Quppersakkani paasissutissiiviusuni innuttaasut atuarsinnaavaat
- inissianik aningaasalersueriaaseq 10-40-50,
- piginneqatigiilluni inissiat,
- piginneqatigiilluni inissianik aningaasalersuisarneq, aamma
- attartortumiit piginnittumut aaqqissuussineq.
Tusagassiorfinnut nalunaarummi 23. januaari 2006-imeersumi allassimavoq nammineerluni inissialiortitertarnerup annertusinerata nassatarisaanik najoqqutassanik paasissutissiiviusunik tamanut tunngasunik pisariaqartitsineq allisimasoq. Quppersakkat paasissutissiiviusut sisamaasut tulleriiaaraluni ilitsersuutitut suliaapput, taakkunanilu apeqqutit nalinginnaanerpaat akiniarneqarput, taamatullu arlalinnik assersuutitaqarlutik.
Naalakkersuisunut ilaasortaq Jørgen Wæver Johansen oqarpoq: "Namminersornerullutik Oqartussat ineqarnermi neqeroorutaasartut assigiinngitsorpassuit atuutilereersut pillugit innuttaasut pitsaanerpaamik paasissutissinneqartarnissaat qulakkeertariaqarpaat. Quppersakkat paasissutissiiviusut sisamat saqqummersinneqarnerisigut sapinngisamik amerlanerpaat namminneq initaarniarlutik aaqqissuussinernik ataasiakkaanik atorusutaminnik ilisimasaqarnerulernissaat pillugu anguniagara anguara. Qinnuteqaateqartarnerup ingerlasarnera, kiisalu piumasaqaatit suut qinnuteqartumut piumasarineqartarnersut pillugit ilisimasaqarluarneq innuttaasup initaarniarnissaminik aallartitsinermini toqqissisimanerulerneranik nassataqartussaavoq."
Una tooruk quppersakkat pisortaqarfiup bibliotekianiittut piumallugit