2006-imi ataatsimoortumik tapiissutissat

Illuatungeriit isumaqatigiipput Naalakkersuisut 2006-imut Inatsisartut Aningaasanut Inatsisissaattut Siunnersuutaanni 2006-imi kommuninut ataatsimoortumik tapiissutinut siunnersuusiortoqassasoq 775.431.000 kr.-inik. Taamaalillutik ataatsimoortumik tapiissutit 2005-imit 20,9 mio. kr.-inik appariaateqarput. Ilanngussaq 1-imi takutinneqarput 2005-imut sanilliullugu isumaqatigiissutip ataatsimoortumik tapiissutit qanoq allanngortinnerai. Isumaqatigiissummi tunngavigineqartut ataasiakkaat tulliuttuni nassuiarneqarput.

1. Akinut akissarsianullu iluarsiissutit
Illuatungeriit isumaqatigiipput ataatsimoortumik tapiissutit 2005-imi 796,4 mio. kr.-iusut, 1,55 %-inik, akinut akissarsianullu iluarsiivigineqassasut, taakku 2006-imi ukiunilu missingersuusiorfiusuni 12.344.000 kr.-inut naapertuullutik.

2. Nalinginnaasumik sipaarutit
Naalakkersuisut 2004-mut aningaasanut inatsisissatut siunnersuut aqqutigalugu ilinniartitaanernut inuussutissarsiutinillu ineriartortitsinermut amerlanernik aningaasaliissuteqarniarlutik aningaasaliissutinik pingaarnersiueqqipput. Naalakkersuisut Aningaasaqarnikkut ingerlatsineq pillugu Nalunaarut 2005-imi siunnersuutigaat 2012 – 2013-imit ilinniartitaanernut aningaasaliissutit 400 mio. kr.-inngortinneqarnissaat siunertaralugu 2006-imut aningaasanut inatsimmissaaq pingaarnersiueqqittoqassasoq.

Aningaasaqarnikkut ingerlatsineq pillugu Nalunaarut 2005-imi ilinniartitaanernik suliniuteqarnerunissamut takussutissiap takutippaa suliniut tamakkiisumik timitalerneqarpat inuit ullumimit 2.800-inik amerlanerusut ukiut tamaasa ilinniagaqassasut assigisaanilluunniit. Inuit taakku sulisinnaasuninngaanneersuupput. Assersuutitut illoqarfinni suliffissaaleqisut nalunaarsorneqarsimasut qaammammut agguaqatigiissillugu 1.900-uupput, nunaqarfinni suliffissaaleqisut qaammammut agguaqatigiissillugu 400-uusut.

2005-imut Aningaasanut inatsimmi Inatsisartut kommuninut ataatsimoortumik tapiissutini sipaarutissat ilannguppaat, 2006-imi 25,9 mio. kr.-inut, 2007-mi 51,7 mio. kr.-inut aammalu 2008-miit 77,1 mio. kr.-inut naapertuuttut. Naalakkersuisut 2005-imut aningaasanut inatsimmi sipaaruteqarnissamut siunnersuumminnut tunngavigaat ilinniartitaanerit qaffasissusaasa annertusineqarnissaannut sillimmatinut aningaasaliissutissanik ujarlernissaq.

Illuatungeriit isumaqatigiipput ilinniartitaanernut inuussutissarsiutinillu ineriartortitsinermut ani-ngaasaliissutit amerlanerusut aningaasalersorneqarnissaannut pingaarnersiueqqinnissaq suliassaasoq nammatassarlu kommunit aammalu Namminersornerullutik Oqartussat ataatsimut ingerlattariaqagaat.

Illuatungeriit kommunit aningaasaqarnerat eqqarsaatigalugu isumaqatigiipput ilinniartitaanernut suliniuteqarnerunerup aningaasalersorneqarnissaannut kommunini sipaarutissat timitalerneqarnissaat ukiumik affarmik kinguartinneqassasoq, taamaalilluni kommuninut ataatsimoortumik tapiissutini sipaarutit 2006-imi 12,9 mio. kr.-inik, 2007-mi 38,8 mio. kr.-inik, 2008-mi 64,7 mio. kr.-inik aammalu 2009-mit 77,7 mio. kr.-inik timitalerneqarlutik.

