Kap. 2 Ukiup 2006-p missingersuusiornissaata piareersarnera

Missingersuusiornissamut ilitsersuut una imaqarpoq siusinnerusukkut missingersuusiornermut ilitsersuutitut nassiussimasanut ilassutinik, ilassutit tunngaveqarlutik ukiumut 2006-mut ataatsimoortumik tapiissuteqarnissamik isumaqatigiissummik.

2.2.1 Ataatsimoortumik tapiissutit

Namminersornerusut aammalu KANUKOKA-p ataatsimoortumik tapiissuteqarnissamik isumaqatigiinniarnerat naammassivoq 7.juni 2005. Isumaqatigiinniarnerup inaarneralugu ataatsimoortumik tapiissutit appariarnerat 2,63%-mik 775,4 mio.kr.-nut.

Ataatsimoortumik tapiissutit agguataarnerat

Kommunikkuutaartumik ataatsimoortumik tapiissutit agguataarnerat takussutissiami uani takuneqarsinnaavoq:

Takussutissiaq 1: Ataatsimoortumik tapiissutit kommuninut agguarnerat (1000 kr.)

	Tun-ngavi-usumik	Aaqqissuussinermut tapit	Kuuffiit nutarterneri	Isumaginnermut ataatsimoortumik tapit	Meeqqat atuarfiinut	Allanut	Katillugit
Nanortalik	3.500	990	829	9.021	18.623	4.959	37.922
Qaqortoq	3.500	84	1.459	12.240	19.806	7.096	44.185
Narsaq	3.500	1.248	1.550	7.934	11.955	4.335	30.522
Ivittuut	1.000	40	0	414	586	365	2.405
Paamiut	2.500	1.601	1.003	7.483	11.366	4.063	28.016
Nuuk	500	-4.100	5.748	46.911	76.538	30.877	156.474
Maniitsoq	3.500	1.527	760	13.371	25.451	7.448	52.057
Sisimiut	3.500	-1.719	1.944	20.984	38.612	12.682	76.003
Kangaatsiaq	2.500	943	0	5.728	16.032	3.072	28.275
Aasiaat	3.500	723	1.266	12.288	17.906	6.871	42.554
Qasigiannguit	2.500	1.793	359	5.537	8.473	2.923	21.585
Ilulissat	3.500	-592	1.223	18.077	30.925	10.390	63.523
Qeqertarsuaq	2.500	269	246	3.897	6.256	2.142	15.310
Uummannaq	3.500	1.820	294	9.208	23.566	5.215	43.603
Upernavik	3.500	-122	0	11.187	32.221	6.109	52.895
Qaanaaq	1.000	1.032	0	3.064	11.827	1.765	18.688
Ammassalik	3.500	445	319	11.328	26.901	6.292	48.785
Ittoqqortoormiit	1.000	1.075	0	1.771	7.648	1.133	12.627
	48.500	7.057	17.000	200.443	384.692	117.737	775.429

 

 

 

 

 

 

 

 

 

 

 

 

 

 

 

Ataatsimoortumik tapiissutit annikilleriarnerannut ilaatigut pissutaavoq kommunit kingumoortumik ammut iluarsiiffigineqarnerat ulloq unnuarlu paaqqinnittarfinni, inuutissarsiutigalugu meeqqanik paarinniffinni aammalu ineqarnermut tapiissutini, kisiannili pingaartumik politikkikkut akuerineqarsimasumik nalinginnaasumik 12,9 mio.kr.-nik sipaaruteqarnermi, ilinniartitaanermut tunngasut qaffassarnissaannut. Itisilerissutit atuar-neqarsinnaapput ataatsimoortumik tapiissutinut isumaqatigiissummi, www.kanukoka.gl.

Aammattaaq suliffissaaleqinerup annertusiartornerata kinguneraa, maannakkut Uummannami aammalu Narsami suliffissaaleqisut Nuna tamakkerlugu suliffissaaleqisut agguaqatigiissinneranit qaffasinnerulernerat, tamatumalu kinguneralugu maannakkut kommunit aqqaneq marluk pissutsit tunngavigalugit 1 mio.kr.-nik tapiiffigineqartalernerat. Tassaasullu Nanortalik, Narsaq, Paamiut, Maniitsoq, Kangaatsiaq, Aasiaat, Qasigiannguit, Uummannaq, Upernavik, Qaanaaq, Ammassalik kiisalu Ittoqqortoormiit.

