2003-mut 2004-mullu isumaqatigiissummut ilassut

IMAK-imut tunngasuni nutaamik isumaqatigiissuteqarneq
Ukiumut missingersuusiorfiusumut 2003-mut ataatsimoortumik tapiissutit pillugit isumaqatigiissummi allassimavoq: ” IMAK-imut isumaqatigiinniarnerit kommunit aningaasartuuteqarnerulernissaannik kinguneqassappata isumaqatigiissutigineqarpoq aningaasartuutissanut taakkununnga kommuunit aamma matussutissiivigineqartariaqarnerat. Suliffigisartagassat nutaamik isumaqatigiissutigineqarpata immaqa iluarsiissuteqartariaqarnissaq isumaqatigiissutigineqassaaq.”

IMAK-imut tunngasuni isumaqatigiinniarnermi angusat kommuninut aningaasartuutaanerusussat akuerineqarsimammata isumaqatigiissutigineqarpoq aningaasartuutinut taakkununnga kommunit taarsiivigineqassasut.

Meeqqanut inuusuttunullu ulloq unnuarlu paaqqinnittarfiit
2003-mut ataatsimoortumik tapiissutit pillugit isumaqatigiissummi allassimavoq:
”Namminersornerullutik Oqartussat ingerlaavartumik missingersuutit misissuiffigisassagai qaammatikkaartumik aningaasatigut siumut missingersuutit malinnaassutiliorfigisarnerisigut, taakkulu ulloq unnuarlu angerlarsimaffinnut nassiunneqartassallutik nuutinnerallu KANUKOKA-mut ingerlatinneqarluni” kiisalu: ”malersueqqinnerup (malittarinninnerup) takutissappagu atuiniviup aningaasatigut siumut missingersuutinit nikinganerunissaata naatsorsuutigineqartariaqarnera, taava ulloq unnuarlu paaqqinniffinni atuineq aamma / imaluunniit taakkununnga akiliutaasartut iluarsiivigineqassasut appartillugit imaluunniit qullartillugit.”

Ukiup aningaasanut inatsiseqarfiusup 2003-p naanerani meeqqanut inuusuttunullu ulloq unnuarlu paaqqinnittarfinnut tunngasuni 2003-mut katillugit 2.950.000 kr.-inik atuinerunissaq naatsorsuutigineqarpoq.

II. IMAK-imut tunngasuni nutaamik isumaqatigiissuteqarnermut atatillugu immikkoortut aalajangersimasut isumaqatigiinniutigineqartut.

IMAK-imik isumaqatigiissutit kommunini atorfilinnut atugassanngortinneqarnerat
Illuatungeriit isumaqatigiissutigaat kommuninut ataatsimoortumik tapiissutit 2003-mi 6.115.474 kr.-inik amerlineqassasut, taakku ukiumut aningaasanut inatsiseqarfiusumut 2003-mut IMAK-imut tunngasuni kommunini tjenestemanditut aamma isumaqatigiissutit malillugit atorfilinnut atatillugu aningaasarsiat qaffariaataannut (kommunimut akileraarutit ilanngaatigineqareernerisigut) aningaasartuutaanerusunut naapertuupput.

Illuatungeriit isumaqatigiissutigaattaaq kommuninut ataatsimoortumik tapiissutit 2004-mi 15.236.942 kr.-inik amerlineqassasut, taakku ukiumut missingersuusiorfiusumut 2004-mut IMAK-imut tunngasuni kommunini tjenestemanditut aamma isumaqatigiissutit malillugit atorfilinnut atatillugu aningaasarsiat qaffariaataannut (kommunimut akileraarutit ilanngaatigineqareernerisigut) aningaasartuutaanerusunut naapertuupput.

Immikkut atuartitsinermut akigititat
Isumaqatigiissutit sunniutaasa kingunerisaanik annertusisamik immikkut atuartitsinermut aningaasartuutit qaffannerannut aaqqissuussinerugallartussatut kommuninut ataatsimoortumik tapiissutit 2003-mi 433.890 kr.-inik amerlineqassasut illuatungeriit isumaqatigiissutigaat.

