|
Nuuk, novembarip 15-iat 2004
Inunnik isumaginninnermi pisortat 17-iusut ilaat 15-it 11.11.2004-miit 15.1.2004-mut Nuummi Umiartortut Angerlarsimaffianni ataatsimiipput. Inunnik isumaginninnermi pisortat isumaqarput Ilaqutariinnermut Pisortaqarfiup nunap immikkoortuani allaffia ingerlatiinnassallugu siunissaqanngitsoq. Aamma isumaqarpugut innarluutilinnik sullissinermi misiliutitut ingerlatat taamaatinneqartariaqartut. Innarluutilit qitiutikkunnaarlugit ileqqaarniarnissap piffissami kingullermi salliutinneqalernera ernumanartutut isigaarput. Misiliilluni ingerlatsinermi ullumikkut kommuninit 17-init arfineq marluk peqataapput, kommunillu suli arlaqarnerusut aaqqissuussinermi peqataajunnaarnissartik isumalioqqutigaat. Siunnersuutigaaput innarluutilinnik sullissinerup siunissami qanoq aaqqivigineqarnissaa ilaqutariinnermut pisortaqarfiup KANUKOKA peqatigalugu nassaariniassagaat. Ulloq unnuarlu paaqqinniffinnut inissitassatut utaqqisut qitiusumik nalunaarsorneqartalernerat iluarisimaarparput. Naatsorsuutigaarput ilaqutariinnermut pisortaqarfiup meeqqat katsorsarneqarnissaminnik pisariaqartitsisut pillugit kommuninut siunnersuisarnini salliutillugu ingerlatissagaa, meeqqat katsorsarneqarnissaminnik pisariaqartitsinerpaat inissinneqarsinnaanngitsutut kommuninut utertinneqartannginniassammata. Ilaqutariit inuussutissarsiutigalugu paarsisinneqartarnerat neqeroorutitut ingerlaannartariaqarsoraarput, taamali aaqqissuussineq massakkutut isikkoqarallartillugu ersernerlutut amerlavallaarput. Pitsaaliuinermi siunnersortinik atuineq maanna naammassillugu nalilersorneqareermat isumaqarpugut pitsaaliuinermi siunnersortinut atugassatut tapiissutit massakkut kommuninut nuuttariaqartut, tassa PAARISA siunnersorteqarnikkut ilisimasanik eqiteriffiulersussaammat. Kalaallit Nunaanni Isumaginninnermi Pisortat Isumaginninnermi pisortat siusinnerusukkut oqaaseqaatigisimasaat - una tooruk |
