|
Inatsisip imarisai pingaarnerit ukuupput: Nunami aallaaniarneq piniarnerlu inatsimmi ilaalerput. Suliffigisamik qanoq issusersiuisarneq (Arbejdspladsvurdering, APV) atorneqalissaaq. Neqerooruteqartut akisussaatitaanissaannik malittarisassaqalissaaq, taamaalillutik sullissinissamik neqerooruteqartut sullivimmi avatangiisinut akisussaaqataatinneqalissallutik. Sanatitsisutut akisussaanermut malittarisassat piorsarneqassapput, taamaalilluni sanatitsisup aaqqissuusseqatigiinnermut pisussaaffini allamut tunniussinnaassanagu taamalu nammineq akisussaajunnaarsinnaassanani. Piffissaq angalaffiusoq piffissatut suliffiusutut isigineqassaaq piffissanik qasuersaarfinnik aammalu ulloq unnuarlu sulinngiffeqarnermik iluarsaaqqinneq naapertorlugu. Inuusuttut 18-it inorlugit ukiullit pillugit malittarisassat iluarsineqarput; ilaatigut meeqqat sulisorineqarneranni ukiukinnerpaaffissaat qulinik ukiulinniit 13-inik ukiulinnut qaffanneqarpoq. Ukiukinnerpaaffissaq saneqqunneqarsinnaavoq aallaaniarnermut piniarnermullu tunngatillugu. Suliffeqarnermut ministerip sullivinni avatangiisit pillugit qaammarsaanermut tapiissuteqarsinnaanera inatsimmi nutaami periarfissinneqarpoq. Sullivinni avatangiisit pillugit Siunnersuisoqatigiit ilaasortaat arfinilinniit arfineq-pingasunut amerlineqassapput. Naammagittaalliornissamut periaaseq allanngortinneqassaaq naammagittaalliuutinik aalajangiisarfiit pingasuujunnaarsillugit marluinnanngortillugit. Tamatuma peqatigisaanik inatsit naapertorlugu angerlarsimaffimmi il. il. sanianiluunniit inuussutissarsiutiginagu suliffeqarneq Sullivinnik Nakkutilliisoqarfiup nakkutilliineranut ilaatinneqassanngilaq. Inatsisip nutaap ilaatigut tunuliaqutaraa atorfillit Danmarkimeersut nunatsinneersullu peqatigiillutik nalunaarusiaat 2001-imi aggustimeersoq. Sullivinnik nalilersuinerit suliarineqarneri nalilerneqarnerilu pillugit ilitsersuut - una tooruk |
