Assersuut: Naqqup iluani kuuffiit imaannik immattoorneq
Inuit allat (isumaqatigiissuteqartut avataanniittut) illuini ajoqusertoqarsimappat eqqakkat kuuffiisa (aammalu kuuffiit kiassarnermut imermillu pilersuinermut atortut allat kommunimit akisussaaffigineqartut) ajutoornerisa kingunerisaannik, pilertortumik nalunaarusiortoqassaaq ajoqusernerup sumik pissuteqarneranik taavalu sillimmasiisarfik kommunip attavigisaa saaffigineqassalluni. Tamanna pisinnaavoq e-mailikkut, telefonikkut telefaxikkullu.
Taava sillimmasiisarfiup aalajangissavaa ajoqusernerup taarsiiffiginissaanut kommune qanoq akisussaatiginersoq. Sillimmasiisarfik (tamatigungajak) erniinnaq akissuteqarallarsinnaasarpoq, illullu ajoquserfiusup inua akissutaagallartoq taanna tunngavigalugu ilisimatinneqarsinnaasarpoq pisimasup qanoq aalajangiiffigineqarsinnaajumaarneranik.
Pingaaruteqarporli kommunip sulisuisalu ajoquserneqartumik aningaasatigut isumaqatigiissuteqartannginnissaat, kisiannili sillimmasiisarfiup aningaasatigut inatsisillu tunngavigalugit aalajangiisussaaneranut innersuussisarnissaat.
Kalaallit Nunaanni kommunit tamarmik akisussaalernissamut sillimmasiisimapput, sillimmasiinermi tassani pineqarlutik sullissineq aammalu – pissutissaqarpat – kommunip sulisuisalu kukkussuteqarsimanerat imaluunniit sumiginnaasimanerat pissutigalugu taarsiivigineqarnissamik piumasaqaatinut matussusiineq. Tamatumani naliliinermi tunngaviusussaavoq taarsiissuteqartarnermut maleruagassaq nalinginnaasoq (culpa). Tassa imaappoq sillimmasiisarfik – akisussaalernissamut sillimmasiineq tunngavigalugu – kommuninik isumaqatigiissuteqarsimavoq taarsiivigineqarnissamik piumasaqaatit pissutissaqaraangata akilertassallugit pissutissaqanngikkaangatalu itigartittassallugit.
Akisussaaffiginninnissamik piumasaqartoqartillugu inatsisitigut pisinnaatitaasut pisussaatitaasullu arlaliusinnaammata pissutsinut assigiinngitsunut tunngatillugu qanoq iliortarnissamik ilitsersuusiornissaq ajornakusoortorujussuuvoq.
Paasisaqarneruniaraanni saaffigineqarsinnaasut:
Jens Romerdahl, KANUKOKA (32 22 80 - 305. e-mail: jero@kanukoka.gl) / Benny Nielsen, Kommuneforsikring (009 45 4082 3646. e-mail: beni@kommuneforsikring.dk).
