|
UKIUMUT MISSINGERSUUSIORFIUSUMUT 2003-IMUT ATAATSIMOORTUMIK TAPIISSUTISSAT ISUMAQATIGIINNIUTIGINEQARNERAT
I. Tamanut tunngatillugu Naalakkersuisut Kalaallit Nunaanni Kommuuneqarfiit Kattuffiata isumaqatigiinniarnerinut tunngaviuvoq aningaasatigut siumut missingersuusiortarnissamut isumaqatigiissut 1996-imeersoq. 2003-imut ataatsimoortumik tapiissutissat isumaqatigiissutigineqarnissaat siunnerfigalugu aningaasanik ataatsimoortumik soqutigisat oqaloqatigiissutiginiarlugit atorfillit aningaasatigut siumut missingersuusiortussaatitaqatigiit februar 2002-ip kingornagut naapillattaartarsimapput. Aningaasatigut siumut missingersuutit pillugit isumaqatigiinniarnerit pisimapput politikkikkut 2001-imi ukiaaneranit oqariartuutigineqartartut aallaavigalugit. Illuatungeriit isumaqatigiissutigaat ukiuni arlalinni kalaallit inuiaqatigiit aningaasarissaarsimanerat akileraarutitigut isertitat qaffakkiartorluarsimallutik aammalu suliffissaaleqineq annertugisassaanani. Aammattaaq illuatungeriit isumaqatigiissutigaat malunnarluartoq Kalaallit Nunaata piffissamut aningaasatigut kigaallakkiartulerfimmut iseriartulernera. Aningaasaqarneq killormut saappat kommuunit suliffissaaleqisunut aningaasartuutigisartagaat, tassa pisortanit ikiuutitigut suliffissaqartitsiniutitigullu, qaffakkiartulissapput. Tamatuma kingunerisinnaavaa aningaasat tigoriaannaat annikillinerat aammalu immaqa kommuunit missingersuutigisartagaasa amigartooruteqalernerat. Illuatungeriinnit isumaqatigiissutigineqarpoq kommuunit aningaasaqarnertik patajaallisaavigisariaqaraat aningaasarliulerumaarnissaq sillimmartaarfigineqarsimaniassammat. Illuatungeriinnit isumaqatigiissutigineqarpoq 2002-imi upernaakkut ataatsimiinnermi Inatsisartut Meeqqat Atuarfiannut peqqussutissamik nutaamik akuersissuteqarnerisigut ”Atuarfitsialaap” pilersinneqarnissaa kommuuninut aningaasartornarnerulerumaartoq, nalunaaquttap akunneri atuartitsiviusussat amerlinerisigut aammalu atuarfinnut siulersuisuni atuartut issiatitarisartagariligassaasa akissaasersuiffigineqarnerisigut. Illuatungeriit isumaqatigiissutigaat aningaasartuutiginerulikkatik kommuunit tamakkiisumik matussutissiiffigitissagaat. 2002-mi ukiakkut inatsisartut ataatsimiinnissaannut meeqqat inuusuttullu pillugit peqqussutissamut nutaamut siunnersuut Naalakkersuisunit saqqummiunneqassaaq. Illuatungeriinnit isumaqatigiissutigineqarpoq peqqussutissap nutaap malitsigisaanik kommuunit aningaasartuutigineruligassatik matussutissiissuteqarfigitittariaqaraat. Meeqqanut inuusuttunullu ikiuinermut tunngaviup minnerpaamik iliuuseqartussaanermiit pisariaqartitsineq malillugu iliuuseqartussaanermut Inatsisartut peqqussutaata allanngortitsissutigisussaavaa. Allanngoriaaterpaaluit peqqussutissap imarisussaavai, taakkulu kommuuninut aningaasartuuteqarnerulersitsissapput, soorlu inuttut siunnersorteqarnerit, oqilisaassivigineqarnerit, efterskolimiinnerit, ilaqutariinni suliarivillugu paaqqutarinnittuniinnerit aammalu meeqqat qitornarsiat tamakkerlutik pilersorneqarnerisa uuttuiffigineqartarnissaa. Aammattaaq 2002-mi Inatsisartut ukiaanerani ataatsimiinneranni inissianik attartorneq pillugu nutaamik peqqussutissatut siunnersuutip saqqummiunnissaa Naalakkersuisut naatsorsuutigaat. Illuatungeriinnit isumaqatigiissutigineqarpoq peqqussutissap kingunerisaanik kommuunit aningaasartuutigineruligassaminnut matussutissiivigineqartassasut.
