Imikoq najukkani mingutsitsiva?

Imaani avatangiisit navianartorsiortinneqanngillat, kisianni illoqarfiit arlallit eqqaanni mingutsitsineq ersiinnartoq unitsinneqartariaqarpoq, misissuilluni suliaq taama inernilerneqarpoq. Nalunaarusiaq imikoornerup pilersaarusiorfigineqarnerani maligassaqqissunik imalik, regneark’imut najoqqutassiartaqarlunilu ilitsersuutitalik, kiisalu teknikikkut aaqqiissutissatut periarfissat nalunaarsorneqarfiat maani aaneqarsinnaapput.

Kalaallit Nunaanni illoqarfinni imikoornerup kinguneranik avatangiisitigut ajornartorsiutit qanoq passunneqarnissaat pillugu 2004-mi misissuisitsineqarpoq Avatangiisinut Pinngortitamullu Pisortaqarfiup, KANUKOKA’p, Ilulissat Kommuneata, Maniitsup Kommuneata Qaqortullu Kommuneata suleqatigiillutik ingerlassaannik. Ingeniørit sulliviutaat siunnersuisarfiusoq COWI suliaq pillugu nalunaarusiorsimavoq.
Nalunaarusiap imarai:

Immikkoortoq 1. Ajornartorsiutip annertussusianik nalunaarsuineq – nalunaarusiaq massakkut nutserlugu ingerlanneqarpoq.

Immikkoortoq 2. Imikoornerup pilersaarusiorfigineranut assersuut, Teknikikkut aaqqiissutaasinnaasut Nalunaarsornerat aamma imikoornerup pilersaarusiorfiginissaanut najoqqutassiaq, imikoorneq pillugu pilersaarusiornermi aalajangersumi regneark’ip atornissaanut ilitsersuutitalik.

Atortussiat tamaasa nalunaarusiat ataasiakkaat titartagartaat ilanngullugit quppernerup matuma naggataani aaneqarsinnaapput.

Misissuilluni suliami pingaarnertut inerniliussat makkuupput :

· Kalaallit Nunaata imartaa angerlarsimaffinnit suliffinnillu imikoornermit massakkutut annertussusilimmit uuttorneqarsinaasumik sunnerneqarneq ajorpoq

· Akerlianilli iterlaat kangerliumaninnguillu sarfaqarpianngitsut imikoornermit sunnertittarput, tassa ilt nungusarmat aamma/imaluunniit metangas’eqalersarluni. Iterlanni kangerliumaninnguanilu angisuumik imikoorfiusuni uumasut naasullu ikilisimasarput peerutivissimasarlutilluunniit, aamma sumiiffinni ataasiakkaani imikoorfimmut qanittumi mingutsitsineq ersiinnartarpoq imaq isorluni allatulluunniit qalipaateqarluni kiisalu pappiaranik, nalequtakunik qisuaqqanik qiviuusartalinnik il.il. eqqagaqarluni.

· Tamanna tunngavigalugu inerniliussatut taaneqarpoq imikoorutip salinneqartarnissaa Kalaallit Nunaata eqqaata imartaani avatangiisinik patsiseqartinneqarsinnaanngitsoq, akerlianilli illoqarfiit qanittuini immami avatangiisit mianerineqarnissaannik, pingaartumik iterlannut kangerliumaninnguanullu sarfaqarpianngitsunut imikumik maqitsisarneq eqqarsaatigalugu.

· Aamma inerniliussatut taaneqarpoq sumi tamani erngup akuisa arrortinneqarneq allanngortinneqarnerluunniit ajortut piiaarneqartarnissaannut atortussanik pilersitsisoqartariaqartoq.

Ataatsimut isigalugit illoqarfiit qanittuini mingutsitsineq ajornartorsiutitut tikkuarneqarpoq. Mingutsitsinikkut kalaallini inuiaqatigiit nunaminni pinngortitamik minguitsutut innarlerneqanngitsutullu nitarsaasserusunnerat akerlilersorneqarpoq. Inuussutissarsiutinik ingerlatallit, pingaartumik inuussutissiornermik takornariartitsinermillu aallussaqartut aamma imartat minguitsuunissaat soqutigilluinnarpaat.
Kalaallit Nunaanni pissutsit immikkukajaaq ittuunerat pissutigalugu misissuilluni suliakkut inassutigineqarpoq Kalaallit Nunaanni saliivissuarnik atortorissaartunik uumassusillit atorlugit ingerlasunik pilersitsisoqassanngitsoq. Saliivissuit taamaattut akisoorujussuupput aamma Kalaallit Nunaanni pilersinnissaat ingerlannissaallu ajornakusoortuullutik. Assersuutigalugu saleereernermi marulluusanngorluni amiakkuusartoq passutissagaanni avatangiisit eqqarsaatigalugit illersorneqarsinnaassumik nungutinniarlugu atortorissaaruterpassuaqarluni pisariaqarpoq.
Akerlianilli imikoornermi imaanut kuutsitsiviusuni ersiinnartumik mingutsitsitsinerup imermik ersiinnartumik pitsaajunnaarsitsisut peerneqarnissaat pissusissamisuussaaq. Aamma immap ilteerulluni marulluusanillunilu mingutsinneqarnerata annikillisinnissaa pisariaqarsinnaavoq.

Kalaallit Nunaanni imikoornikkut pissutsit ataatsimut isigalugit pitsanngortinneqassappata kommunit aningaasanik atortussanillu siunertamut tamatumunnga atugassatut aalajangikkanik naammattunik pissaqarsinnaanissaat, aamma aningaasaliiffigisassat pingaarnersiorneqarnissaasa sumiiffinni pineqartuni pisariaqartitanik nalilersuinikkut pisinnaanissaat tamatumani apeqqutaasorujussuupput. Taamaattumik inassutigineqarpoq:
· Kommunit anartarfiit poortaasa aasarnerinut tankillu anartarfinnik imikumillu kuutsitsiviit imaarneqartarnerinut akiliisitsisarnermi maleruagassat atuutereersut pissuseqataannik eqqakkat kuuffiinut akileeqataassutissanik ukiumoortumik akiliisitsisalernissaannut periarfissaliisoqassasoq.
Illoqarfiit ilaatigut eqqakkanut kuuffilersoriikkat eqqarsaatigalugit isumaqartoqarpoq eqqakkat kuuffiinut akileeqataassutit anartarfiit poortaasa imaarneqartarnerannut akiliutaasartut angeqataat eqqakkanut kuuffiit iluunngarmik ulluinnarni ingerlanneqarnerannut, aserfallatsaaliornerannut allilerneqarnerannullu naammassasut.