3. Akileraartarnermut tunngasut nunap immikkoortuinut eqiterneqarnerat
Inatsisartut isumaatigiillutik 2. maj 2005-imi aalajangerpaat akileraartarnermut akitsuusiisarnermullu tunngasut aaqqissuuteqqinneqassasut nunallu immikkoortuinut eqiterneqassasut.

Akileraartarnermut akitsuusiisarnermullu tunngasut 1. januar 2007-mit nunap immikkoortuinut eqiterneqassapput, naatsorsuutigineqarporlu tamatuma kingorna akiliisitsiniarnermut tunngasut 1. januar 2008-mit nunap immikkoortuinut eqiterneqassasut.

Illuatungeriit isumaqatigiipput akileraartarnermut tunngasut nunap immikkoortuinut eqiterneqarnerat suliniutitut ingerlanneqassasoq, tamatumani KANUKOKA kommuninilu ingerlatsivinnit aallartitat suliassap aaqqissuulluakkamik inerneqarnissaa siunertaralugu eqeersimaartumik peqataatinneqassallutik.

Taamaattumik illuatungeriit akileraartarnermut tunngasut nunap immikkoortuinut eqiterneqarnissaannut pingaarnertut najoqqutarisassat ilanngussaq 2-mi takutinneqartut isumaqatigiissutigaat.

4. Aningaasartuutit inatsisitigut pisussaaffigisat iluarsiivigineqarnerat nutaamillu naliliiffigineqarnerat

4.1 2003-2004-mi siusinaartumik pensionisialinnut aningaasartuutit iluarsiivigineqarnerat
50/50-imik aaqqissuussineq atorlugu kommunit siusinaartumik pensionisianut 2003-mi 2004-milu aningaasartuutaat kommunit ataatsimoortumik tapiissutit pillugit isumaqatigiissutit naapertorlugit ataatsimoortumik tapiissutinit taarsiiviginnissutaannit 1.598.000 kr.-inik amerlanerupput.

Taamaattumik illuatungeriit isumaqatigiipput ataatsimoortumik tapiissutit 2006-imi 1.598.000 kr.-inik qaffanneqassasut.

4.2 Siusinaartumik pensionisiat iluarsiivigineqarnerat, 50/50-imik aaqqissuussinermi pensionisiallit amerliartornerat, 2006
2001-2002-mut kommuninut ataatsimoortumik isumaqatigiissummi illuatungeriit isumaqatigiipput ataatsimoortumik tapiissutit ima iluarsineqassasut, kommunit siunissaq qaninnerusoq ungasinnerusorlu eqqarsaatigalugu siusinaartumik pensionisiat 10%-imit 50%-inut qaffannerannut kommunit aningaasalersuinerminnut tamakkiisumik taarsiivigineqassasut.

Taamaattumik illuatungeriit isumaqatigiipput ataatsimoortumik tapiissutit 2006-imi 5.900.000 kr.-inik amerlineqassasut, 50/50-imik aaqqissuussinermi 2006-imi siusinaartumik pensionisiallit nutaat amerlassusissaattut naatsorsuutigineqartunut naapertuuttut.

4.3 Ineqarnermut tapiissutit 2004-mut iluarsiivigineqarnerat
2004-mi kommunit ineqarnermut tapiissutinut aningaasartuutaannit 6.190.000 kr.-inik amerla-nerusunik kommunit taarsiivigineqarput.

Taamaattumik illuatungeriit isumaqatigiipput ataatsimoortumik tapiissutit 2006-imi 6.190.000 kr.-inik ikilineqassasut, kommunit 2004-mi ineqarnermut tapiissutinut aningaasartuutikinnerunerannut naapertuuttut.

4.4 Ineqarnermut tapiissutit 2006-imit iluarsiivigineqarnerat
2003-mut 2004-mullu naatsorsuutit tunngavigalugit Namminersornerullutik Oqartussat naatsorsuutigaat ineqarnermut tapiissutinut aningaasartuutit 2006-imit missingerneqarnerat katillugit 15 mio. kr.-inik annikillineqassasoq. Kommunit namminneq akiligassaat 40%-iuvoq. Kommunit aningaasartuutissatut missingiussanit akiligassaat taamaalillutik 6 mio. kr.-inik ikinnerussapput.

Taamaattumik illuatungeriit isumaqatigiipput ataatsimoortumik tapiissutit 2006-imit 6.000.000 kr.-inik ikilineqassasut, kommunit 2006-imit ineqarnermut tapiissutinut aningaasartuutikinnerunissaannut missingikkanut naapertuuttut.

