|
12. apriili 2002 Kommunini isumaginninnermi pisortat isumasioqatigiinnerannit Isumaginnermut naalakkersuisumut Ole Dorph-imut allakkat ammasut. INNARLUUTILLIT Innarluutilinnik sullissinerup 2003-mi kommuninit akisussaaffigilernissaa Namminersornerullutik Oqartussanit pilersaarutaavoq – tamanna pitinnagu sinerissami Isumaginninnermut Ataatsimiititat isumaginninnermilu pisortat maannamut misiliinerup qanoq ingerlasimaneranik naliliinissami peqataatinneqarlik. Innarluutilinnik sullissinermi Inatsisartut politikkikkut sunik anguniagaqarpat? Erseqqissumik paasissutissiissutigineqartariaqarpoq Isumaginninnermi Qullersaqarfiup pisussaaffii Kommunillu pisussaaffii suunersut. Akisussaaffiit agguataarneri erseqqissuusariaqarput. Akisussaaffiup tunniunneqarneranut atasumik siunnersuinerit pikkorissaanerit assigisaallu Isumaginninnermi Qullersaqarfiup akisussaaffigiinnassavai piviusunngortittarlugillu. Akisussaaffimmik tunniussinnginnermi aningaasatigut ersarissumik isumaqatigiissuteqarnissaq Namminersornerullutik Oqartussat kommunillu akornanni pisariaqarpoq. Innarluutillip pisariaqartitai aallaavigalugit naapertuuttumik aningaasaliisarnissaq pisariaqarpoq, soorlu: - Kommunini innarluutilinnut angerlarsimaffinnik pilesitsinermi aningaasartuutinut Isumaginninnermi Pisortaqarfimmit tapiissutigineqartartut, ukiut kingulliit 15-it allannguuteqaratik atuuttut, ullutsinnut naapertuuttumik qaffanneqartariaqarput - Ilinniarsimasunik pikkorissunik sulisoqarnissamik kissaatit piviusunngortissagutsigit, sulisunut aningaasartuutit tamakkiisumik akilerneqartariaqarput – kommunimmi ingerlatsinerat Namminersornerullutik Oqartussanit akikinnerunngilaq! - Sullissisut immikkut ilinniarsimasut, soorlu pillorissaasut, tagiartuisartut assigisaallu atorfeqartinneqarnerannut aningaasartuutinut Isumaginninnermi Qullersaqarfiup aningaasaleeqataasarnissaa pisariaqarpoq. Meeqqanut inuusuttunullu innarluutilinnut immikkut ittumik pisariaqartitsisunut angerlarsimaffiit/sungiusarfiit nunatsinni periarfissaajuarlik! |