Kommuunit aningaasartuuteqarnerulersussaassapput, tassa ikiortariaqartunut inissiisarnermut nutaamik malittarisassassat kingunerisassaannik, aningaasaliissutinit pissarsiassat annerpaaffissaliivigineqarnerata kingunerisaanik, qularnaveeqqussiissutissanut taarsigassarsisarnissamut nutaamik malittarisassaqalernissaata kiisalu aaqqissuussinerup aqunneqarnissaata kingunerisaanik. 2003-imi meeqqat inuusuttullu ulloq unnuarlu angerlarsimaffinniitsinneqartarnerinut akiliutigineqartartussat annertussusissaat missingersuutissaallu illuatungeriinnit isumaqatigiissutigineqarput. Peqatigitillugulu isumaqatigiissutigineqarpoq 2001-imi 2002-milu missingersuutinik sippuisimanernut pissutaasut erseqqissitinneqarnerunissaannut pisariaqartitsineqartoq, misissuinerillu taakkua tunngavissiisinnaassasut ukiumut missingersuuteqarfimmut 2004-imut kommuunit Namminersornerullutillu Oqartussat ataatsimoortumik tapiissutissanik isumaqatigiinniarnerinut atatillugu akiliutigineqartartussat isumaqatigiinniutigineqarsimanerisa qaqeqqinneqarnissaanut. II. 2003-imut aningaasanut inatsisissamut siunnersuummut atatillugu tigussaasumik isumaqatigiinniutissat.
Atuarfitsialaap pilersinneqarnerani aningaasartuutaanerulersussat Illuatungeriinnit isumaqatigiissutigineqarpoq 2003-imi kommuunit 2.823.000 kr.-ninik matussutissiivigineqassasut nalunaaquttap akunnerisa amerleriarnerinut matussutissanik, tamatuma saniatigut kommuunit atuartut atuarfiit siulersuisuini issiatitaqartalernissaannut akissaasersuinissaminnut ukiumut atuarfiusumut ataatsimut 128.000 kr.-ninik matussutissiivigineqartassapput. Ataatsimoortumik tapiissutit 2003-mi atuartut sinniisaannut 1.8.2003-mit aningaasartuutissanik katillugit 53.000 kr.-ninik qaffaavigineqassapput. KANUKOKA-mit, Aningaasaqarnermut pisortaqarfiup Isumaqatigiinniartarfianit kiisalu Kulturimut, Ilinniartitaanermut Ilagiinnullu pisortaqarfimmit peqataaffigineqartumik suleqatigiissitaliortoqarpoq. Suleqatigiissitap suliassaraa IMAK-imut tunngassuteqartut suliffigisartagassaasa 1.8.2003-imit atuutilersussamik nutaamik isumaqatigiissuteqarfigineqarnissaanut siunnersuusiornissaq. Suleqatigiissitamut piginnaatitsissutaavoq suliffigisartagassanut massakkut isumaqatigiissutaasunut aammalu atuarfik pillugu peqqussummut massakkut atuuttumut naleqqiulluni suliffigisartagassat pillugit nutaamik isumaqatigiissutissaq aningaasartuutaasartunik nikisitsissanngitsoq. IMAK-imut isumaqatigiinniarnerit kommuunit aningaasartuuteqarnerulernissaannik kinguneqassappata isumaqatigiissutigineqarpoq aningaasartuutissanut taakkununnga kommuunit aamma matussutissiivigineqartariaqarnerat. Suliffigisartagassat nutaamik isumaqatigiissutigineqarpata immaqa iluarsiissuteqartariaqarnissaq isumaqatigiissutigineqassaaq.
