Digitalimik ingerlatsinissamut pilersaarut nutaaq

Una tooruk isumasioqatigiinnermi assilisanik takujumaguit

Suleqatigiissitanut suliassiissut

Borgmesterit kommunaldirektørillu kiisalu Namminersornerullutik Oqartussat sinniisaasa peqataaffigisaannik Kangerlussuarmi ulluni 14. – 15. februaari 2003 isumasioqatigiinnermi isumaqatigiissutigineqarpoq suleqatigiissitaliortoqassasoq tallimanik ilaasortalimmik:

1. Siulittaasoq (KANUKOKA-mit, Martha Labansen)
2. Kommunit qinigaat (Nuummit)
3. Kommunit qinigaat (Ilulissanit)
4. Kommunit qinigaat (Nanortalimmit)
5. IT-mik immikkut ilisimasalik taakkununnga attuumassuteqanngitsoq KANUKOKA-mit toqqagaq (Danmarkimi kommunit kattuffiat KL saaffigineqassaaq).

Suleqatigiissitat pilersinneqarput immikkut ittunik ataatsimiititaliortarneq pillugu kommuneqarfiit kattuffiata malittarisassaani § 10-mi aalajangersakkat naapertorlugit pisinnaatitaaffilerlugit, tassa siulersuisut sinnerlugit misissuinissaannut kattuffillu sinnerlugu siulersuisut aalajangigassaannik inassuteqaasiornissaannut. Suleqatigiissitat taakkua sulinerannut maleruagassat siulersuisunit aalajangersarneqassapput, aallaaveqassallutilli isummanik oqaaseqaatinillu isumasioqatigiinnermit pisunik makkuninnga:

Isumasioqatigiissitsinermi siunertat pingaarnersaraat siunissami kommunini digitalimik ingerlatsinissamut kommuninut tamanut ataatsimoortumik tunngaviliiniarnissaq. Pilersaarummut taaguutigineqarpoq “Kalaallit Nunaanni digitalimik nutaamik ingerlatsilernissaq” – digitalimik ingerlatsinerup isumaanik nassuiaat aallaavigalugu, tassa “…attaveqaqatigiinnikkut teknologiip atorneratigut ingerlatsinermi suliassanik pitsaanerusumik kingunissaqarluarnerusumillu naammassinnissinnaaneq” (Najoqqutaq: Finansministeriet, “Digital Forvaltning”, maaji 2001).

Isumasioqatiigiinnermi isumaqatigiissutigineqarpoq suleqatigiissitaliortoqassasoq pisortat ingerlatsiviini digitalimik ingerlatsinissamut periarfissanik misissuisussanik, oqaaseqaat una aallaavigalugu:

Kalaallit Nunaanni inuiaqatigiinni digitalimik ingerlatsineq pingaartuuvoq nunap qanoq issusia pissutigalugu. Pisortat allaffissorneranni ingerlatsinermik digitalinngorsaanerup iluaqutissartai inuiaqatigiinnit pisariaqartinneqarput.

Digitalimik ingerlatsilernissamut aqqutissat ukuupput:
- Innuttaasut suliffeqarfiillu atortussaminnik namminneerlutik qarasaasiakkut aallersinnaalernissat
- Ingerlatsiviit akornanni digitalimik suleqatigiissinnaaneq
- Ingerlatsiviit iluini suleriaatsinik digitalinngorsaaneq
Pilersaarut pisortatigoortumik aallartissaaq suleqatigiissitat pilersinneqarneratigut.

Pilersaarummi piffissat uku anguniarneqassapput:
1. 2003-mi suleqatigiissitat digitalimik ingerlatsinerup tunngavissaanik nassuiaateqassapput, tassunga ilaassalluni Kalaallit Nunaanni kommunini aningaasanut aqutsinermut systemip assigiiaarneqarsinnaanera qanorlu aaqqissuunneqarsinnaanera. Aamma pilersaarutip ilagissavaa iliuuserisassat qanoq akeqarumaarnerannik aningaasartuutillu qanoq kommuninut agguataarneqarnissaannik erseqqissumik missiliuusiornissaq. Taakku KANUKOKA aqqutigalugu kommuninut ilaasortaasunut nassiunneqassapput kommunalbestyrelsinit akuerisassanngorlugit.
2. 2004-mi kommune siulleq periarfissaqassaaq aaqqissuussineq atulissallugu.
3. 2005-imi kommune kingulleq periarfissaqassaaq aaqqissuussineq atulissallugu.

Kommunit ilaasortaasut tamarmik pilersaarummi peqataassapput.
Suleqatigiissitat sulinerannut tunngatillugu aningaasartuutinut tamarmiusunut kommunit akileeqataassutissaat naatsorsorneqassapput kommunit inoqassutsimikkut angissusiat aallaavigalugu.

Kanukokap siulittaasuata Jens Lars Fleischerip isumasioqatigiinnermut qaaqqusissutaa, isumasioqatigiinnerup programmia peqataasullu allattorsimaffiat una toorukku atuarsinnaavatit