Danmarkimut nuunniaruit

Danmarkimut nuunniaruit makku eqqarsaatigeqqaassavatit:

Inissaqarniarneq

Danmarkimi inissarsiortarfiit aqqutigalugit inissarsiorneq, pingaartumik illoqarfinniannerusuni tamatigut sivisuumik utaqqinartarpoq. Ungasinnerusoq eqqarsaatigalugu ikinngutini ilaquttanilu ineqarneq pitsaavallaarneq ajorpoq. Danmarkimut nuutsinnak inissarsiortarfinnut ilaasortanngornissaq pitsaalluinnarpoq. Inissarsiortarfiit amerlanersaat ilannguffigisinnaasatit internetsimi nassaarineqarsinnaapput. Danmarkimi inissarsisimaguit oqartussaasut aqqutigalugit nutsernermi aallaqqaasiutitut akiligassat taarsigassarsiarinissaannut periarfissaqarpoq. Malittarisassat sukkulluunniit atuuttut malillugit inimut tapiiffigineqarsinnaavutit.

Suliffeqarneq ilinniagaqarnerlu

Danmarkimi annertuumik suliffissaaleqineqarpoq. Kalaallit Nunaanni ilinniarsimasat ilaasa Danmarkimi akuerineqarsimannginnerat ilisimassavat. Tamaattumillu nutaamik ilinniaqqinnissat naatsorsuutigissavat, aamma ilinniarsimasavit iluani ukiut arlalissuit sulereersimagaluaruilluunniit. Aamma suliassanut ajornanngitsuararsuarnulluunniit kursusersimanissap, ilinniaqqissimanissap uppernarsaammillu allagartaqarnissap piumasaqaatigineqartarnera ilisimassavat.

Aningaasaqarneq

Kinaluunniit oqartussaasunut tunngatillugu imminut, aappaminut meeqqaminullu 18-it inorlugit ukiulinnut pilersuisinnaanissaminut akisussaavoq. Danmarkimi suliffiit annaasimagukku kattuffimmiillu ullormusiaqarnissannut periarfissaqanngikkuit, ikiuutinik qinnuteqarnissamut periarfissaqarpoq. Ikiuutisisarneq pilersornissamut periarfissat kingullerpaartaraat. Ikiuutinik pisinnaassaguit suliffissarsiuussisarfimmeereersimasariaqarputit. Sulinissamut periarfissatit atorluassavatit. Taamaattumik suliffimmik neqeroorutaasoq nalinginnaasoq naaggaarukku ikiuutinik pisinnaanngilatit. Aamma imminut pilersorsinnaanisssamut atugassanik illit aappalluunniit isertitaqarussi aningaasaateqarussiluunniit ikiuutinik pisinnaanngilasi.
Kalaallit Nunaanni pensionisiaqarsimaguit Danmarkimut nuunninni annaassavat.

Qanga inuusimaneq apeqqutaalluni Danmarkimi aatsaat 65-inik 67-inilluunniit ukioqalernikkut utoqqalinersiuteqalertarput.

Qallunaat malittarisassaat malillugit sioqqutsilluni pensionisiaqarnissamik Danmarkimi kommunerisanni qinnuteqarsinnaavutit. Kisianni malittarisassat nunatsinni malittarisassaninngarnit sukanganerupput.

Danmarkimi sioqqutsillutit pensionisiaqarsinnaanersutit ukiup affaa sinnerlugu misissuineq ingerlasinnaavoq.

Oqaatsit

Qallunaanut inuiannut ilaalernissaq aammalu suliffissarsinissamut oqilisaataanissaa eqqarsaatigalugu qallunaatut paasisinnaanissaq oqalussinnaanissarlu pingaaruteqarpoq. Nunami sumiluunniit nutaami ingerlalluarniaraanni oqaatsit pisinnaanissaat pingaarnerpaajuvoq. Oqaatsit saperukkit oqaatsinik ilinniarnissannut periarfissaqarpoq.

Qallunaat inuiaat Kalaallit Nunaanni nalunngisanninngaanniit allaanerujussuarmik ingerlapput, nunamilu nutaami paasiniaanissaq ajornakusoorsinnaavoq. Danmarkimi Kalaallit Illui sisamaapput. Danmarkimut nuunnissannik pilersaaruteqarninnut atatillugu akissutinik amigaateqaruit apeqqutissaqaruilluunniit kinaassutsit oqaatiginngikkaluarlugu taakkunanngaanniit siunnersortinnissannut periarfissaqarputit.

Kalaallit Illuisa najugaat oqarasuaataasalu normui quppernerup uuma naanerani takusinnaavatit.

Meeqqat

Meeqqanik nooqateqassaguit taakku meeqqerivimmut atuarfimmullu allatsinnissaat eqqaamassavat. Ilaqutariit meerartallit tamarmik meeqqanut tapisisarput. Tamatuma saniatigut kisimiillutik pilersuisuusut meeqqanut tapisianik kommunimut qinnuteqarsinnaapput. Meeqqanut siumoortumik akiliutit Kalaallit Nunaanni kommunimiit pisarukkit akilersuutissamut aalajangersagaq Danmarkimi kommunimut nammineq tunniutissavat.

Meeqqerivinnut atuarfinnulluunniit akisussaassuseqarnissaq angajoqqaanut piumasaqaatigineqartarpoq, tassunga ilanngullugu meeqqavit ulluinnarni atuarfimmi meeqqerivimmiluunniit qanoq ingerlaneranik malinnaaffiginninnissaq, aammalu arlaannik angajoqqaanut meeqqanullu sammisaqartitsinermi peqataasarnissaq.