|
Oktobarip 15-iani 2002 naalakkersuisut siulittaasuat Jonathan Motzfeldt aalajangerpoq inatsisartunut qinersisoqassasoq decembarip pingajuani. Taamaattumik 2003-mut tunngatillugu aningaasanut inatsisissaq aalajangersarneqanngitsoorpoq, tamatumalu kommuninut sunniutaa tassaavoq ukiumut budgeteqarfiusumut 2003-mut tunngatillugu ataatsimoortumik tapiissutissanik isumaqatigiissutip Kanukokap septembarip 20-ani naalakkersuisunik isumaqatigiissutigisaata inatsisitigut atortussanngortinneqanngitsoornera. Inatsisartut nutaat qinerneqareerserlugit naalakkersuisut naalakkersuisuugallartutut atuutissapput pisortaqarfiillu ataasiakkaat pisortaqarfiugallartutut atuutissallutik. Naalakkersuisut aningaasaliissutinut inatsisaagallartumik suliaqassapput, taannalu Namminersornerullutik Oqartussat 2003-mi isumannanngitsumik ingerlatseqqinnissaannut tunngavissiiniartussaavoq. Piumasarineqarpoq isertitat aningaasartuutillu 2002-mi aningaasaliissutaasimasut amerlassusii aallaavigalugit ingerlanneqassasut. Aningaasaliissutinut inatsisaagallartoq atuutissaaq 2003-mut aningaasanut inatsisissap inatsisartuulersussani nutaani aalajangiiffigineqarnissaata tungaanut. Takuuk 2003-mut aningaasaliissutinut inatsisaagallartoq pillugu kaajallaasitaq ilanngussaq. Inatsisartut ukiaanerani ataatsimiinnertik maannaannaq unitsimmassuk 2003-mut aningaasanut inatsisissaq inatsisissallu allat aalajangiiffigineqanngitsoorput. Tamatuma kommuninut ataatsimoortumik tapiissutinut sunniutaa tassaavoq 2003-mut tapiissutissanik isumaqatigiissutip nalunaarutigineqareersup ilaasa atorsinnaajunnaarnerat. Tassami 2003-mut tunngatillugu tapiissutinik isumaqatigiissut tunngaveqarmat inatsisartut peqqussutissaasa ukua aalajangersarneqarnissaannik:
- Meeqqanik inuusuttunillu ikiorsiineq pillugu inatsisartut peqqussutissaat Peqqussutissat taakku aalajangiiffigineqanngillat, taamaattumillu kommunit 2003-mut budgetiliornerminni taakku naatsorsuutigissanngilaat. Tamatuma kingunerisaanik 2003-mut ataatsimoortumik tapiissutissat siusinnerusukkut nalunaarutigineqarsimasut 15,9 mio. kr-inik ikilipput. Kalaallit Nunaanni kommuneqarfiit kattuffiat budgetiliornermut ilitsersuusioqqammerpoq 2003-mut tapiissutissanik isumaqatigiissutip ilaasa peqqussusiornikkut aalajangersartariaqanngitsut inatsisartunut qinersinerup kingorna atortussanngorsinnaajumaarnerat naatsorsuutigalugu. Suli sorpassuit allanngorsinnaapput, 2003-mullu aningaasanut inatsisissap qanoq ittuunissaanut naalakkersuisortaassat apeqqutaassapput. |