Illuatungeriit isumaqatigiissutigaat aamma aaqqissuussinerugallartussatut immikkut atuartitsinermut ilinniartitsisunut ukiumi missingersuusiorfiusumi 2004-mi aningaasarsiarititat 1.736.861 kr.-inik amerlineqassasut. Taamaattumik ukiumi missingersuusiorfiusumi 2004-mi immikkut atuartitsinermut akigititaq ilinniartitsisut skemaanni tiimimut ataatsimut ukiumut 13.330 kr.-init ilinniartitsisut skemaanni tiimimut ataatsimut ukiumut 13.812 kr.-inut annertussineqarpoq, ilinniartitsisut skemaanni tiimit 45 minutsiusut 3.605-it aallaavigalugit naatsorsorneqartoq. Atuartitsinermi tiimimut ataatsimut akigititaq 1. august 2004-mit 460,40 kr.-inut aalajangersarneqassaaq, 3.605 (sap. ak. ilinniartitsisut skemaanni tiimit) x 40 (sap. ak. atuarfiit) x 45 (minutsit) : 60 (minutsit) = 108.150 ukiumut tiimit, aallaavigalugit naatsorsorneqartoq.

Kanukokap piumasaqaatigisimavaa ilinniartitsisut skemaanni tiimimut ataatsimut akigititaq 2003-mi 13.059 kr.-init 13.455 kr.-inut qaffanneqassasoq. Kanukokap piumasaqaatigisimavaattaaq ilinniartitsisut skemaanni tiimimut ataatsimut akigititaq piffissamut 1.1. – 31.7. 2004-mut 13.300 kr.-init 14.140 kr.-inut qaffanneqassasoq, kiisalu tiimimi ataatsimi atuartitsinermut akigititaq piffissamut 1.8. – 31.12. 2004-mut 462,52 kr.-inut aalajangersarneqassasoq.

Annertusisamik immikkut atuartitsinermut akigititap iluarsiissutaata ukiumit missingersuusiorfiusumit 2003-mit isumaqatigiinniutigineqaqqinnissaa Kanukokap piumasarisimavaa, tassa ilinniartitsisut isumaqatigiissutit malillugit atorfeqartut amerliartuinnarnerisa annertusisamik immikkut atuartitsinermi ilinniartitsisut aningaasarsiaannut aningaasartuutit amerliartortimmatigit. Illuatungeriit isumaqatigiissutigaat apeqqut taanna ukiumut missingersuusiorfiusumut 2005-imut ataatsimoortumik tapiissutit isumaqatigiinniutiginissaanni sammineqaqqikkumaartoq.

Tamatuma kingorna ataatsimoortumik tapiissutit tamarmiusut
Ataatsimoortumik tapiissutit pillugit isumaqatigiissummut ”Ukiumut missingersuusiorfiusumut 2003-mut kommuninut ataatsimoortumik tapiissutit”-nut ilassutitut isumaqatigiissummut 20. september 2002-meersumut kiisalu ”Ukiumut missingersuusiorfiusumut 2003-mut ataatsimoortumik tapiissutit pillugit ilassutitut isumaqatigiissut”-mut 21. marts 2003-meersumut ilassutitut isumaqatigiissutip matuma isumaqatigiissutigineqarnerata kingorna ukiumi missingersuusiorfiusumi 2003-mi kommuninut ataatsimoortumik tapiissutit aalajangersarneqarput 736.407.000+6.115.000+434.000 kr.-inut, t.i. katillugit 742.956.000 kr.-it.

”Ukiumut missingersuusiorfiusumut 2004-mut kommuninut ataatsimoortumik tapiissutit”-nut ilassummut 23. juni 2003-meersumut ilassutitut isumaqatigiissutip matuma atsiorneqarnerata kingorna ukiumi missingersuusiorfiusumi 2004-mi kommuninut ataatsimoortumik tapiissutit aalajangersarneqarput 765.128.000+15.237.000 kr.-inut, t.i. katillugit 780.365.000 kr.-inut.

