Kalaallit Nunaanni Suliffigissaaneq pillugu Siunnersuisoqatigiinnit 30. aggusti 2011 tusagassiorfinnut nalunaarut:
Uippakajaarnermiit ilorrisimaarnermut
Inuit tamarmik stressilersinnaapput, ataatsimoorulluguli akiorniagassaavoq!
Uippakajaarneq, stress, akiorniarneqarsinnaavoq, arlaatigut ajoqutaalersinnagu. Kisiannili suliffeqarfimmi ammasumik eqqartugassaavoq, ataatsimoorulluguli akiorniagassaalluni. Tamanna qarasaasiatigut nittartakkami nutaami Kalaallit Nunaanni suliffigissaaneq pillugu siunnersuisoqatigiit aammalu Danmarkimi Sullivinni Avatangiisit pillugit ilisimasanik katersuiviup saqqummersitaani takuneqarsinnaavoq.
Suliffeqarfinni uippakajaartarneq pillugu sukumiinerusumik paasisaqarusukkuit, una internetimi nittartagaq www.ilorraallak.gl qupperarsinnaavat.
Nittartakkami uippakajaartarnermik ilorrisimaarnissamillu paasissutissat kalaallisuunngortinneqarsimapput. Paasissutissat uanngaannit tigusiffigillattaarneqarsimapput www.frastresstiltrivsel.dk , Danmarkimi Sullivinni Avatangiisit pillugit ilisimasanik katersuiviup 2008‐mili suliarilersimasai.
Paasissutissat pisortat suliffeqarfiutaani sulisunut, nalinginnaasumik sulisunut pisortanullusammisuupput. Allami suliffeqaraluaraani aamma iluaqutiginiarneqarsinnaapput.
Kalaallit Nunaanni suliffigissaaneq pillugu siunnersuisoqatigiit siulittaasuat Ivalo Egede imak oqaaseqarpoq: "Ilisimaqqissaanngilarput nunatsinni sulisut akornanni uippakajaartarneq qanoq atugaatiginersoq, ilisimavarpulli atugaasartoq, taamaattumillu pingaaruteqartoq isiginiassallugu, sivisuumik uippakajaarsimanerup inummut ajoqutaalersinnaanera".
Paasissutissat sukumiinerusut aamma ukunannga pissarsiariniarneqarsinnaapput:
Suliffigissaasut siulittaasuat Ivalo Egede, oqarasuaat 553325/ ive@knr.gl
Sullivinnik Nakkutilliisoqarfimmi kredschef Jesper Labansen, oqarasuaat 342590/ jgl@at.gl
Paasiniaavigineqarsinnaasut allat:
Suliffigissaasut aammalu Sullivinnik Nakkutilliisoqarfiup quppersagaa - www.at.gl
Sullivinni Avatangiisit pillugit ilisimasanik katersuiffik ‐ www.arbejdsmiljoviden.dk
