|
Ukiuni makkunani qarasaasiatigut attaveqaqatigiinneq Kalaallit Nunaanni kommunini atugaasorujussuanngorpoq. Tamannami aamma innuttaasunit kissaatigineqarpoq. Kommunit namminneq internetikkut nittartagaqarput, Kanukoka nittartagaqarpoq sulisullu ilarpassuisa ullut tamaasa e-mail internetilu sulinerminni atugaraat. Sulisut piginnaasamikkut ineriartornissaannut aammalu naammassisaqarnerulernissaannut suliaasalu pitsaanerulernissaannut teknikkikkut atortorissaarutit nutaat iluaqutaasinnaapput. Aammali siunertamut naapertuutinngitsumik atorneqarsinnaapput. E-mailimik atuinermut sulisullu Internetimik atuinerannut malittarisassaqarnissaq kommunini arlalinni pisariaqartillugu taaneqartalerpoq – tamatumani soorlu eqqarsaatigineqarluni e-mailikkut allakkanik kikkut atuarsinnaatitaassanersut. Tamatumanili teknikki, allaffissorneq inatsilerinerlu kisimik apeqqutaanngillat – taamatulli aamma apeqqutaavoq qanoq sulisoqarnermut politikkeqarnissaq. Danmarkimi nalunaarsuisarnermut nakkutilliisoqarfik Datatilsynet aalajangiinerni marlunni ilisimatitsisimavoq sulisut e-mailimik internetimillu atuinerat sulisitsisunit nakkutigineqarsinnaasoq. Taamaassappalli sulisut tamanna pillugu siumoortumik ilisimatinneqartussaapput. Aamma paasissutissanik katersineq tamanna sulianut tunngassuteqartunut erseqqissumik taasanut tunngassuteqassaaq. Erseqqissarneqassaaq sulisitsisoq e-mailinik inummut namminermut tunngassuteqartunik atuaqqusaanngimmat, taamaalioruni allakkanik isertuussisinnaatitaanermut aalajangersakkanik unioqqutitsissagami. Sulisut e-mailimik internetimillu atuinerannik nakkutilliineq paasissutissanut allanut oqaatigeqqunngisanut tunngassuteqarmat pisortaqarfiit taamaaliorniarunik Datatilsynet nalunaarfigisussaavaat. |
