UKIUMUT ANINGAASANUT PILERSAARUSIORFIMMUT 2005-IMUT ATAATSIMOORTUMIK TAPIISSUTISSAT PILLUGIT TAPILIUSSATUT ISUMAQATIGIISSUT
I. Aallaqqaasiut
Ukiumut aningaasanut pilersaarusiorfimmut 2005-imut ataatsimoortumik tapiissutissat pillugit tapiliussatut isumaqatigiissut una pingaarnertut isumaqatigiissummut "Namminersornerullutik Oqartussat aamma kommunit ukiumut aningaasanut pilersaarusiorfimmut 2005-imut ataatsimoortumik tapiissutissat pillugit isumaqatigiissut"mut, illuatungeriit juunip 22-anni 2004 atsiugaannut tapiliunneqarpoq. Kommuninut 2005-imi ataatsimoortumik tapiissutissat taamaalillutik ataatsimoortumik tapiissutissat pillugit isumaqatigiissut juunip 22-anni 2004-meersoq tapiliussatullu isumaqatigiissut manna tunngavigalugit tunniunneqartussaapput.
II. Ataatsimut isigalugit
Annertussusileriikkamik ikiorsiissutit tamakkiisunngortinneqarnerannik inatsisit akuersissutigineqarneri
Ukiumut aningaasanut pilersaarusiorfimmut 2005-imut ataatsimoortumik tapiissutissat pillugit isumaqatigiissummi takuneqarsinnaavoq: "Naalakkersuisut Inatsisartut ukiakkut ataatsimiinneranni siunnersuutiginiarpaat annertussusileriikkamik ikiorsiissutit akileraarutaasalissasut SIK-llu minnerpaamik akissarsiarititaasa 90 procentiinut qaffanneqarlutik.".
Inatsisit tamakkununnga tunngasut Inatsisartunit allanngortinneqarnerannut atasumik 2005-imut ataatsimoortumik tapiissutissat pillugit isumaqatigiissummut tapiliussamik isumaqatigiissuteqartoqartussaavoq, Namminersornerullutik Oqartussat taamaalillutik Inatsisartut inatsisinik allannguinerata toqqaannartumik sunniutaanut 2005-imut ataatsimoortumik tapiissutissat aqqutigalugit kommunit taarsiiffigissammatigik.
Assigiimmik akeqartitsinerup nutarterneqarnissaata akuersissutigineqarnera
Ukiumut aningaasanut pilersaarusiorfimmut 2005-imut ataatsimoortumik tapiissutissat pillugit isumaqatigiissummi takuneqarsinnaavoq: "Naalakkersuisut assigiimmik akeqartitsinerup nutarterneqarnissaanik Inatsisartut 2004-mi ukiakkut ataatsimiinneranni siunnersuuteqarniarput. Illuatungeriit isumaqatigiipput assigiimmik akeqartitsinerup nutarterneqarnissaa piviusunngortinniarluigu Inatsisartut aalajangissappata kommuninut ataatsimoortumik tapiissutissat isumaqatigiinniutigeqqinneqassasut, kommunit ataatsiakkaarlutik 2005-imi atuinertik allanngortinnagu assigiimmillu akeqartitsinerup nutarterneqarneragut aningaasartuutigineruligassaat aningaasartuutikillissutissaallu ataatsimoortumik tapiissutitigut nalimmassarneqarsinnaaqqullugit."
Assigiimmik akeqartitsinerup piviusunngortinneqarnissaanut aningaasaliissutitigut tunngavissat Inatsisartunit akuersissutigineqarpata taava tamatumunnga atatillugu nutarterinermut atasumik kommunit aningaasartuutigineruligassaasa aningaasartuutikillissutissaasalu nalimmassarneqarnissaannik tapiliussamik isumaqatigiissusiortoqassaaq.
III. Immikkoortut aalajangersimasut annertussusileriikkamik ikiorsiissutit tamakkiisunngortinneqarnerannut atatillugu isumaqatigiinniutigisassat.
Kommunit ataatsimoortumik akileraarutitigut isertitaasa iluarsiissuteqarfiginissaat
Kommunit ataatsimoortumik akileraarutitigut isertitaasa iluarsiissuteqarfigineqarnissaat immikkoortumi matumani takutinneqartoq kommuninut ataatsimoortumik tapiissutit amerlassusiinut sunniuteqassanngilaq, tassa iluarsiissuteqarnissaq tamanna tassuuna pinnani kommunit ataatsimoortumik akileraarutitigut naligiissaaffigineqartarneratigoortumik pisussaammat.
