Katersugaasiviup pisortaataa Rie Oldeburgip kulturikkut aalajangersunillu ingerlassaqarnikkut illuut A-21 ilisaritippaa:
Narsap kommuneata kulturikkut aalajangersunillu ingerlassaqarnikkut illuutitaava A-21 Inuiattut ullorsiorfimmi juunip 21-anni innaallagissiorfiusimasumi ammarpaa. "A-21"-mik taagorparput, tassuuna ersersikkusukkatsigu UKIUT 2100-SSAANNI INERIARTORNEQ PILLUGU OQALUUSERISASSAQ, "Agenda 21", tamaani sammisarigipput. Tamanna nunat tamalaat pilersaarusiaraat – Kalaallit Nunaata ilannguffigisimasaa – inuunerput avatangiisivut – eqqatsinniittut inoqativullu - mianeralugit qanoq aaqqissuutissaneripput. Aamma innuttaasut peqqissuunissaannik Naalakkersuisut suliniutaat A-21-mi ingerlallugu innuttaasut ataasiakkaat nakussassarniarpavut inuillu pitsaanerusumik inuuneqarnissamik pisariaqartitsisut tamatumunnga ikiussallutigik neriuutigaarput.
A-21 tassaavooq Narsap kulturikkut sulllivittullu illutaava .
Illu tassaavoq illutoqaq eriagisassaq, illoqarfiup innaallagissiorfeqqaava, taamaalilluni uummarteqqinneqartorlusooq. Illu akikitsunnguamik Pilersuisumit pisiarineqarpoq taavalu Pinaveersaartitsinermi Siunnersuisumut Katersugaasiviullu Pisortaanut tunniunneqarluni.
A-21-p piujuaannartitsisumik ineriartortitsinikkut Narsaq maligassiuisunngortissavaa, pinaveersaartitsinikkut suliniarneq peqqinnerulersaanikkullu sulineq siuarsarlugit, kiisalu illoqarfimmiut takornariallu pisariaqarteqisaannik katersuuffissaqartilerlugit cafélimmik, atuartarfilimmik internet’imullu attaveqartarfilimmik. Tamanna peqatigalugu kulturikkut ingerlaatsimut tunngasumik saqqummersitsinikkut saqqummersitseriaatsinik misilittaasussaavugut, aamma siunissami immikkut ittunik saqqummer sitsisarnissat kusanartunik inissaqartilissallugit.
Pinaveersaartitsinikkut peqqinnerulersaanikkullu sulinermi suliivissatsinnik ukiorpassuarni amigaateqarsimavugut, taamaammat A-21 atorluartassaqaarput. Aamma Pinaveersaartitsineq Katersugaasivillu qanittumik suleqatigalugillu ataatsimoorussatsinik suliffeqatigigatsigik assut Narsami tulluusimaarutigaarput.
Illu pilersaaruteqarfigeqaarput kissaateqarfigeqalugulu. Massakkorpiaq illup ilua iluarsartuullugulu aaqqissuupparput. Taamaaliornerput aningaasanik akeqartussaanngilaq, aningaasaateqannginnatta. Akerlianilli arlalipparujussuit maannamut ikiorlutalu tapersersoreerpaatigut, sulinikkut atortussatigullu, ilaatigut Royal Greenland Academy-mit, Narsap Kommuneanit aamma Brugsenimit. Ingerlassat suunersut uani takukkit.
Atoqqiineq tapersersugaraarput – nungullarnikut kusanartuupput – pequtit tamakkuninnga titartaasartut titartagaat qisuilluunniit akisoorsuit pisariaqartinngilavut, atuuffissaminnut naleqqukkunik naammappoq. Maannamut taamaallaat qalipaammik (kaffinillu !) pisivugut, qisuit tamarmik atoqqitaapput, maani sananermeersut imaluunniit katersugaasivimmeersut. Tassa taamatut ingerlassaagut. Annertuunik pisaartariaqaleraangatta aningaasaateqarfinnit tapiissutinik noqqaasarpugut, aammalumi NUNA fonden’imit aamma Namminersornerullutik Oqartussat kulturikkut aningaasaateqarfiannit ikiorneqareerpugut. Kommunalbestyrelsep tapersersorpaatigut, meeqqat ikiuuttarput, aamma maani kommunimit kikkunnit tamanit paasilluarneqartarpugut. Kommuni mikisoq piitsunnguugaluartoq aamma taamaalilluni kulturikkut illuuteqalersinnaavoq !
Ingerlassaq pillugu maani allanik atuagassaqarpoq
Agenda 21 pillugu maani allanik atuagassaqarpoq
Paasissutissat annertunerusut pinaveersaartitsinermi siunnersorti Bolethe Stenskov saaffigalugu pineqarsinnaapput, oqarasuaat 66 17 66/53 11 66 imaluunniit ataani atsiortoq oqarasuaat 49 78 59. Amma piumagaanni borgmester Kiiki P. Isaksen saaffigineqarsinnaavoq, oqarasuaat 66 12 77.
Inussiarnersumik inuulluaqqusillunga
Rie Oldenburg, katersugaasiviup pisortaa.