Meeqqat inuusuttullu pillugit Inatsisartut peqqussutaat Meeqqanut inuusuttunullu ikiuinermut tunngaviup minnerpaamik iliuuseqartussaanermiit pisariaqartitsineq malillugu iliuuseqartussaanermut Inatsisartut peqqussutissaattut siunnersuutip allanngortitsissutigisussaavaa. Allanngoriaaterpaaluit peqqussutissap imarisussaavai, taakkulu kommuuninut aningaasartuuteqarnerulersitsissapput, soorlu inuttut siunnersorteqarnerit, oqilisaassivigineqarnerit, efterskolimiinnerit, ilaqutariinni suliarivillugu paaqqutarinnittuniinnerit aammalu meeqqat qitornarsiat tamakkerlutik pilersorneqarnerisa uuttuiffigineqartarnissaa. Aningaasartuutaanerulersussat taakkua matussutissiivigineqarnissaannut ukiumut kommuuninut ataatsimoortumik tapiissutit 15,9 mio. kr.-ninik qaffaavigineqassapput.
Illuatungeriit isumaqatigiissutigaat peqqussutissap nutaap kingunerisaanik kommuunit aningaasartuutiginerulersimasassaat 2006-imi kommuuninut ataatsimoortumik tapiissutissat isumaqatigiinniutigineqarnerinut atatillugu naatsorsuusiorneqassasut. Naatsorsuusiamut ilaatinneqassapput meeqqanut inuusuttunullu tunngassuteqartut tamarluinnarmik, tassa imaappoq timitalersuiniarnermi aamma isiginiarneqassapput suliassaqarfitsigut allatigut kommuunit ileqqaarutigisinnaasaat, soorlu ulloq unnuarlu angerlasimaffinnut meeqqanik ikinnerusumik inissiissarnerni.
Akit aningaasarsiallu iluarsiivigineqartarnerat
Illuatungeriinnit isumaqatigiissutigineqarpoq iluarsiisoqassasoq imatut pisoqarpat:
Iluarsiissuteqarnissat pissapput ukiumut missingersuusiorfissamut 2004-imut ataatsimoortumik tapiissutissat isumaqatigiinniutigineqarnissaannut atatillugu. Meeqqanut inuusuttunullu ulloq unnuarlu angerlarsimaffiit Meeqqanut inuusuttunullu ulloq unnuarlu angerlasimaffiit 2003-imut missingersuutissaat Namminersornerullutik Oqartussat KANUKOKA-llu suleqatigiinnerisigut isumaqatigiissutigineqarput. Isumaqatigiissutip kinguneraa meeqqat angerlarsimaffiinnut nalinginnaasunut akiliutissat 2003-mi ullormut 607 kr.-niutinneqarnissaat kiisalu katsorsartittarfinnut ullormut 819 kr.-niutinneqarnissaat. Meeqqanut inuusuttunullu ulloq unnuarlu angerlasimaffinnut missingersuutit 50%-tii ataatsimoortumik tapiissutit appartinneqarnerisigut aningaasalersorneqartarmat peqatigitillugu isumaqatigiissutigineqarpoq 2003-mi kommuuninut ataatsimoortumik tapiissutissat 7.725.000 kr.-ninik appartinneqarnissaat. Tamatuma saniatigut isumaqatigiissutigineqarpoq Namminersornerullutik Oqartussat ingerlaavartumik missingersuutit misissuiffigisassagai qaammatikkaartumik aningaasatigut siumut missingersuutit malinnaassutiliorfigisarnerisigut, taakkulu ulloq unnuarlu angerlarsimaffinnut nassiunneqartassallutik nuutinnerallu KANUKOKA-mut ingerlatinneqarluni. Isumaqatigiissutigineqarpoq Namminersornerullutik Oqartussat KANUKOKA-llu suleqatigiillutik meeqqanut inuusuttunullu ulloq unnuarlu angerlasimafinnut aningaasartuutit ukioq kingulleq qaffassimanerannut pissutaasut qulaajaaviginiassagaat, misissuinerillu taakkua ukiumut missingersuuteqarfimmut 2004-imut ataatsimoortumik tapiissutissat kommuuninit Namminersornerullutillu oqartussanit isumaqatigiinniutigineqarnerinut atatillugu akit isumaqatigiinniutigineqarsimanerisa qaqeqqinneqarnissaannut tunngavissanngorsinnaassasut. Peqatigitillugu