Ataatsimoorullugu naatsorsuinertigut erserpoq Kalaallit Nunaanni tamarmi suliffissaqanngitsutut nalunaarsimasut 2.500-uppata annertussusileriikkamik ikiorsiissutit tamakkiisunngortinneqarnerata kinguneranik kommuninut ataatsimoortumik akileraarutit katillugit 3.366.149 kr.-nik 2005-imi qaffakkumaartut naatsorsuutigineqarsinnaasoq. Tamatuma nassataanik Namminersornerullutik Oqartussat kommuninut ataatsimoortumik akileraarutitigut isertitassatut missiliuutitik 2005-imi katillugit 4 mio. kr.-nik qaffatsereersimavaat.
Naatsorsuinermi tunngaviuvoq suliffissaaleqisut 2.500-t, aamma 2003-mi inuttussutsit agguaqatigiissinnerat najoqqutaralugu ilaliussaq 1-imi takutinneqartutut agguataarsimassasut.
Aannertussusileriikkamik ikiorsiissutit tamakkiisunngortinneqarnerata kingunerisaanik kommunit ataatsimoortumik akileraarutitigut isertitaasa iluarsiissuteqarfiginissaat, kommunit ukiuni tulliuttuni ataatsimoortumik akileraarutitigut katillugit isertitassaasut ilimagineqartut pillugit Akileraartarnermut Pisortaqarfiup naatsorsuinerinut ilanngunneqassapput, missiliuutit aalajangersarneqarneriniit aningaasanut ukiorisat marluk qaangiunneranni isertitarineqartutut piviusunngortitat kingunerannik ingerlaavartumik iluarsiiffigineqartassallutik. Kommuninut ataatsimoortumik akileraarutitigut isertitat piviusunngortinneqartut kingunerannik siullermeerluni iluarsiinissaq, annertussusileriikkamik ikiorsiissutinik pisartunik ilaqartussaq, Akileraartarnermut Pisortaqarfiup 2007-imi ingerlatissavaa.
Tamat naatsorsuutigereerlugit annaasassanut taarsiissutissat
Kommuninut ataatsimoortumik akileraarutitigut sunniutaajumaartut saniatigut annertussusileriikkamik ikiorsiissuteqartarnerup tamakkiisunngortinneqarnera tamat naatsorsuutigereerlugit kommuninut annaasaqaataassasoq naatsorsuutigineqarpoq. Ataatsimoorullugu naatsorsuinertigut erserpoq ukiumut inuit 2.500-t suliffissaaleqippata kommunit 2005-imi tamat naatsorsuutigereerlugit annaasassaat 3,5 mio. kr.-ussasut. Tamat naatsorsuutigereerlugit annaasassat kommuninut ataatsikkaanut assigiinngisitaartumik sunniuttussaapput.
Taamaattumik illuatungeriit isumaqatigiipput 2005-imut kommuninut ataatsimoortumik tapiissutit aqqutigalugit kommunit annaasaminnut 3,5 mio. kr.-nik taarsiissuteqarfigineqassasut, taakku 2003-mi agguaqatigiissillugu inuttussutsit najoqqutaralugit ilaliussaq 2-mi takutinneqartutut agguaanneqassallutik.
IV. Assigiimmik akeqartitsinerup nutarterneqarnerata kinguneranik isumaqatigiinniutigisassat aalajangersimasut
Assigiimmik akeqartitsinerup nutarternissaata piviusunngortinnissaannut aningaasaliissutitigut tunngaviusussat Inatsisartunit akuerineqarnerannut atatillugu Naalakkersuisut akinik nutaanik, assigiimmik akeqartitsinerup nutarterneqarnissaaanut piviusunnguutaasussanik, 2005-imiit atuutilersunik akuersissuteqassapput.
Illuatungeriit tamatumunnga atatillugu ilisimatitsissutigissavaat ukiumut aningaasanut pilersaarusiorfimmut 2005-imut ataatsimoortumik tapiissutissat pillugit Namminersornerullutik Oqartussat kommunillu isumaqatigiissutaata, juunip 22-anni 2004-mi atsiorneqartup, isumaqatigiinniutigineqarnerani kisitsisitigut tunngavigineqartut assigiimmik akeqartitsinerup nutarterneqarnissaanik Naalakkersuisut siunnersuutaata allanngortimmagit.