Ukioq 2005-p ataatsimoortumik tapiissutaani akileraarutit allanngortiternerisa aammalu akit assigiissinnerisa atorunnaarsinneqarnerata kingunerisai ilanngunneqarput. Agguaassinermi naatsorsuinerup ilusilersornera aaqqissuunneqarpoq ataatsimoortumik tapiissutinut sunniuteqarfiusuni, tassa isumaginninnermut tunngasuni, meeqqat atuarfiini aammalu immikkoortuni allani, kisiannili akileraarutinik allanngortiterinerup aammalu akit assigiissinnerisa atorunnaarsinnerisa kingunerisaat iluarsiissutigineqarput aaqqissuussinermut tapiissutini, tassanimi agguaasseriaatsimi naatsorsuinerit pineqartut naammassisinnaammagit.

Ukiup ingerlanerani Aningaasaqarnermut naalakkersuisoqarfiup aammalu KANUKOKA-p naatsorsueriaaseq nutaaq suliariniarpaat, iluarsiissutinik nutaanik naatsorsuinernik naammassinnissinnaasoq, kisiannili ukioq 2006-p agguataarnerani aaqqissuussinermut tapiissutit aallaavigeqqittariaqarsimavagut siorna akileraarutitigut aaqqissueqqinnerup aammalu akit assigiissinnerisa atorunnaarsinnerisa kingunerisaasa naatsorsornerini aammalu ukioq manna nutaamik aaqqissuussinerit naatsorsornerini. Tamanna katillugit inaarutaanut sunniuteqanngilaq, kisiannili immikkoortumi aaqqissuussinermut tapiissutitut taagukkami assigiinngitsut taputartuunneqarput, naatsorsueriaatsip maannakkutut isikkoqarluni allatut naammassisinnaanngisai.

2.2.2 Meeqqanut atuarfiinut tunngatillugu akiliutit assigiinngitsut aammalu allannguutit

Missingersuusiornermut ilitsersuummi siusinnerusukkut nassiunneqarsimasuni meeqqat atuarfiinut tunngatillugu akiliutissatut naatsorsuutigineqarsimasut maannakkut isumaqatigiissutigineqarput aammalu ilanngussami 1-mi takuneqarsinnaallutik.

Ataasiartumik tapiissuteqarnissamut isumaqatigiissummi immikkoortoq 11 tunngavigalugu meeqqat atuarfiisa illutaasa sillimmasserneqarsimanissaat kommuninut tutsinneqartussaavoq ukioq 2006-iit. Siusinnerusukkut kommunit taamaallaat sillimmasigassatut akisussaaffigisimavaat pigisat illumut kikiattugaanngitsut. taamaalilluni ukioq 2006-miit aammattaaq missingersuutinut ilanngunneqassaaq illut sillimmaserneqarnerat.

Ataasiartumik tapiissuteqarnissamut isumaqatigiissummi immikkoortoq 12 tunngavigalugu atuartut inuutissarsiutinik misiliillutik sulinerini sillimmasiinikkut akisussaassuseq ukioq 2006-miit kommuninut nuunneqarpoq. Siusinnerusukkut atuartut inuutissarsiutinik misiliisut sillimmasigaasimapput Namminersornerusunit sulinermi ajoquserneqarnerni inatsisip iluani. Taamaalilluni kommuninut nutaajusumik ukioq 2006-miit missingersuutigineqassaaq atuartut inuutissarsiutinik misiliineranni sillimmasiinermut aningaasartuutit.

Ataasiartumik tapiissuteqarnissamut isumaqatigiissummi immikkoortoq 18 tunngavigalugu atuarfiit ATTAT-mik atuinerminnut akilersuutaat annertuumik qaffaaffigineqassaaq. 2006-mi atorneranut akiliut, ukioq 2005-mut naleqqiullugu, pingasoriaatip missaanik qaffassalluni, taamaattumik ukiup 2006-p missingersuusiornerani immikkut ittumik aningaasartuutinik qaffaaneq eqqaamasariaqarluni. Qaffaanermut matussutissatut kommunit ataasiartumik tapiissutisiaat qaffaaffigineqassapput kr. 2.224.000-nik. Atuarfinni ataasiakkaani kommunilu atuinermut ukioq 2005-mi aamma ukioq 2006-mi akiliutaasa annertussusiat ilanngussaq 2-mi takuneqarsinnaavoq. Ukioq 2006-mi atuinermut akiliut iluarsiiffineqassaaq 1.10.2005-mi atuartuutigisat amerlassusiat tunngavigalugu, kisianni kommuninut ataasiakkaanut iluarsiissutit malunnaateqanngijattussaallutik.