illuatungeriinnit isumaqatigiissutigineqarpoq ulloq unnuarlu angerlarsimaffiit ingerlanneqarnerinut aaqqissuugaanerup allanngortinneqarnissaata suliarineqarnera ingerlateqqinneqassasoq, anguniarlugu Namminersornerullutik Oqartussat ungasinnerusoq isigalugu ulloq unnuarlu angerlarsimaffinnik aningaasatigut naammaginarnerusumik ingerlatsilernissaat. Kiisalu isumaqatigiissutigineqarpoq malersueqqinnerup takutissappagu atuiniviup aningaasatigut siumut missingersuutinit nikinganerunissaata naatsorsuutigineqartariaqarnera, taava ulloq unnuarlu paaqqinniffinni atuineq aamma / imaluunniit taakkununnga akiliutaasartut iluarsiivigineqassasut appartillugit imaluunniit qullartillugit. Inissianik attartorneq pillugu Inatsisartut peqqussutaat 2002-mi Inatsisartut ukiakkut ataatsimiinissaannut Naalakkersuisut inissianik attartorneq pillugu allannguutissatut siunnersuummik saqqummiussissapput. Illuatungeriinnit isumaqatigiissutigineqarpoq peqqussutip allanngortinneqarnerata malitsigisaanik kommuunit aningaasartuutiginerulikkaminnut matussutissiivigineqassasut. Kommuunit aningaasartuuteqarnerulissapput, tassa aningaasaliissutinit pissarsiassat qaffasinnerpaaffissaata qummut killissaliivigineqarnerata malitsigisaanik aammalu qularnaveeqqusiussassanut taarsigassarsiaasartunut nutaanik malittarisassaqalernerata kingunerisaanik. Taakkua saniatigut kommuunit aammattaaq ikiortariaqartunut innersuussisarnermut malittarisassat nutaat kingunerisaannik aammalu aaqqissuussinerup aqunneqarnissaata kingunerisaanik aningaasartuuteqarnerulersinnaapput. Isumaqatigiissutigineqarpoq ukiumut aningaasatigut siumut missingersuuteqarfimmut 2005-imut kommuunit Namminersornerullutillu Oqartussat ataatsimoortumik tapiissutissanik isumaqatigiinniarnissaannut atatillugu kommuuninut matussutissiissutigineqartussap annertussusissaa pillugu apeqqut isumaqatigiinniutigineqassasoq. Inissianik attartorneq pillugu inatsisartut peqqussutaata allanngortinneqarnissaanik siunnersuutip atuutilerfianiit kommuunit aningaasartuutigineruligassatik matussutissiivigitissavaat. Matussutissiissutissat annertussusissaat aalajangersarneqassaaq kommuunit 2003-mi aningaasartuutiginerusimasaasa naatsorsorneqarnerat aallaavigalugu. Utoqqalinersiutisisitsisarnermut malittarisassat allannguuteqarsimasut Ukiumut 2000-imut missingersuutinut ataatsimoortumik tapiissutissat isumaqatigiinniutigineqarnerinut malitsigititatut, tassa taamanikkut isumaqatigiinniutigineqarsimammat utoqqalinersiaqalertarnerup 63-nut qaffanneqarnerata kingunerisaanik matussutissiissutissaq, malittarisassat allannguuteqarsimanerini kommuuninut aningaasatigut kingunerisimasat kommuunit Namminersornerullutillu Oqartussat malissimavaat. 2003-mut isumaqatigiissutigineqarpoq siusinnerusukkut 2 mio. kr.-ninik matussutissiissuteqarnissamik isumaqatigiissutaasimasup ingerlateqqiinnarneqarnissaa. 