Nunaqarfinni aqutsisut siulii tassaapput bygderådit (nunaqarfinni siunnersuisoqatigiit), qanimut oqartussaaqataanermi aaqqissuussinertut 1. januaari 1976-imiit atuutilersut.

1. januaari 1995-imiit taaguut bygderåd "nunaqarfinni aqutsisut"-nik (bygdebestyrelse) taarserneqarpoq. Tamatuma peqatigisaanik nunaqarfimmiut nunaqarfimminni pissutsit pillugit annerusumik oqartussaaffeqalersinnissaannut kommunalbestyrelsit periarfissinneqarput.

2009-p tungaanut nunaqarfinni tamani nunaqarfimmi aqutsisunik qinersisoqartarpoq. Aaqqissuussaanermik iluarsaaqqinnermut atatillugu ukioq taanna nunaqarfinni aqutsisut kattupput nunaqarfiit marlukkaarlugit pingasukkaarlugilluunniit. Nunaqarfiilli annerpaat  imaluunniit allanit avinngarusimasut ataasiakkaat immikkut qinersiviuinnarput.

2005-imi qinersisoqarmat nunaqarfinni aqutsisut 56-iupput 170-inik ilaasortallit. Kattunnerup kingorna ulloq 28. apriili 2009 qinersineqarmat nunaqarfinni aqutsisut 26-upput 106-inik ilaasortallit.

Una tooruk kommunit aqunneqarnerat pillugu inatsit, kapitali 6-imi nunaqarfinni aqutsisut pillugit aalajangersagartalik, aajumallugu (malugiuk inatsimmi taaguut "nunaqarfinni siulersuisut" atorneqarmat)