5. Meeqqat atuarfianni akuleriissitsineq
1995-imi meeqqat atuarfiannik iluarsartuusseqqinnermi illuatungeriit isumaqatigiipput kommunit piffissami ikaarsaariarnermi ukiuni aqqaneq marlunni ilinniartitsisut akissarsiaannut aningaasartuuteqarnerunerminnut taarsiivigineqassasut. 2005-imi kommunit 1.436.000 kr.-inik taarsiivigineqarput. Isumaqatigiissut 1. august 2006-imi naassaaq, taamaattumik kommunit ukiumoortumik 1.436.000 kr.-inik aningaasartuutaasa taamaallaat 7/12-iannik 2006-imi taarsiivigineqassapput.

Taamaattumik illuatungeriit isumaqatigiipput ataatsimoortumik tapiissutit 2006-imi 838.000 kr.-inik amerlineqassasut.

6. Atuarfitsialak
Meeqqat atuarfiannik iluarsartuusseqqinnermi Atuarfitsialammi 11. klassit atorunnaarsinneqarsimavoq. Kommunit 2009-p tungaanut ikaarsaariarnermi tiiminut aningaasartuuteqarnerupput ataatsimoortumik tapiissutini taarsiivigineqartussanik. 2009-mi Atuarfitsiliak tamakkiisumik atuutilissaaq, tamatumalu kingorna ataatsimoortumik tapiissutini taarsiissuteqartoqarunnaassaaq.

Illuatungeriit isumaqatigiipput ataatsimoortumik tapiissutit 2006-imi 200.000 kr.-inik ikilineqassasut. 2007-mi illuatungeriit ataatsimoortumik tapiissutit 0,3 mio. kr.-inik qaffanniarpaat, 2008-miillu illuatungeriit ataatsimoortumik tapiissutit 6,3 mio. kr.-inik apparniarlugit.

7. Immikkut annertusisamik atuartitsineq
Illuatungeriit isumaqatigiipput 2006-imi immikkut annertusisamik atuartitsinermut utertitassatut annertussuserititaq akunnermut atuartitsissummut 60 minutsinut 481,64 kr.-inut aalajangersarneqassasoq. Annertussuserititatut Kanukokamit aammalu Kultureqarnermut, Ilinniartitaanermut, Iiisimatusarnermut Ilageeqarnermullu Pisortaqarfimmit naatsorsorneqartoq ilinniartitsisunut tjenestemandiusunut isumaqatigiissutillu naapertorlugit atorfinitsinneqartunut naatsorsuussaavoq, annertussuserititamilu IMAK-imut tunngasuni 2005-imit 2006-imut akissarsiarititanut iluarsiissutaagallartut 2%-iupput.

8. Meeqqanut inuusuttunullu ulloq unnuarlu paaqqinniffiit

8.1 Meeqqanut inuusuttunullu ulloq unnuarlu paaqqinniffiit – 2004-mi atuineruneq
Namminersornerullutik Oqartussat kommunillu akornanni 2005-imut ataatsimoortumik tapiissutinut isumaqatigiissummi illuatungeriit isumaqatigiissutigaat:

”…. nuna tamakkerlugu meeqqanut inuusuttunullu ulloq unnuarlu paaqqinniffinnut missingersuutinut sanilliullugu 2004-mi atuinerusoqarsinnaavoq. Illuatungeriit isumaqatigiipput atuineruneq tamanna ukiumut missingersuusiorfiusumut 2006-imut ataatsimoortumik tapiissutini iluarsiivigineqassasoq.”

Meeqqanut inuusuttunullu paaqqinniffinnut tunngasuni atuineruneq 2004-mi Nunatta Karsiata 2004-mut naatsorsuutaani katillugit 11,6 mio. kr.-inut naatsorsorneqarpoq.

Illuatungeriit isumaqatigiipput kommunit atuineruneq Kanukoka aqqutigalugu ilimasaarutigineqartoq kisiat matussusissagaat.

Taamaattumik illuatungeriit isumaqatigiipput ataatsimoortumik tapiissutit 2006-imi 8.500.000 kr.-inik ikilineqassasut, atuinerunissamut Kanukokamut siumut ilimasaarutigineqartumut naapertuuttut.

8.2 Meeqqanut inuusuttunullu ulloq unnuarlu paaqqinniffiit – 2006-imut missingersuutit
Ilaqutariinnermut Pisortaqarfiup Kanukokallu akornanni oqaloqatigiinnerit kingorna meeqqanut inuusuttunullu paaqqinniffinnut ukiumut missingersuusiorfiusumut 2006-imut missingersuutit isumaqatigiissutigineqarput.

