|
Kommunit aallartitaasa 2003-mi ataatsimiinneranni aalajangiunneqarpoq 2004-mi kommuninut ataatsimoortumik akileraarutinit 10 mio. kr.-inik illuartitsisoqassasoq "nikingasoornermi nalimmassaanissamut". Maannalu KANUKOKA-p siulersuisuisa naalakkersuisullu akuersissutigaat piumasaqaatit kommunit "Nikingasoornermi nalimmassaanissamut aningaasaateqarfimmit" aningaasaliiffigineqarsinnaassagunik naammassisariaqagaat. Piumasaqaatit allakkiami Akileraartarnermut Pisortaqarfimmeersumi allattorneqarsimapput. Allakkiaq quppernerup matuma ataani aaneqarsinnaavoq. "Aningaasaateqarfiup" siunertaraa kommunit akileraarutitigut isertitaasa tassanngaannartumik naatsorsuutiginngisamillu ikileriataarnerisigut ajornartoorujussuarsinnaanerit pinaveersimatinnissaat, taamalu kommunit ataasiakkaat aningaasaqarnerminnik "ullunut nutaanut" naleqqussaanissaminnut piffissaqarlutillu periarfissaqarnissaat. Kommunit qaammatit tamaasa Akileraartarnermut Pisortaqarfimmut akiliisarput nunamut tamarmut akileraarutinik kommuninullu ataatsimut akileraarutinik. Akiliutillu taakku siunissami tunngaviussapput "nikingasoornermi nalimmassaanissamut aningaasaateqarfimmit" aningaasaaliffigineqarsinnaanissamut. Nunamut tamarmut akileraarutinik Akileraartarnermut Pisortaqarfimmut akiliinermi uppernarsaatigineqartut saniatigut uppernarsaatissanik allanik nassiussisoqartassanngilaq. Akileraartarnermut Pisortaqarfik KANUKOKA-mik suleqateqarluni qaammatit tamaasa naatsorsuisassaaq paasiniarlugu kommunit ilaat "aningaasaateqarfimmit" aningaasaliiffigisariaqalersimanersut. Tassa qinnuteqartarnissaq piumasarineqanngilaq. "Aningaasaateqarfiup" imai tamarmik 2004-mi atorneqarsimanngippata 2005-imut nuuginnarneqassapput imaluunniit kommuninut akiliutigineqassallutik 2005-imut kommuninut ataatsimut akileraarutinut ilanngullugit. |
