|
Meeqqat inuusuttullu ulloq unnuarlu paaqqinnittarfinnut inissinneqarnissaminnut utaqqisut pillugit Kanukokap kommunit arlallit paasiniaavigisimavai. Misissuinermi pineqarput kommunit qulit, taakkulu meeqqanik katillugit 66-inik utaqqisoqarnerarput. Taamaattumik piviusorsiornerussaaq isumaqassalluni Kalaallit Nunaanni kommunini tamani utaqqisut 90-100 missaanniissasut. Kommunini quliusuni isumaqartoqarpoq meeqqat 119-it suli utaqqisut allattorsimaffianniinngikkaluarlutik kingorna utaqqisunut ilannguteriaannaasut. Taavalu kommunit tamaasa eqqarsaatigalugit meeqqat inuusuttullu katillutik 150-it missaanniissapput inuunerminni ima atugarliortigisut angerlarsimaffimmik avataanut inissittariaqalersinnaallutik. Meeqqat inuusuttullu ulloq unnuarlu paaqqinnittarfinnut inissinneqarnissaminnut utaqqisut aammalu taamatut inissittariaqalersinnaasut ukiumikkut ima agguataarsimapput: 6-it inorlugit ukiullit 20%, 6-it 9-llu akornanni ukiullit 27%, 10-it 14-illu akornanni ukiullit 38% kiisalu 15-iniit 17-inut ukiullit 15%. Paarinerlugaaneq pissutaanerpaavoq Angerlarsimaffiup avataanut inissinneqartariaqalertarnermut pissutaasut assigiinngillat. Kanukokallu kommunit qinnuigisimavai pissutaasartut pingaarnersioqqullugit, tassa angerlarsimaffiup avataanut inissinneqarnermut pissutaanerpaat tulleriiaarlugit. Angerlarsimaffiup avataanut inissinneqartarnermut pissutaanerpaavoq paarinerlugaaneq. Taanna 48 procentini pissutaanerpaasutut taaneqarpoq. 13 procentini inuusuttut atornerluisuunerat pissutaanerpaatinneqarpoq. Meeqqat inuusuttullu angerlarsimaffiup avataanut inissinneqartariaqartut 11 procentiini pissutaavoq kinguaassiuutitigut atornerlugaaneq, kiisalu 10 procentiini tarnikkut ajornartorsiutit pissutaallutik. Pissutaanerpaasutut allatut aamma taaneqarput innarluuteqarneq, annersagaasarneq imaluunniit pinerluuteqartarneq. Angerlarsimaffiup avataanut inissinneqartariaqartarnermut pissutaasut pingaarnerit aappaat tassa inuusuttut ikiaroornartumik imigassamillu atornerluinerat. Meeqqat inuusuttullu 25 procentii atornerluinermik ajornartorsiuteqarput pissutaasut pingaarnerit aappaannut inissitamik. Angerlarsimaffiup avataanut inissinneqartut 22 procentii paarinerlugaanermik pissuteqarput pissutaasut pingaarnerit aappaattut. Innarluuteqarneq, tarnikkut ajornartorsiutit meeqqallu pinerlunniartarnerat tamarmik immikkut 10 procentinik nalunaarsorneqarsimapput. Pissutaasunik pingaarnersiuinermi pingaarnerit pingajuanni pissutaanerpaasutut inissinneqarpoq ilikkarumaataartuuneq. Aammali meeqqat pinerlunniartarnerat, annersagaasarnerat atornerluisuuneralluunniit tassani taaneqarput. Paaqqinniffiit qanoq ittut Kommunit kattuffiannit aamma kommunit qinnuigineqarsimapput nalileqqullugu paaqqinnittarfiit qanoq ittut meeqqanut inuusuttunullu angerlarsimaffiup avataanut inissinneqartussanut pisariaqartinneqarnersut. Akissutitigut paasinarpoq kommunit pisariaqartitsisut katsorsaanerup tungaatigut arlalinnik qinigassaqarnissaminnik. Meeqqat amerliartuinnartut ima ajornartorsiuteqartigipput perorsaanikkut ingerlatat immikkut ittut, soorlu ”Matu” aamma ”Meeqqat Illuat”, amerlanerusut pisariaqarsorinarlutik. Kommunillu arlallit periarfissatut allatut ujartorpaat perorsaanermik immikkut ilisimasalinnik angajoqqaarsiaqartitsisarnissaq. Kommunilli ikiortariaqarsorisaat tassaaginnanngillat meeqqat angisuunik ajornartorsiutillit. Meeqqat inuusuttullu ilarpassui namminneq ingerlalluarput katsorsartariaqaratillu, angajoqqaatilli ajornartorsiutigaat, soorlu imerpallaarmata. Taamaattumik inuusuttut taama ajornartorsiutillit pisariaqartitsipput soorlu assersuutigalugu kollegianik immikkut ittunik, ilinniakkatik eqqissillutik naammassisinnaaniassagamikkit. Taamattaaq kommunit amigaateqarput ilaqutariinnik katsorsaasarfinnik, soorlu qaammammi ataatsimi qaammatiniluunniit marlunni ataatsimoorlutik inissikkallarfigisinnaasaannik. Tamatuma kingorna ilaqutariit katsorsaasarfimmi sulisut ilaannit malittarineqarsinnaapput aalajangersimasumik oqaloqatigineqartarlutik. |
