|
Naalakkersuisunut ilaasortamut Ole Dorphimut allakkat ammasut Kalaallit Nunaanni Isumaginninnermi Pisortat ukiumoortumik Kangerlussuarmi ataatsimeersuaqqammerput, eqqartorsimasaallu qulequtanngorlugit ukunannga imaqarput:
· Meeqqat Inuusuttuaqqallu, taassuma ataani pinaveersaartitsineq Qulaani ajornartorsiutit taakkartorneqartut suungaluartulluunniit eqqartorneqarneranni, tamatingorluinnaq eqqartuineq inerneqartarpoq Nunatsinni meeqqat inuusuttuaqqallu atungarisaat pillugit eqqartuinerusariaqarneq pisariaqartinneqartoq. Eqqartuisimanermilu inerniliinerup takutippaa isumaginninnerup iluani ajornartorsiutit aaqqinniarlugit inuiaqatigiit tamarmik akisussaaffeqartut, imaanngitsollu kommunit kisimik ajornartorsiutinik iluarsiisariaqartut, iluarsiiniarnermili pisariaqartitsisoqartoq nukiit kattunneqarsinnaasut tamaasa atorlugit ajornartorsiutit imaannaanngitsut qaangerniarnissaani. Meeqqat inuusuttullu pillugit peqqussutissaq, ilaatigut qulequtaralugu ”Meeraq pingaarnerulerli”, eqqartorneqarnera malinnaaffigisimavarput, peqatigiiffilli isumaqanngilaq taanna annertunerusunik pingaaruteqartunillu pitsanngorsaatissanik nassataqassasoq, Namminersornerullutik Oqartussaniik minnerpaamik qulakkeerutigineqanngippat pitsanngorsaatit neqeroorutaasinnaasut pisariaqartinneqartut pilersinneqassasut, taamatuttaarlu sullissisussat ilinniartitaanermik periarfissaat qulakkeerneqanngippata, akissarsiatigut sulisullu atungarisaat pitsanngorsarneqanngippata. Kommuneqarfiit Kattuffiata qanittukkut misissuisimanerata takutippaa, ulloq unnuarlu paaqqinnittarfinnut meeqqat inuusuttuaqqallu angerlarsimaffiup avataanut inissinneqarnissamut utaqqisut 100 pallillugit amerlassuseqartut. Kattuffiullui kommuniniit paasissutissat tunniunneqarsimasut tunngavigalugit missingersuutigaa, taakkununnga pitsanngorsaatissatut neqeroorutaasinnaasut pisariaqartinneqartut 175-200 missaaniittut. Ilisimatitsissutigineqassaaq Namminersornerullutik Oqartussat ulloq unnuarlu paaqqinnittarfiutaat ullumikkut inissanik 170-nik neqerooruteqarmata. Isumaginninnermi Pisortat peqatigiiffiata ernumassutigivaa, ukiuni qaninnerni aggersuni naalakkersuisut tungaaninngaaniit, pitsanngorsaatinik pisariaqartitsineq aalaavigalungu annertusaanikkut qanoq iliuuseqartoqanngippat, taava inuiaqatigiit iluminni aaqqissuussaaneranni annertuumik equnganeq suli annertuseriassaqisoq, maannakkut piaarnerpaamik iluarsiiniutissanik piviusunik tigussaasunillu politikkikkut aalajangiisoqanngippat. Peqatigiiffik isumaqarpoq meeqqat inuusuttut ilaqutariillu atungarisaasa kinguneri imaannaanngitsut tassaasut, ukiorpassuarni nuna tamakkerlugu politikkikkut ersarissumik aalajangersimasumillu siunnerfeqarsimannginneq. Pingaaruteqarpoq nassuerutigissallugu ajornartorsiutit tamakkua pinngorsimasut pinaveersaartinneqarneranni, ineqarniarnikkut, ilinniagaqarnikkut, inuutissarsiornikkut , peqqinnissaqarnikkut, piorsarsimassutikullu iliuusissat politikkikkut qitiusumiit pilersaarusiorneqanerimi pinngitsooratik tunngaviusumik ilanngunneqassammata. Meeqqanik perorsaanermi akisussaanerpaat tassaapput angajoqqaat, meeqqalli atungarisaat pitsanngorsarniassagaanni, pisariaqartinneqarpoq angajoqqaajusut atungarisaat pitsanngorsassallugit, angajoqqaatut akisussaaffik nukittorsarniarlugu, taamaalillutik inuunermi atugarisaminni akisussaaffitsik tamakkiisumik paasilluarniassammassuk. Peqatigiiffik isumaqarpoq meeqqanik isumassuinnginnermi pissutaanerpaaq tassaasoq imigassamik atornerluineq, imigassamillu atornerluineq qaangerniassangutsigu pisariaqartinneqarpoq, katsorsarneqarnissamik neqeroorut innuttaasunut pisariaqartitsisunut tamanut ammasuusariqartoq, aammalu ajornartorsiutaasunut patsisaasunik qaangiiniarnermi inuiaqatigiit tamarmik suleqataasariaqartut. Kissaatiginarpoq ajornartorsiutip annertunerujussuata kinguneri ammanerusumik oqaluuserineqarnissaat, kissaatiginarportaarlu pisortat suliffeqarfiini ammalu suliffeqarfinni namminersortuni tamani, naliginnaasumik imigassamik atuineq suliffeqarfiup iluani piorsarsimassutsip ineriartortinneqarnerani ersarissumik ilaatinneqarluinnassasoq.
Isumaginninnermi Pisortat peqatigiiffiata erseqqissarumavaa, ukiuni arlaqartuni Kanukoka-p aaqqissussaanik aammalu kommunit ataasiakkaarlutik ataatsimeersuartarnerini isumasioqatigiisitsisarnernilu tikkuarneqartuaannartarmat, meeqqat inuusuttut ilaqutariillu atungarisaat pillugit Namminersornerullutik Oqartussat annertunerusumik misissuisitsinissaat pisariaqartoq, Naalakkersuisullu pisussaaffigigaat, taakkununnga katsorsaavinnik neqeroorutaasinnaasunik pilersitsinissartik, malitsigitillugulu sulisunik taakkualu ilinniakkamikkut pisariaqartitaanik nukitsorsaanissaq ingerlaavartinneqassasoq. Isumaginninnermi Pisortat peqatigiiffiata qilanaarivaa, kommunit Namminersornerullutillu Oqartussat akornanni oqaloqatigiinnerit angusaqarfiusut aqqutigalugit, meeqqat inuusuttullu atungarisaat pillugit pinaveersaartitsinermi ineriartortitseqatigiissinnaanissap aqqutsissiuunneqaniissaa, taamalilluni inuiaqatigiit iluminni meeqqanik inuusuttunillu sumiginnaanerat annertusingaluttuinnartoq unitsinniarlugu.
Inussiarnersumik inuulluaqqusilluta Kangerlussuaq, apriilip ulluisa 12-anni 2002. Annertunerusumik paasiniaaffissaq: Isumaginninnermi Pisortaq Magga Fencker, tlf. 94 32 77 |