2004-mut ukiunullu aggersunut matussutissiissutigineqartartussat pillugit apeqqut ukiumut missingersuuteqarfimmut 2004-imut ataatsimoortumik tapiissutissat isumaqatigiinniutigineqarneranni isumaqatigiinniutigineqarumaarput. Siusinaartumik soraarnerussutisiallit aningaasalersuiffigineqarnerisa allanngortinneqarsimanera 2001-imut 2002-mullu kommuuninut ataatsimoortumik tapiissutissat isumaqatigiissutigineqarsimanerat naapertorlugu, tassani pineqarluni kommuunit 10%-imik siusinaartumik soraarnerussutisianut aningaasaliisarnerisa 50%-inut allanngortinneqarnissaa, siusinnerusukkut isumaqatigiissutigineqarsimavoq kommuuninut ataatsimoortumik tapiissutaasartut qaffaavigineqarnissaat, allanngortiterinermut kommuunit qaninnerusumut ungasinnerusumullu tamakkiisumik matussutissiivigineqartussanngorlugit. Ukiumut missingersuuteqarfimmut 2003-mut isumaqatigiissutigineqarpoq kommuuninut ataatsimoortumik tapiissutit tamanna tunuliaqutaralugu 4.004.000 kr.-ninik qaffaavigineqassasut. Aammattaaq isumaqatigiissutigineqarpoq Namminersornerullutik Oqartussat kommuunillu suleqatigiillutik kommuunit nalunaaruteqartarnissaat periusissiorfigissagaat, taamaalillutik siusinaartumik soraarnerussutisiallit tamakkerlutik amerlassusaasa ingerlaavartumik takussutissaqarfigineqartarnissaa qulakkeersimaneqalerniassammat. Paasissutissat CPR-registrant-imiissapput, aammalu ingerlaavartumik malersorneqaqqittarnissaat eqqarsaatigalugu ukiumi sorlermi soraarnerussutisiap tunniunneqartalersimaneranut agguataarsimassallutik. Paasissutissat nassatarisinnaavaat ukiuni siuliini matussutissiissutaasimasup iluarsiivigineqarnera. Paasissutissat sapinngisamik qarasaasimiitinniarneqassapput. III. Siunnerfigeqatigiiffigiumasat Makkua siunnerfigeqatigiiffigiumallugit illuatuneriit isumaqatigiissutigaat: Atuarfiit iluarsaanneqarnissaat Ukiumut missingersuuteqarfimmut 2000-imut ataatsimoortumik tapiissutissat isumaqatigiissutigineqarneranni isumaqatigiissutigineqarsimavoq ukiut tamaasa ukini 2000-2003 atuarfiit iluarsaanneqarnissaannut kommuunit 9 mio. kr.-nit ilangaaqqusiissutigisassagaat. 2003-mi Aningaasanut inatsisissamut siunnersuummi Naalakkersuisut siunnersuutigaat atuarfiit iluarsaanneqarnissaannut 2003-mi 7,0 mio. kr.-ninik illuartitsisoqarnissaa. Naalakkersuisut siunnerfigaat 2003-imut Aningaasanut inatsisissamut siunnersuutit allannguutissaannik siunnersuusiornissartik, tassa atuarfiit iluarsaanneqarnissaannut aningaasaliissutinik katillugit 27 mio. kr.-nit tungaannut qaffasissuseqalersitsisussanik. Akilersuutinut akiitsut Illuatungeriit isumaqatigiissutigaat akilersuutinut akiitsut annertusigaluttuinnarnerat kommuuninut ajornartorsiutaasoq. Illuatungeriit Namminersornerullutik Oqartussanit KANUKOKA-millu ilaasortalimmik misissueqqissaartussamik suleqatigiissitaliorput. Isumaqatigiissutigineqarpoq misissorneqassasoq isumaginninnermi inatsisit allannguiffigineqarnissaat pisariaqartinneqarnersoq, tassa pisortanit ikiuutit aqqutigalugit ingerlaavartumik akilersuutigineqartut akilerneqartarnissaat periarfissiiviginiarlugu, taamatullu aamma naliliiviginiarlugu pisariaqartinneqarnersoq akilersuutit qaqugu isumakkeerneqartarnissaannut malittarisassanik erseqqissunik aalajangersaasoqartariaqarnersoq. Aammattaaq isumaqatigiissutigineqarpoq akilersuutit tiguniarneqartarnerinut atatillugu akiliisitsisoqartarnissaa periarfissaqarfigineqarnersoq misissuiffigineqarluassasoq. Inatsisit nutaat Illuatungeriinnit isumaqatigiissutigineqarpoq nutaanik inatsisiliat atulersinneqartinnagit inatsisissat nutaat kommuuninut allaffissornikkut aningaasatigullu qanoq kinguneqarnissaat qulaarsiviginiarneqaqqaartassasoq. Taamaalillutik Namminersornerullutik Oqartussat ukiumoortumik suliniutissat inatsisiliassallu pilersaarusiorfigisarnerisigut pingaarnerusutigut politikkikkut suliniutissat nakussassaavigalugillu erseqqissitinniartalissavaat. 