit amerlanersaannut nalunaarsorneqassasut, tassa klassinut ukununnga: 35, 36, 37, 39, 40, 41, 42, 43, 44 aamma 45.
• Kommunit nutaassat periarfissaqarumaarput kommunit ilisarnaatitoqaasa nioqqutissat ilisarnaataattut atorneqarnissaannut licensemik akuersissuteqarnissaminnut. Taamatut akuersissuteqarfigineqartut soorlu tassaasinnaapput sumiiffimmi oqaluttuarisaaneq pillugu peqatigiiffiit imaluunniit sumiiffimmi oqaluttuarisaanermik katersugaasiviit. Patent- og Varemærkestyrelsen licensenik taamaattunik nalunaarsuisinnaavoq ilisarnaatinik atuisut kikkuunerat ilisimaneqartuarsinnaaqqullugu.

Una tooruk najoqqutassiaq manna "Aaqqissuussaaneq - Strukturnyt" nr. 16-itut pdf-formatinngorlugu piumagukku