|
Nuuk, 06.01.2003
“Kalaallit Nunaanni digitalimik nutaamik ingerlatsilernissaq” pillugu suleqatigiinnissamut qaaqqusissut
Ukiuni kingulliunerusuni marlussunni Kalaallit Nunaanni pisortat ingerlatsinerannik suliaqartut akornanni apeqqut saqqummeqqajaajuarsimavoq. Apeqqullu unaasoq: “Kommunini aningaasaqarnermut systemimik nutaamik qaqugu peqalissaagut? “. Apeqqummut tamatumunnga akissuteqarnermi, kattuffimmi siulittaasutut imaattumik oqaaseqaateqarusuppunga. Paasisariaqarparput Kalaallit Nunaata aningaasaqarniarnera ukiuni makkunani pitsaanerpaajunngitsoq. Nunap pingaarnertut inuussutissarsiutigisaa - aalisarneq – ajornartorsiortorujussuuvoq, sunniutaasut amerlanerpaatigut avataaniit pisuusarlutik. Takusinnaavavut suliffissuit matoorartut aalisarnermillu ingerlatsiviit nutaat pisoqqallu isumalluarpallaarunnaanngikkaangamik ilaatigut ingerlatsinerminnik unitsitsiinnartartut. Inuussutissarsiummik aalisarnermut taartaasinnaasumik peqartigata, Kalaallit Nunaanni tamatta siunnerfigisariaqarparput iliuutsit tamarmik eqqarsaatigilluaqqaarneqartariaqartut. Pisortallu ingerlatsineranni inatsisartut, kommunalbestyrelsit taakkualu pisortatut sulisorisaat piffissamik ajornakusooqisumik ornitaqarput, akisussaassuseqarnermut ulluinnarni nunami innuttaasunik sulissinermi aaqqissuussisarnermi piginnaasaqarnermillu piumasaqaatit siusinnerusumiit annertunerulerfissarisaannik. Ullumikkut kommunit ataasiakkaat aningaasaqarnikkut ajornartorsiornertik pissutigalugu ikioqqusarnerat aviisini atuassallugu ullutsinnut naleqqutinngilaq. Aningaasalerinermi qarasaasiatigut atortunik naleqquttunik ivertitsinikkut aningaasatigut atukkat ataavartumik malinnaaffigineqarsinnaasariaqarmata. Tamakkua eqqarsaatigalugit pingaaruteqarluinnarpoq apeqqutip saqqummertuartup immaqa allatut oqaatigisariaqalernera ajornartorsiutillu allamut tunngatinneqalernissaa. Takorloorpara uagut - pisortatigoortumik ingerlatsisuusugut - taarsiullugu immitsinnut aperisariaqalersugut: “Qanoq iliornikkut pisortatigoortumik ingerlatsinitsinni pisinnaanngorsassaagut nunatta aningaasaqarniarnerata ingerlaasianik allanngortitsinissamut pisariaqartumik?” Apeqqutip tamatuma pisortani ingerlatsinermeersunit amerlanerusunit peqataaffigineqartumik akissuteqarfigineqarnissaa assut soqutiginartippara - pingaartumik tamanna apeqqummut siullermut akissummik aamma imaqartussaammat. KANUKOKA matumuuna allakkiakkut Namminersornerullutik Oqartussat Qitiusumik Allaffeqarfiat kommunillu Kangerlussuarmi ulluni marlunni apeqqummut matuma qulaani taaneqartumut tunngatillugu isumasioqatigiinnissamut 14. – 15. februaari 2003-mi qaaqqusivoq. Isumasioqatigiinnermi makkunatigut isummmernissaq siunertarineqarpoq: 1. Aningaasaqarnerup aqunneqarneranut nalinginnaasumik atugaasumik ilusiliinermik ineriartortitsinerup ingerlanneqarneranut tamatumunngalu atasumik aaqqissuussinermik systemillu pilersitsinissamut akisussaasumik KANUKOKA-p ataani aqutsisussanik pilersitsinissaq. 2. Aqutsisuusussaq tallimanik inuttaqassaaq imatut inuttaligaasumik:
Isumasioqatigiinnissamut pilersaarut kingusinnerpaamik 15. januaari 2002-mi allakkamik matuminnga tigusaqartunut nassiunneqassaaq. Qaaqqusissut manna kommunit 18-it tamarmik borgmesteriinut kommunaldirektøriinullu nassiussuunneqarpoq. Taamatullu Naalakkersuisut Siulittaasuannut, Aningaasaqarnermut Naalakkersuisumut aammalu Namminersornerullutik Oqartussani direktørit qullersaannut. Neriuutigeqaara qaaqqusissummik matuminnga tigusaqartut tamarmik qaaqqusissut ajunngitsumik isumaqarneratulli isigissagaat. Pisortatigoortumillu ingerlatsineq tamarmiusoq sumi inissisimanertik apeqqutaatinnagu suleqatigiissasut ataatsimut una anguniagaralugu: Nunatsinni pisortani ingerlatsineq patajaannerusoq. Neriullunga siunnerfeqartumik isumasioqatigiinnermi 14. – 15. februaari 2003-mi takussalluta.
Inussiarnersumik
KANUKOKA Jens Lars Fleischer |