2003-mi inatsisiliassat pilersaarusiorniarneqarnerannut Namminersornerullutik Oqartussat KANUKOKA akuutinniassavaat, tassa inatsisiliassat 2003-mi ukiakkut 2004-milu upernaakkut Inatsisartuni oqaluuserineqarumaartussat pillugit. Suliassani KANUKOKA tusarniaavigineqassatillugu Naalakkersuisut KANUKOKA-llu isumaqatigiissutigaat tusarniaaneq sivikinnerpaamik sapaatit akunnerini sisamani sivisussuseqartinneqartassasoq. Suliassani kommuuninut annertuumik pingaaruteqartuni Naalakkersuisut anguniarusuppaat tusarniaanerit julip qaammataani ingerlanneqartannginnissaat. Annertusisamik immikkut atuartitsineq Illuatungeriit miserratiginngilaat annertusisamik immikkut atuartitsinermut aningaasartuutaasartut ullumikkut Namminersornerullutik Oqartussanit akilerneqartartut kommuuninut naligiinngeqisumik agguaanneqartartut. Taamaattumik illuatungeriit isumaqatigiissutigaat annertusisamik immikkut atuartitsinermut akisussaaffimmik nuussinermi allanngortitsinissaq imatut piareersaavigineqartariaqartoq allanngortitsineq kommuuninut ataasiakkaanut aningaasatigut annertuumik kinguneqartussaajunnaarlugu. Immaqa tamanna pisinnaavoq tapiissuteqartarnermi malitassat ataatsimoortumik tapiissuteqariaatsimi atuutsinneqartut iluarsaassivigineqarnerisigut. Illuatungeriilli isumaqatigiissutigaat ataatsimoortumik tapiissutissanik agguaassisarnissamut malitassat pisariitsuullutillu paasiuminartuunissaat. Kuuffiit iluarsaanneqarnissaat Illuatungeriinnit isumaqatigiissutigineqarpoq kuuffiit qanoq suli sivisutigisumik piusinnaanerat pillugu sumulluunniit attaveqanngitsumik misissuisitsisimaneq 2002-imi tamanut tusagassiarineqartoq kommuuninut matussutissiinissamut kisimiilluni tunngavigineqarsinnaanngitsoq. Taamaattumik isumaqatigiissutigineqarpoq tamatuma isumaqatigiinniutigineqaqqinnissaa aatsaat pissasoq 2004-imut ataatsimoortumik tapiissutissat isumaqatigiinniutigineqarnissaannut atatillugu, aammalu KANUKOKA isumaqatigiinniarnernut tunngavissatut kommuuninut attaveqassasoq paasissutissanik nalunaarusiap eqikkaassutigisimasaanut naliliissutigineqaqqittussanik pissarsiniarluni, aammalu kuuffiit iluarsaanneqarnissaannut aningaasaliissutissat tulleriiaarneqarnissaannut tunngavissiisussanik paasissutissanik tunngavissiisinnaasunik pissarsiorluni. Erngup aqqutai Sanaartorfissagissaanermut suliassat nammagassallu agguataarneqartarnerat Naalakkersuisut KANUKOKA-llu 15. oktober 1997-imi nutaamik isumaqatigiissuteqarfigisimavaat. 2003-mut ataatsimoortumik tapiissutissat isumaqatigiinniutigineqarnerinut atatillugu uppernarsineqarsimavoq isumaqatigiissutip immikkoortuisa ilaasa qanoq paasineqarnissaat isumaqatigiinngissutigineqartoq. Illuatungeriinnit isumaqatigiissutigineqarpoq 2002-mi suleqatigiissitaliortoqarnissaa, taassuma qulaarsiviginiassallugit innaallagissap aqqutaanik erngullu aqqutaanik pilersitsinissanut aningaasaliissutitut pigineqareersut periarfissarititaat killissarititaallu. Suleqatigiissitaq KANUKOKA-mit, Aningaasaqarnermut pisortaqarfimmit IAPP-millu ilaasortaaffigineqarpoq. Ilitsersuisarneq – nammineerluni illuliat Illuatungeriit