Allannguutip ilaa kommunit karsiinut toqqaannartumnik sunniuttussaq tassaavoq illuliorfissanik piareersaasarnermi nalikilliliisarnertigut, aamma pilersuinikkut atortorisat tapiissutitigut aningaasalersugaasutigut aningaasartuutit naalakkersuisut ilimasaarutigeriikkamittut agguaassinermi naatsorsuutinut ilanngummatigit. Tamanna ataatsimortumik aningaasartuutit, taamalu aningaasartuutit naatsorsuutigalugit akit angissusiligaanerinut allannguutinik nassataqarpoq.
Assigiimmik akeqartitsinerup nutarterneqarneratigut sumi najugaqarneq aalajangiisuutillugu aningaasartuutit naatsorsuutigalugit akiusussanut ikaarsaariarneq aallartissaaq, makkuninnga ikaarsaariarnermut naligiissaanermullu aaqqissuussiffiulluni:
Illoqarfinni nunaqarfinnilu ataatsimoortumik aningaasartuutit massakkut nuna tamakkerlugu atuuttumik assigiimmik akigititamit appasinneruffigissaanni jannuaarip aallaqaataanit 2005 akikilliliisoqassaaq. Taamaattorli aki taanna massakkut nuna tamakkerlugu atuuttumik assigiimmik akigititap, aningaasartuutit qaffaataat iluarsiissutigereerlugit, minnerpaamik 50%-ianik angissuseqassaaq.
Illoqarfinni nunaqarfinnilu ataatsimoortumik aningaasartuutit massakkut nuna tamakkerlugu atuuttumik assigiimmik akigititamit qaffasinneruffigisaanni, akit jannuaarip aallaqqaataani 2005-imiit 2009-mut ukiumut 10 pct.-imik qaffattassapput, taamallilluni akiusoq 2009-mi massakkut nunamut tamarmut atuuttumik assigiimmik akiusup aningaasartuutit qaffaataat iluarsiissutigereerlugit 150 pct.-ianik angissuseqassalluni.
Assigiimmik akeqartitsinerup nutarterneqarnerata kommuninut kingunerissavaa kommunit innaallagissamut, imermut kiassarnermullu aningaasartuutaasa tamarmik, 2003-misulli atuineq annertussuseqarpat 2005-imi 5,3 mio kr.-nik appariarnissaat.
Assigiimmik akeqartitsinerup nutarternerata kinguneranik aningaasartuutit qaffaatissaasa appaatissaasalu nalimmassarneqarnissaat
Assigiimmik akeqartitsinerup nutarterneqarnera kommunini ataasiakkaani assigiinngitsumik sunniutissaaq.
Illuatungeriit isumaqatigiipput assigiimmik akeqartitsinerup nutarterneratigut kommunit aningaasartuutaat qaffannatilluunniit appassanngitsut. Taamaattumik isumaqatigiissutaavoq assigiimmik akeqartitsinerup nutarterneratigut kommunit aningaasartuutaasa qaffaataat appaataallu, 2005-imut kommuninut ataatsimoortumik tapiissutit aqqutigalugit immikkoortitaartumik agguaanneqassasut.
Naatsorsuinertigut erserpoq assigiimmik akeqartitsinerup nutarterneratigut kommunit aningaasartuutaasa qaffaataat appaataallu ilaliussaq 3-mi takutinneqartutut agguaassimassasut.
Ataatsimoortumik tapiissutissanut iluarsiissutissat naatsorsornerini 2003-misulli atuisoqarnissaa aallaavigineqarpoq.
Illuatungeriit isumaqatigiipput kommunit atuinerat malittariumallugu, tassa ataatsimoortumik tapiissutissanut iluarsiissutissani 2003-misulli atuisoqarnissaa aallaavigineqarmat.
Illuatungeriit tamanna tunngavigalugu isumaqatigiipput 2005-imi ataatsimoortumik tapiissutissat ilaliussaq 3-mi ersersinneqartutut 5,3 mio. kr.-inik appartinniarlugit.
V. Allanut tunngasut
Isumaqatigiissuteqarnermi apeqqutaatinneqartoq
Aningaasaliissutit Inatsisartunit akuersissutigineqarnissaat apeqqutaatillugu taamatut isumaqatigiissuteqartoqarpoq.
Nuuk, oktobarip 28-at 2004
|
Josef Motzfeldt |
Jens Lars Fleischer |
|
|
|
|
|
|
