Pilersaarut imaappoq:

16. aamma 17. aggusti 2009: Upernavik
19. aamma 20. aggusti 2009: Ilulissat
22. aamma 23. aggusti 2009: Aasiaat

KANUKOKA-mit pikkorissaajartortitat tassaassapput Kisea Bruun, isumaginninnermut tunngasutigut siunnersortaanerusoq, aamma Tage Gøttsche, kattuffiup inatsisilerituua.

KANUKOKA-p pikkorissarnermut programmiata qulequtai pingaarnerit tassaapput nunatsinni qinikkat oqartussaaffiisa agguataarneqarnerat, qinikkat allaffimmiullu suliassaasa agguataarnerat kiisalu ingerlatsinermut inatsisit (soorlu pisortani suliassat suliarineqartarnerannut inatsit aamma suliassat suliarineqartarnerat pillugu paasitinneqarsinnaatitaanermik inatsit). Pikkorissarnermut programmi quppernerup matuma ataani aaneqarsinnaavoq.

Pikkorissarnerit siulliit tamakkuninnga aamma imaqartut Kommuneqarfik Sermersuup kissaateqarneratigut ingerlanneqarput Nuummi 14. aamma 15. juuni Tasiilamilu 25. aamma 26. juuni. Nunaqarfinni kommunit allaffiini atorfillit aamma pikkorissaqataapput. Taamani KANUKOKA-mit pikkorissaasuupput Kisea Bruun aamma Svend Møller.

Kommune Kujalleq nammineq aaqqissuussaminik nunaqarfinni aqutsisunut nutaanut upernaaq pikkorissartitsivoq, aammalu Qeqqata Kommunia aggustip naalernerani taamaaliussamaarpoq.

Tasiilami 25. aamma 26. juuni 2009 nunaqarfinni aqutsisut allaffimmiuisalu pikkorissartinneqarnerannit assilisat.