Nuna tamakkerlugu utoqqarnut politikkiliornissaq peqatigiiffiup Utoqqaat Nipaataa saaffiginninnerata kingorna KANUKOKA-p siulersuisuisa decembari 2005 oqaluuseraat siunnersuullu ilassilluarlugu.

Ukiarmi nuna tamakkerlugu utoqqarnik sullissisut (Utoqqaat illuisa ningiui kiisalu angerlarsimaffinni ikiortit aqutsisui) Sisimiuni isumasioqatigiissinneqarmata sinerissami allassimasumik utoqqarnut politikkeqartutuaq Sisimiut kommuniat politikkiliaannik saqqummiisinneqarpoq. Sisimiut kommuniata utoqqarnut politikkiliaa kommuninit allanit isumassarsiorfissatut piukkunnartuummat kommuni akuersisillugu KANUKOKA-p nittartagaanut ilanngunneqarnissaa isumaqatigiissutigineqarpoq aammalu taamaaliornermi iluatsillugu kommunit utoqqarnut politikkiliornissaannik kaammattorneqassasut.

Isumaginninnermut tunngasuni nuna tamakkerlugu aaqqissuisoqartillugu kommunit kajumissaarneqartarput utoqqarnut, meeqqanut inuusuttunullu kiisalu innarluutilinnut politikkilioqqullugit (kingullermik januaari 2006 Ilaqutariinnermut Pisortaqarfik sinerissami Isumaginninnermi Ataatsimiititat ilaasortaannik atorfilinnillu pikkorissaammata).