Umiarsualiveqarnermut oqartussaanerup suliassartaanik ingerlatsineq

Umiarsualiveqarnermut oqartussaanerup suliassartai atorfilitsigoortuupput ilaatigut makkuullutik:

• Umiarsuit angallannerat isumagissallugu uninngavissanillu innersuussisassalluni
• Umiarsuani isumannaatsuunissaq pillugu umiarsuarnik nakkutilliisoqarfik suleqatigissallugu
• Umiarsuit amuneqarfissaannik innersuussisassalluni kommunini oqartussaasut suleqatigalugit
• Umiarsuit umiarsualivinni atortunik ajoqusiisut allattussallugit
• Umiarsualiviup nunataani torersuunissaq nakkutigissallugu
• Umiarsualivimmut akiliutinik akilersuisitsisassalluni
  

Umiarsualivinni sanaat atortullu Namminersornerullutik Oqartussat pigisaasa aserfallatsaaliorneqarnerat IAPP-imit isumagineqassaaq, atortullu qanoq innerat umiarsualiveqarnermut oqartussaanermik ingerlatsisunit atuisunillu allanit, soorlu umiarsuaateqarfinnit kommuninillu, IAPP-imut ilisimatitsissutigineqartassaaq.

Umiarsualiveqarnermut oqartussaanerup ingerlanneqarnera pillugu Namminersornerullutik Oqartussat nalunaarutaat nr. 14, 14. maj 2002-meersoq.

Namminersornerullutik Oqartussat umiarsualiveqarfiutaannik sanaartorneq, aserfallatsaaliineq, ingerlatsineq il.il. pillugit Inatsisartut peqqussutaanni nr. 4-mi 29. oktober 1999-imeersumi § 4 tunngavigalugu makku aalajangersarneqarput:

§ 1. Umiarsualiveqarnermut qitiusumik oqartussaaneq Naalakkersuisut ingerlataraat.
Imm. 2. Umiarsualiveqarnermik najukkani ataasiakkaani oqartussaanermi suliassat ingerlanneqarnerat Naalakkersuisut piginnaatitsinerat malillugu pissaaq.
Imm. 3. Umiarsualiveqarnermut qitiusumik oqartussaasut najukkani ataasiakkaani oqartussaanermi suliassanik ingerlatsisunut ilitsersuinissaminnut piginnaatitaapput.

§ 2. Illoqarfiit Nanortallip, Qaqortup, Narsap, Paamiut, Nuup, Maniitsup, Sisimiut, Aasiaat, Qasigiannguit, Ilulissat, Uummannap, Upernaviup Tasiilallu umiarsualiviini umiarsualiveqarnermut oqartussaanermi suliassat Royal Arctic Line A/S-ip ingerlatarai.
Imm. 2. Illoqarfiit Kangaatsiap, Qeqertarsuup, Qaanaap, Ittoqqortoormiillu umiarsualiviini umiarsualiveqarnermut oqartussaanermi suliassat KNI Pilersuisoq A/S-ip ingerlatarai.
Imm. 3. Nunaqarfiit Narsarsuup Kangerlussuullu umiarsualiviini umiarsualiveqarnermut oqartussaanermi suliassat Mittarfeqarfiit ingerlataraat.
Imm. 4. Nunaqarfiit imm. 3-mi taaneqartut eqqaassanngikkaanni nunaqarfinni KNI Pilersuisoq A/S-ip sinniisuutitaqarfiini umiarsualivinni umiarsualiveqarnermut oqartussaanermi suliassat KNI Pilersuisoq A/S-imit aamma ingerlanneqarput.

§ 3. Nalunaarut ulloq 15. maj 2002 atuutilerpoq.

Namminersornerullutik Oqartussat, ulloq 14. maj 2002