Kommunalbestyrelsit ataatsimiinneri tamanut ammasuupput, ataatsimiititalialli ataatsimiinneri tamanut ammasuunngillat. Aqutsinissamut inatsimmi periarfissiisoqanngilaq ataatsimiititaliat ataatsimiittarnerisa ammasuunissaannik ataatsimiititaliat namminneq imaluunniit kommunalbestyrelsip aalajangersinnaaneranut. Aqutsinissamut inatsimmi § 23 imm. 4-imi 5-imilu erseqqippoq ataatsimiititaliat ataatsimiinnerisa matoqqasuunissaat naatsorsuutigineqartoq.

Tamatumunnga ilaatigut pissutaatinneqarpoq ataatsimiititaliat pingaartorsiorpalunnginnerusumik ammanerusumillu oqaloqatigiilluni isumaqatigiinniarfiusinnaanissaat.

Ataatsimiititaliat sulinerisa matoqqasuunerat aammalu kommunip iluani aalajangerniarnermi pissutsit eqqarsaatigalugit kommunalbestyrelsip ataatsimiititaliaasa isumaqatigiinniarneri nalinginnaq oqaluttuarineqartussaasariaqanngissorineqarput.

Taamaalilluni ataatsimiinnerit nalaanni ataatsimeeqataasut allat isumaat, naliliineri tunngavilersuutaallu pillugit paasissutissat nipangiunneqartussaatinneqarput. Soorunami ataatsimiititaliami ilaasortap nammineq qanoq oqarsimanini qanorlu siunnersuuteqarsimanini piumasaminik oqaluttuarisinnaavai.

Nipangiussisussaatitaanermi pineqanngillat pissutsit qanoq innerinik paasissutissat nalinginnaasut suliassamut tunngasut – tamakkua ataatsimiititaliap ataatsimiinnerani siulittaasumit, ilaasortanit allanit imaluunniit atorfilinnit saqqummiunneqarsimanerat apeqqutaatinnagu.

Ilaasortat qassit ataatsimiititaliap suliassamik aalajangersimasumik suliaqarnerani peqataasimanerat aammalu ilaasortat kikkut isumaqataallutik akerliullutilluunniit taasisimanerat nipangiuttariaqartutut isigineqanngillat. Aamma ilaasortat ilaasa allatut isummersimanerat aalajangikkanik allattuiffimmut allanneqartoq nipangiuttariaqartutut isigineqartussaanngilaq.