Danmarkimi avatangiisinut nakkutilliisoqarfiup Miljøstyrelsep neriorsuutigeqqammerpaa qulaajaanissamik suliaqarnissamut misiligutaasumillu ingerlatsinissamut aningaasatigut tapiissuteqarniarluni. Siunertaavoq kommunit pissutsinik atuuttunik pitsaanerusumik aaqqiiniarnissaasa periarfissinneqarnissaat. COWI ingerlatsisuussaaq Siunnersuisarfiup COWI-ip pilersaarut ingerlatissavaa, 2004-mi aallartinneqassalluni 2005-imilu inaarneqassalluni. COWI-ip oqallisissiaa malillugu pilersaarummut tunngaviuvoq nunatsinni illoqarfinni nunaqarfinnilu erngup igitassap amerlanerpaatigut kangerlunnut kuutsiinnarneqartarnera, salinneqaqqaarani. Tamanna immini avatangiisinut mingutsitsigajunngikkaluarpoq, tassami kangerlunni imaq taarserartorujussuummat. Erngulli taamatut kuutsiinnarneqartarnera avammut kiinnertarnermut ajornartorsiutaalersinnaavoq, nunatta takornariarfissaqqissutut tusaamasaalluarneranut nerisassianillu nioqqutissiortutta tusaamasaalluarnerannut ajoqutaalersinnaagami. Peqqinnissamut navianaataa ajorneruvoq Erngulli eqqagassap peqqinnissamut navianaataa ernumanarneruvoq. Kalaallit Nunaanni illoqarfiit annerit kisimik kloakeqarput. Taamaattumik imeq eqqagassaq "qasertoq", tassa soorlu imeq igaffimmi erruivimmeersoq, uffarfimmeersoq errorsisarfimmeersorlu, kuutsinneqartarpoq illut najugaqarfiit eqqaannut. Isigiuminaaginnarani aamma peqqissaarnerunngilaq peqqissutsimullu navianartorsiortitsisinnaalluni. Ilaatigut erngup eqqagassap qasertup "qernertulluunniit" (tassa anartarfiit erngata) iginneqartarfia sissamiitsillugu tamanna peqqinnissamut navianartorsiortitsisinnaavoq. Kiisalu sullivinni avatangiisit ajornartorsiutitaqarsinnaapput anartarfilerisut anartarfinnik aallertarneranni igitsiartortarnerannilu. Siunnerfik: Aaqqiissutissat teknikkikkut piviusorsiortut Pissutsit tamakkuupput COWI-ip qulaajagassai. Pingaartumik nalilersussavaat erngup eqqarneqarnerani saliinermilu pitsanngorsaanissamik pisariaqartitsinerup annertussusia, aammalu teknikikkut naammassineqarsinnaasumik siunnersuissallutik, qanoq iliornikkut erngup eqqakkap nunatsinni pissutsinut naleqquttumik suliarineqarsinnaaneranik. Siunertaavoq kommunit pissutsinik atuutereersunik pitsanngorsaanissaminnut ajornartorsiutinillu pinngortartunik qanoq iliorlutik pinaveersimatitsisinnaanerannik periarfissinneqarnissaat. Illoqarfiit marluk peqataassapput Siunnersortip pissutsinik qulaajaanissaq misiligummillu ingerlatsinissaq illoqarfinni marlunni suliarissavaa. COWI-ip pilersaarummut oqallisissiaa malillugu suli aalajangerneqanngilaq illoqarfiit marluk taakku suussanersut, tamaattumik KANUKOKA-p kommunit tamatumunnga soqutiginnittut nalunaaqqullugit qinnuigai. Aaamma pilersaarut qanimut malittaralugu aqutsisussanik suleqatigiissitaliortoqassaaq. Suleqatigiissitani peqataatitaqassapput Avatangiisinut Pinngortitamullu Pisortaqarfik, KANUKOKA kommunillu akuusut marluk.