III. Meeqqanut inuusuttunullu paaqqinnittarfinnut atatillugu immikkoortut aalajangersimasut isumaqatigiinniutigineqartussat

Meeqqanut inuusuttunullu ulloq unnuarlu paaqqinnittarfinni pissutsit
Illuatungeriit isumaqatigiissutigaat meeqqanut inuusuttunullu ulloq unnuarlu paaqqinnittarfinnut tunngasuni paasissutissanik paarlaasseqatigiittarneq sukateriffigineqassasoq.

Illuatungeriit isumaqatigiissutigaat Ilaqutariinnermut Pisortaqarfik Namminersornerullutik Oqartussat sinnerlugit missingersuutinik ingerlaavartumik sukannersumik nakkutilliissasoq qammatikkuutaartumik missingersuutinik malittarinninnertalimmik, taanna qaammatit nikinnerisa kingorna sapaatip akunnerisa marluk missaasa kingorna paaqqinnittarfinnut Kanukokamullu oqaaseqarfigisassanngorlugu nassiunneqartassaaq assilinera Aningaasaqarnermut Pisortaqarfimmut ilisimatitsissutineqartassalluni.

Illuatungeriit aamma isumaqatigiissutigaat paaqqinnittarfimmut ataatsimut kisitsisit pingaarnerit, tassaasut: ullut inissiiffiusut, ullut inissiiffiusut amerlanerpaaffiat, sullitat amerlassusiisa nikerarnerat, sulisut amerlassusiat, atuinerup annertussusia kiisalu sullitamut ataatsimut sulisorisat, kvartalikkuutaartumik Kanukokamut nassiunneqartassasut assilinera Aningaasaqarnermut Pisortaqarfimmut ilisimatitsissutigineqartassalluni, taamaalilluni suliassaqarfimmi ineriartorneq ingerlaavartumik Kanukokamit malinnaavigineqarsinnaaniassammat. Kisitsisit pingaarnerit taakku kvartaalikkuutaartumik naatsorsuinerit naammassineriniit sapinngisamik kingusinnerpaamik sap. ak. marluk qaangiunneranni tiguneqareersimasassapput.

Atuinerpiaq missingersuutinit nikingassuteqassasoq naatsorsuutigineqalerpat KANUKOKAp aamma Namminersornerullutik Oqartussat suliniutigissavaat illuatungeriit akornanni pilertortumik oqaluuserinninnissaq, ulloq unnuarlu paaqqinnittarfinni atuineq ammut qummulluunniit iluarsiissuteqarfigineqassanersoq paasiniarlugu. Ulloq unnuarlu paaqqinnittarfinnut tunngasuni missingersuutit inaarutaasumillu naatsorsuutitigut angusat akornanni Nunatta Karsiata naatsorsuutaani nikingassutit naatsorsuutit tamanut saqqummiunneqarnerisa kingorna ukiumut missingersuusiorfimmut tulliuttumi ataatsimoortumik tapiissutit pillugit isumaqatigiinniarnernut ilaatinneqassapput. Missingersuutini nikingassutit ataatsimoortumik tapiissutit imaluunniit atuisunut akigititat ammut qullummulluunniit iluarsiivigineqarnerannik kinguneqarsinnaapput.

Namminersornerullutik Oqartussat piumasaqaatisimavaat meeqqanut inuusuttunullu ulloq unnuarlu paaqqinnittarfinnut tunngasuni ukiumut aningaasanut inatsiseqarfiusumut tamarmut 3 mio. kr.-inik atuinerunermut akigititanut kommunit akileeqquneqassasut. Illuatungeriit isumaqatigiissutigaat apeqqut taanna ukiumut missingersuusiorfiusumut 2005-imut ataatsimoortumik tapiissutit isumaqatigiinniutiginissaanni sammineqaqqikkumaartoq.

IV. Pissutsit allat

Isumaqatigiissutip atsiorneqarnerani
Isumaqatigiissut una atsiorneqarpoq aningaasaliissutinik Inatsisartut akuersissuteqarnissaat aalajangiisuutillugu.

Nuummi, ulloq 11. december 2003