Taamaalillutik kommunit meeqqanut inuusuttunullu ulloq unnuarlu paaqqinniffinnut ataatsimut aningaasartuutaat 2006-imi katillugit 113.400.000 kr.-inut missingersuusiorneqarsinnaapput, taakkunani 50%-it 56.700.000 kr.-inut naapertuuttut kommuninut ataatsimoortumik tapiissutit ikilineqarnerisigut aningaasalersorneqassallutik.

Tamanna tunngavigalugu illuatungeriit isumaqatigiipput ataatsimoortumik tapiissutit 2006-imi 56.700.00 kr.-inik ikilineqassasut.

9. Ilaqutariit akissarsiutigalugu paarsisartunut aaqqissuussinerup malitseqartinneqarnera
Meeqqanut inuusuttunullu ikiorsiisarneq pillugu Inatsisartut peqqussutaat 1. juli 2003-mi atuutilertussatut Inatsisartut 15. april 2003-mi akuersissutigaaat. Tassunga atatillugu illuatungeriit isumaqatigiipput kommuni ukiumoortumik ataatsimoortumik tapiissutinit 2003-mut 7.927.000 kr. aammalu 2004-mit 15.854.000 kr.-inik taarsiivigineqassasut, taakkunanit 3.936.870 kr.-it kommunit ilaqutariinnut akissarsiutigalugu paarsisartunut 30-nut aningaasartuutaat ilaatinneqarlutik.

Illuatungeriit siusinnerusukkut isumaqatigiissutigaat 2006-imut kommuninut ataatsimoortumik tapiissutinik isumaqatigiinniarnermut atatillugu meeqqanut inuusuttunullu ikiorsiisarneq pillugu peqqussutip nutaap kingunerisaanik kommunit aningaasartuutaat naatsorsorneqassasut.

Naatsorsuinermi paasineqarpoq ilaqutariit akissarsiutigalugu paarsisartunut aaqqissuussineq illuatungeriit kissaataat malillugit atorneqanngitsoq.

Tamanna tunngavigalugu illuatungeriit isumaqatigiipput 2005-imut ataatsimoortumik tapiissutit 3.806.000 kr.-inik ikilineqassasut, ilaqutariinnut akissarsiutigalugu paarsisartunut 28-nut aningaasartuutinut naapertuuttut, aammalu ataatsimoortumik tapiissutit 2006-imit 3.281.000 kr.-inik ikilineqassasut, ilaqutariinnut akissarsiutigalugu paarsisartunut 25-inut aningaasartuutinut naapertuuttut.

Taamaalilluni aallaaviatigut naatsorsuutigineqarpoq kommunit 2006-imit ilaqutariinnut akissarsiutigalugu paarsisartunut tallimanut ukiumut aningaasartuutaannut taarsiissuteqartoqartassasoq, ilaqutariinnut akissarsiutigalugu paarsisartunut 30-nut pinnani, tamanna peqqussummi oqaaseqaatini naatsorsuutigineqaraluartoq.

Illuatungeriit isumaqatigiipput ilaqutariinnut akissarsiutigalugu paarsisartunut aaqqissuussineq ataatsimoortumik tapiissummi matumani isumaqatigiissutaasumit naatsorsuutigisamit atorneqarneruppat ilaqutariinnik akissarsiutigalugu paarsisartunik atuinerunermut kommunit taarsiivigineqassasut.

10. Sanaartorfissagissaaneq Nukissiorfiillu erngup aqqutaannut pingaarnernut aningaasartuutaat
Illuatungeriit isumaqatigiipput sanaartorfissagissaanermut apeqqutinut tunngasutigut siunissami siumoortumik isigisalerniarlutik.

Naalakkersuisut 2006-imut aningaasanut inatsisisaannut siunnersuummi Inatsisartunut qinnuteqarniarput Nukissiorfiup suliassaqarfiani sanaartorfissagissaanissamut 10 mio. kr.-init amerlanerusunik aningaasaliissuteqarnissamut akuersaaqqullugit.

Taamaaqataanik kommunit sanaartorfissagissaatissanik piumasaqaateqarnissamut maleruagassatigut Naalakkersuisut erseqqinnerusunik tunngavissiorniarpaat.

