Illuutillit ineqarnermut tapiissutisisinnaanerat

Boligstøttemik illuutillit 2002-mi 1. maajip kingorna ineqarnermut tapiissutisisinnaalissappat? Naamik. Inissiani attartortittakkani ineqarnermut tapiiffigineqartarneq pillugu inatsisartut peqqussutaat nr. 3, 31. maaji 2001-imeersoq naapertorlugu 2002-mi maajip aallaqqaataaniit atuutilersussamik ”kapitali 4” malillugu boligstøttemik illuutillit ineqarnermut tapiiffigineqarsinnaajunnaassapput. Tamanna sukumiinerusumik uani nassuiarneqarpoq.

Inissianik illuliornermi tapiiffigineqartarneq pillugu inatsisartut peqqussutaanni malittarisassat kapitali 5-imiittut imaluunniit 6-imiittut malillugit boligstøttemik illuutillit ineqarnermut tapiissutisinissaminnut siornatigut periarfissaqartitaasimanngillat.

Maanna kapitali 4 malillugu illuutillit akiligassaminnik taarsigassarsiamillu sinnerinik isumakkeerfigineqarsinnaalerput (Inissianik illuliornermi tapiiffigineqartarneq pillugu inatsisartut peqqussutaata allannguutissaanik peqqussut nr. 19, 12. novembari 2001-imeersoq ). Kapitali 5-imi imaluunniit 6-imi malittarisassat naapertorlugit illuutillit peqqussummi nutaami tassani pineqanngillat.

Isumakkeerisinnaanissamik peqqussuteqalernerup kingunerisaanik naalakkersuisut nalunaarusiortussaapput isumakkeerfigineqarnissamik qinnuteqaatit qanoq suliarineqartassanerannik malittarisassiillutik. A/S Inissiaatileqatigiiffik INI qinnuteqaatinik suliarinnittartuussaaq.

Aalajangersakkat nutaat kingunerisaannik kapitali 4 malillugu boligstøttemik illuutillit akiligassaminnik taarsigassarsiamillu sinnerinik isumakkeerfigineqarnissaminnut periarfissaqalerput.

Peqqussut immikkoortunik marlunnik imaqarpoq. Immikkoortumi siullermi taarsiiffiginiarneqarput ilaqutariit piffissami 1. maaji 2000-imiit 30. apriili 2002-mut ineqarnerminnut tapiiffigineqartut taamalu inoqutigiittut kr. 128.000-it inorlugit isertitaqartut. Immikkoortup aappaa siumut sammivoq, tassanilu taarsiiffiginiarneqarput ilaqutariit ukiut marluk ingerlaneranni inoqutigiittut kr. 128.000 inorlugit isertitaqarsimanerminnik uppernarsaasinnaasut.

Illuutillit taarsigassarsiallit 1. maaji 2000-imiit 30. apriili 2002-mut ineqarnermut tapiiffigineqartut isumakkeerfigineqarnissaminnut pisinnaatitaapput, taamaattoqassappalli tamanna qinnutigisariaqassalluni 1. novembari 2002 nallertinnagu. Ineqarnermut tapiiffigineqartarnerup atorunnaarneratigut isumaginninnikkut tamatumunnga taarsiissutissanik allanik periarfissaqanngilaq, tamatumani pineqarmata illut nammineq pigisat.

Illuutillit taarsigassarsiallit taamaallaat ukiumi kingullerpaami ataatsimi ineqarnermut tapiissutisisimasut akiligassaminnik taarsigassarsiamillu sinnerinik isumakkeerfigineqarnissaminnik qinnuteqarsinnaapput uppernarsarsinnaagunikku ukiuni kingullerni marlunni akissarsiaqarsimallutik akileraaruteqaataasussanik kr. 128.000 inorlugit. Taamaassappat taarsigassarsiallip ineqarnermini aningaasatigut atugarisai ataatsimut isigalugit ilungersunartorujussuusariaqassapput, tassa akiligassanik kinguartoorutinik taarsigassarsiallu sinnerinik akilersuinissamut imaluunniit illup aserfallattaalinissaa nutarternissaaluunniit eqqarsaatigalugu ileqqaagaqarnissamut periarfissaqarani. Tamatumani eqqarsaatigineqassapput qinnuteqartup nalilinnik qanoq peqartiginera, qanoq inuussutissarsiorsinnaatigiumaarnera aammalu illup qanoq pisoqaatiginera tunineqassagunilu qanoq naleqartigisinnaanera. Isertitanut killissarititaq meeqqamut ataatsimut kr. 4.000-inik qaffanneqassaaq, amerlanerpaamilli meeqqanut arfinilinnut.

Inatsisartut peqqussutaat nr. 19, 12. novembari 2001-imeersoq, oqaaseqaatitai isumaliutissiissullu takuneqarsinnaapput www.gh.gl –ip inatsisinik paasiniaasarfiani.

Akiliutissat akiligassanngortut taarsigassarsiallu amiakkuisa isumakkeerneqarnissaannik qinnuteqaatinik aqutsineq pillugu Namminersornerullutik Oqartussat nalunaarutaat nr. 10, 18. april 2002-meersoq