siunnerfigaat nammineerluni illuliornermi ilitsersuisarnerup kommuuninit tiguneqaqqinnissaa. Suliassap tiguneqarnissaani atugassarititaasussat pillugit Ineqarnermut Attaveqaateqarnermullu Naalakkersuisoqarfiup KANUKOKA-llu isumaqatigiinniarnissaat 2002-mi aallartinneqassaaq. Ilitsersuisarnermut aningaasartuutaasartussat sanaartukkat ataasiakkaat malittartussaassavaat, taamaattumik naatsorsuutigineqarani suliassap ukiuni aggersuni ataatsimoortumik tapiissutit isumaqatigiinniutigineqartarnerannut ilaatinneqartarnissaa. Naatsorsueqqissaarutinik nalunaarutiginnittarnissaq Nuna tamakkerlugu isumaginninnikkut naatsorsueqqissaarutit sanarfineqarsimanerannit misilittakkat tunngavigalugit illuatungeriit uppernarsisinnaasimavaat nalunaarutiginnissutit kommuunit edb-leverandøriinit isumagineqarsimasut takujuminarnerpaajusartut aammalu Kalaallit Nunaanni Naatsorsueqqissaartarfimmut paasissutissanik passussinissamut ingerlatitseqqiinissamullu periarfissiilluarnerpaasarlutik. Misilittakkat taakkua tunngavigalugit kiisalu aamma kommuunit nalunaarutiginninniartarnerminni oqilisaassivigineqarnissaannik kissaatigisaq tunngavigalugu siunnersuutigineqassaaq paasissutissiissutinik anisitsisarnerpagaaluit kommuuninut edb-leverandørinit ataatsimoortillugit isumagisassatut suliarineqartalernissaat. Taamaattumik illuatungeriit isumaqatigiissutigaat isumaqatigiissummut atatillugu 100.000 kr.-ninik illuartitsisoqarnissaa, tassa siunertamut tassunga atorneqartussanik. KANUKOKA-p tusarniaavigineqareerneratigut aningaasat Aningaasaqarnermut pisortaqarfimmit timitalersorneqassapput.
Isumaqatigiinniartartoqatigiit Isumaqatigiinniartarnerit suleqatigiiffigineqarnerulernissaata isumaqatigiissuteqarfigineqarnissaa 2002 naatinnagu pissasoq illuatungeriit naatsorsuutigaat, taanna Inatsisartut 2002-mi upernaakkut ataatsimiinneranni inatsisissatut siunnersuummut saqqummiunneqarsimasumut Inatsisartunilli akuersissutigineqarsimanngitsumut taartaalluni atuutilersussaassaaq. Suleqatigiinnissamut isumaqatigiissutip imarissavai inatsisissatut siunnersuummi sammineqartut assingi. Aammattaaq illuatungeriit isumaqatigiissutigaat isumaqatigiissummut atatillugu 900.000 kr.-ninik illuartitsisoqarnissaa, Isumaqatigiinniartarnermut immikkoortortaqarfiup inuttaqarnerata nakussassaavigineqarnissaa siunnerfigalugu. Taamaattumik Naalakkersuisut siunnerfigaat FFL 2003-imut allannguutissamik siunnersuuteqarnissaq, tamatuma nassatarissallugu KANUKOKA-p immikkoortortaqarfiup sallinngortinneqarnissaanik kissaataata piviusunngortinneqarnissaa. Inatsisartut akuersinissaat Isumaqatigiissutip matuma imaanut aalajangiisuusussaapput oqaluuserisassat arlallit Naalakkersuisunit inatsisissatut peqqussutissatullu Inatsisartunut oqaluuserisassanngortinneqarsimasut, ilaatigut pisortanit soraarnerussutisiat pillugit inatsisartut peqqussutaata allanngortinneqarnissaanik siunnersuut, inissianik attartorneq pillugu inatsisartut peqqussutaata allanngortinneqarnissaa, meeqqat inuusuttullu pillugit inatsisartut peqqussutaata allanngortinneqarnissaa aamma 2003-imut aningaasanut inatsisissatut siunnersuut. Inatsisartuni oqaluuserinnineq annertuunik allannguuteqartitsissappat illuatungeriit nutaamik isumaqatigiinniaqqikkumaarput. Nuummi ulloq 20. september 2002
|