11. Meeqqat atuarfiisa illutaannut sillimmasiisussaatitaaneq
Meeqqat atuarfiata 1. januar 1981-imi kommuninut tunniunneqarneranut aammalu illutat amerlanerpaartaasa kommuninit ataasiakkaanit aamma tiguneqarnerannut atatillugu Namminersornerullutik Oqartussat meeqqat atuarfianni illutanut sillimmasiisussaatitaaneq ingerlatiinnarpaat.

Illuatungeriit isumaqatigiissutigaat meeqqat atuarfianni illutanut sillimmasiisussaatitaaneq kommuninut tunniunneqassasoq, tamatuma peqatigisaanik kommuninut ataatsimoortumik tapiissutit 2006-imiit 1.060.000 kr.-inik amerlineqarlutik.

Illuatungeriittaaq isumaqatigiissutigaat Ineqarnermut Attaveqaqatigiinnermullu Pisortaqarfik kiisalu Kanukoka ataatsimoorlutik tunniussinissaq piareersassagaat, taamaalilluni 1. januar 2006-imi tunniussisoqarsinnaaqqullugu.

12. Sulinermik misiliinermut atatillugu sulinermik misiliisunut sillimmasiisussaatitaaneq
Meeqqat atuarfiat kommuninut tunniunneqarmat sulinermik misiliisut misiliinerminni ajoqusersinnaanerannut sulinermi ajoqusersinnaanermut inatsimmi malittarisassat malillugit matussuserneqartarnissaat Namminersorullutik Oqartussanit tigummiinnarneqarpoq.

Ilinniartitsisunik atorfinitsitsisarneq kommunit akisussaaffigilermassuk illuatungeriit isumaqatigiipput akisussaaffeqarfik tamanna aamma kommuninut tunniunneqassasoq, kommunit taamaalillutik atuartut ukiuminnut piginnaasaminnullu naleqqiullugu ajutooratarfiusinnaasunik suliaqannginnissaat toqqaannartumik qulakkeerinissamut suliassaq toqqaannartumik tigummassuk.

Kommunit taamaalillutik atuartut sulinerminni pisariaqartumik ilitsersorneqarnissaannik nakkutigineqarnissaannillu qulakkeerinissaminnut aamma pisussaatitaapput.

Illuatungeriit isumaqatigiipput sulinermik misiliisut sulinerannut atatillugu sillimmasiisussaatitaaneq kommuninut tunniunneqassasoq, tamatuma peqatigisaanik kommuninut ataatsimoortumik tapiissutit 2006-imit 100.000 kr.-inik amerlineqarlutik.

Illuatungeriittaaq isumaqatigiissutigaat Ineqarnermut Attaveqaqatigiinnermullu Pisortaqarfik Kanukokalu ataatsimut tunniussinissaq piareersassagaat, taamaalilluni 1. januar 2006-imi tunniussisoqarsinnaaqqullugu.

13. Isumaginninnermi peqqissaanermilu ikiortit ilinniarnerminni akissarsiaat kiisalu peqqissaanermik perorsaanermillu ilinniartitaanerni sulinermik misiliinermi akissarsiarititat
Isumaginninnermi peqqissaanermilu ikiortitut ilinniartitaanerit 2004-mi 2005-imilu iluarsartuuteqqinneqarput, maannalu ilinniartitaanerullutik immikkut ingerlasut. Ilinniartitaanernut taakkununnga atuuppoq, iluarsartuusseqqinneq sioqqullugu ilinniartut ukiumi ilinniarfiusumi siullermi ukiumilu tullermi ilinniarnerminni ilinniagaqarnersiuteqartarlutik, piffissanilu sulinermik misiliinerminni sulisitsisumit akissarsisinneqartarluik – taakkunanit kommuninit ilaat akilerneqartarlutik.

Illuatungeriit isumaqatigiipput kommunit akissarsianut aningaasartuutaat siusinnerusukkut ukiumut 4.807.000 kr.-iusut aammalu Namminersornerullutik Oqartussat ilinniagaqarnersiutinut ukiumoortumik 3.213.000 kr.-inik immikkut aningaasartuuteqartartut. Illuatungeriit isumaqatigiissutigaattaaq kommunit ilinniartut ilinniarnermik nalaat tamaat ilinniagaqarnersiuteqalernerannut akileraarutinit isertitassaraluanit 100.000 kr.-it missaat annaagaat.

