Qinikkatut pisortanillu toqqakkatut suliaqarnermi akissarsianik ilanngaanneqartarnermut malittarisassat allassimapput Namminersornerullutik Oqartussat qinikkatut pisortanillu toqqakkatut suliaqarneq pillugu nalunaarutaanni nr. 5-imi 15. marsi 1994-imeersumi, nalunaarutikkut nr. 14-ikkut 18. juuli 1996-imeersukkut allanngortinneqartumi. Tamatumani ilaatigut pineqarput kommunalbestyrelsimi nunaqarfimmilu aqutsisuni ilaasortatut aammalu kommunalbestyrelsit nunaqarfinnilu aqutsisut ataatsimiititaliaanni ilaasortatut suliaqarnerit.
Malittarisassat taakku atuupput tjenestemandinut allanullu (pisortani) atorfeqartunut, taakkua isumaqatigiissutaanni tjenestemandit sulinngiffeqartarnerinut malittarisassat atuuttut innersuussutigineqarpata.
Nalunaarummi § 5-imi allassimavoq qinikkatut toqqakkatullu suliaq akissarsissutaappat akissarsiat ilanngarlugit sulinngiffeqartoqartassasoq. Tassalu kommunalbestyrelsimut ilaasortaaneq akissarsissutaasarmat tassani suliassat isumaginiarlugit sulinngiffeqartoqaraangat akissarsianik ilanngaassisoqartassaaq.
§ 4 imm. 2 naapertorlugu akissarsiat ilanngaaffigineqassapput sulinngiffeqarnerup nalaani ullormi suliffimmi ataatsimi nal. ak. sisamat tikillugit qaammammut akissarsiat 1/60-iata ullormilu suliffimmi nal. ak. sisamat qaangerlugit qaammammut akissarsiat 1/30-iata nalingannik.
Akissarsiatigut ilanngaassissutit qaammatit tamaasa amerlanerpaamik qaammammut aningaasarsiat ataatsimiinnersiutilluunniit qinikkatut suliaqarnermut atatillugu tunniunneqartartut amerlaqatigisinnaavaat. Aningaasat sinneruttut qaammammut tullermut nuunneqassapput. Ukiup sulinngiffissanik katersuiffiusup ingerlanerani akissarsiatigut ilanngaassissutigineqartut tjenestemandip piffissami tassani aningaasarsiaasa ataatsimiinnersiutisiaasaluunniit sinnersimasinnaanngilaat.
Tassa imaappoq ilaasortaq ukiumut isertitaqartuassaaq minnerpaamik ukiumut aningaasarsiami nalinginnaasut amerlaqataannik. Aningaasarsiai nalinginnaasut ilanngarneqassapput suliani nalinginnaasut ingerlatinngimmagit.
Tjenestemandit qinikkatut suliaqartut sulinngiffeqarsinnaatitaapput qinikkatut suliap isumaginissaanut pisariaqartitsineq naapertorlugu . Nalunaarummi § 3-mi allassimavoq sulinngiffeqarneq ajornanngippat piffissap suliffiup allanngortiterneqarneratigut imaluunniit suliffimmik paarlaasseqatigiinnikkut pissasoq. Imaappoq suliffimmik allanngortiterisoqarsinnaatillugu akissarsiat ilanngaanissaq pisariaqassanngilaq, aammali suliap nalinginnaasup "sumiginnarnissaa" pisariaqanngilaq. Qinikkatut suliap ilaa piffissap suliffiusup nalinginnaasut avataatigut, soorlu weekendini, ingerlanneqarsinnaatillugu akissarsiatigut ilanngaassisoqassanngilaq. Imaakkami: Ullormut ataatsimut akissarsiat ilanngaataat qaammammusiap 1/30-ianut aalajangigaagami, imaanngitsoq soorlu qaammammusiap 1/20-ianut, tassa qaammammut ullut suliffiusut agguaqatigiissillugit amerlassusiannut. Taava qaammat ataaseq (ullut 30-t) sulinngiffeqaraanni qaammammi ilivitsumi akissarsiat ilanngaatigineqassapput. Taamaattumik weekendit naatsorsuutigineqassapput.