Taamaalillutik kommunit ilanngaatissat ilanngaatigereerlugit iluanaaruteqassapput 1.494.000 kr.-it missaannik (4.807.000 – 100.000 – 3.213.000) kr.

Illuatungeriit isumaqatigiipput ataatsimoortumik tapiissutit isumaginninnermi peqqissaanermilu ikiortitut ilinniartut ilinniagaqarnersiuteqalernissaasa kingunerisaanik 2006-imit 3.213.000 kr.-inik ikilineqassasut.

Peqqissaasunngorniartut, peqqissaanermi ikiortinngorniartut sulinermik misiliinerannut ilitsersorneqarneranni akissarsiaqartinneqarnerat pillugu Isumaqatigiissut 2. marts 2004-meersoq malillugu sulinermik misiliisunut ilitsersuisunut 1. april 2003-mi akissarsiaqartitsisoqalerpoq.

Kalaallit Nunaanni ulluunerani aammalu ulloq unnuarlu paaqqinniffinni perorsaasutut suliaqartunut Kalaallit Nunaanni Naalakkersuisut aammalu PIP-ip akornanni isumaqatigiissut 23. august 2002-meersoq malillugu sulinermik misiliisunut ilitsersuisunut/ilinniartitsisunut 1. april 2001-imit akissarsiaqartitsisoqalerpoq.

Illuatungeriit isumaqatigiissutigaat kommunit ilanngaatissat ilanngaatigereerlugit katillugit 1.494.000 kr.-inik iluanaarutit ilaat atussagaat sulinermik misiliisunut ilitsersuisut/ilinniartitsisut akissarsiaasa aningaasalersorneqarnissaannut.

Tamatuma peqatigisaanik illuatungeriit isumaqatigiipput sulinermik misiliisunut ilitsersuisut/ilinniartitsisut pillugit siunissami apeqqutit suliat attuumassuteqartut pillugit isumaqatigiinniarnernut atatillugu oqaluuserineqassasut.

14. Eqqakkat aqqutaannut pingaarneernut aningaasaleeqqinneq pillugu isumaqatigiissutip malitseqartinneqarnera
Illuatungeriit 2005-imut ataatsimoortumik tapiissutit pillugit isumaqatigiissummi isumaqatigiipput 2005-2009-mi eqqakkat aqqutaasa iluarsarneqarnissaannut katillugit 85,0 mio. kr.-it immikkoortinneqassasut, ukiumut 17 mio. kr.-inut agguarneqartunik.

Isumaqatigiissutip malitseqartinneqarneranut ilanngunneqarpoq ilanngussaq 3, tassani piffissamut 2005-2009-mut iluarsaanissamut pilersaarut tamakkiisumik aalajangersagaasoq kommuninullu ukiumoortumik 17 mio. kr.-inut agguagaasoq takutinneqarpoq.

Kommunit ataasiakkaat iluarsaanissamut pilersaarutip malinnissaanut imminnut pisussaatipput.

2006-imut aningaasanut inatsimmi iluarsaanissamut pilersaarut aalajangersarneqartoq kommuninullu agguarneqartoq aallaavigalugu Naalakkersuisut 2006-imi ukiunilu tamani 2007-2009-mi eqqakkat aqqutaannik iluarsaanissamut, pilersaarusiorneq misissueqqaarnerillu ilanngullugit, 17 mio. kr.-it atorneqartussat taaneqartut kommuninut neriorsuutigineqarnissaat Inatsisartunit akuersissutigeqqullugit qinnuteqarniarput, taamaalilluni kommunit ukiunut arlalinnut pilersaarusiornissamut iluarsaanissamullu aningaasatigut qulakkeerneqaqqullugit.

15. Assigiimmik akeqartitsinerup atorunnaarsinneqarnerata kingunerisaanik iluarsiissuteqarneq
”Ukiumut missingersuusiorfiusumut 2005-imut Ilassutitut isumaqatigiissummi” 28. oktober 2004-meersumi illuatungeriit isumaqatigiipput ukiuni 2005-2009-mi atuinikinnerunissamut takussutissiami naatsorsorneqartut naapertorlugit ataatsimoortumik tapiissutit iluarsiivigineqassasut. Takussutissiaq taanna ilassutitut isumaqatigiissummi ilanngussaq 3-mi takuneqarsinnaavoq.

Ilassutitut isumaqatigiissummi ilanngussaq 3 naapertorlugu kommunit aningaasartuutikinnerussutaat 2005-imi 5.260.353 kr.-init 2006-imi 3.464.356 kr.-inut nikipput. Assigiinngissut kommunit 2005-imit 2006-imut aningaasartuutaasa qaffassutissaattut naatsorsuutinut naapertuupput. Assigiinngissutsit 1.796.000 kr.

Tamanna tunngavigalugu illuatungeriit isumaqatigiipput ataatsimoortumik tapiissutit 2006-imi 1.796.000 kr.-inik amerlineqassasut.

16. TELE-p ilinniartitaanermut internetikkut quppersagaani ATTAT-mi akitsuutinik qaffaanera
TELE ilinniartitaanermut internetikkut quppersakkamik atuisunut akitsuummik qaffaanissani ilimasaarutigaa, taakkunanit atuisut akitsuutaannut meeqqat atuarfiisa akiligassaat 2005-imut Aningaasanut inatsimmi 1.102.800 kr.-iullutik. TELE meeqqat atuarfiata atuineranut akitsuutip 2006-imit 2.224.000 kr.-it missaannut qaffannissaa ilimasaarutigaa.

Tamanna tunngavigalugu illuatungeriit isumaatigiipput ataatsimoortumik tapiissutit 2006-imit 2.224.000 kr.-inik ilaneqassasut, meeqqat atuarfiisa TELE-p ilinniartitaanermut internetikkut quppersagaanik ATTAT-mik atuinermut akitsuutip qaffannissaanut ilimasaarutaanut atuinerunermut taarsiissutissat.

17. Sulinermik nakkutilliisoqarfiup malittarisassiai sukannernerusut
Danskit folketingiata 2005-ip ingerlanerani sulinermi avatangiisinut tunngasunut inatsit akueraa, Kalaallit Nunaannut 1. januar 2007-mit inatsisitut atuuttussanngortussaq.

Kanukoka tassunga atatillugu ilisimatitsivoq Sisimiut kommunianni sulinermi avatangiisinut tun-ngasuni suliniutinik ingerlatsisoqartoq.

Illuatungeriit isumaqatigiissutigaat oqaluuserisassaq ukiup tulliani ataatsimoortumik tapiissutit pillugit isumaqatigiinniarnissamut sammeqqinneqassasoq, tassungalu atatillugu Sisimiut kommunianni misilittakkatigut tunngavigineqartut atorniarneqassasut.

18. Uersagaqarnersiutinit A-nit akiligassaqarfiit
Ukiumut missingersuusiorfiusumut 2002-mut ataatsimoortumik tapiissutit pillugit isumaqatigiissummi uersagaqarnersiutinit A-nit akiligassat kommunini ajornartorsiutigineqaleraluttuinnarnerat illuatungeriinnit isumaqataaffigineqarpoq.

Illuatungeriit isumaqatigiipput ajornartorsiut siammasinnerusumik isiniarneqassasoq, tassungalu atatillugu isumaqatigiillutik suleqatigiissitaliortoqassasoq, pisortanut akiligassat isumakkeerneqarnissaannut assigiiaarnerusunik malittarisassiornissamut siunnersuusiorsinnaasumik, tassunga ilanngullugit uersagaqarnersiutinut tunngasuni akiligassaqarfinnut.

19. Atuarfinnik iluarsaaneq sanaartorlu
Illuatungeriit isumaqatigiipput pingaartuusoq atuarfiit allanngortiterneqassasut allilerneqassasullu Atuarfitsialiammi atuartitseriaatsinik tunngavigineqartunik ingerlatsinissamut atuartullu maanna amerlassusiannut inissaqartitsinissamut periarfissillugit.

Illuatungeriittaaq isumaqatigiissutigaat atuarfiit illutaasa aserfallatsaalineqarnissaat salliutinneqassasoq aserfallatsinnginnissaat pillugu. Taamaattumik illuatungeriit kaammattuutigaat kommunit ukiumoortumik illutat kvadratmeterimut ataatsimut nalingisa 1,5 – 2%-iannut immikkoortitsisassasut ingerlaavartumik aserfallatsaaliinermut atugassanik.

20. Pissutsit allat
Namminersornerullutik Oqartussat kommunillu akornanni ataatsimoortumik tapiissutit pillugit isumaqatigiissut una oqartussaasut akuersisussaatitaasut akuersinnissaat naatsorsuutigalugu atsiorneqarpoq.

Ilulissat, ulloq 7. juni 2005.