Avatangiisinut sammisumik teknikikkut taaguutinut takussutissiaq manna pilersinniakkatut ingerlassap ”Kommunini avatangiisit”, KANUKOKA’p, Kalaallit Nunaanni Kommunit Kattuffiata, ataani ingerlataasup pilersitaraa. Pilersinniakkatut ingerlassaq taaneqartoq Miljøstyrelsep Dancea aqqutigalugu aningaasaliussaanit aningaasalersugaavoq, taassuma siunertaralugu kommunini teknikerit avatangiisinut tunngasutigut ilisimasanik eqiteriveqalersinnissaat.
Pilersinniakkap 2003-mi aallarteqqaarneraniilli malugaarput nutsikkat avatangiisinullu tunngasutigut atortussiat kommunini assigiinngitsuneersut aamma Avatangiisinut Pinngortitamullu Pisortaqarfimmeersut oqaatsit tungaasigut pitsaassutsimikkut assigiinngisitaartorujussuusut. Avatangiisinut tunngasutigut kalaallisut taaguutit ilarpassui nutserneqarnerit tamaasa ”nutaamik nassaareqqinneqartarput”. Qallunaatut taaguut ilaannikkut kalaallisut takisuumik passukkuminaatsorujussuarmik nassuiarlugu nutserneqartarpoq, allaallumi allaatigisap ataatsip iluani assigiinngitsunik arlalinnik nutserneqarsimasinnaasarluni, tamannalu paatsiveerutsitsisarpoq piffissaajaataaqisumillu paatsoortitsisinnaasarluni.
Taamaariarmat tamakkulerisitat Oqaasileriffik 2005-imi upernaakkut attavigaat taavalu teknikip/avatangiisit tungaatigut taaguutinik assigiiaartunik pilersitsinissaq siunertaralugu suleqatigilerlugu. Taaguutinik nalunaarsuinikkut siunnerfiusussatut aalalajangiunneqartut tassaapput avatangiisinut tunngasutigut sumiiffinni ataasiakkaani nunalu tamakkerlugu oqaasissaqartuusut, kiisalu teknikerit taaguutinik tamakkuninnga ulluinnarni atuisuusut.
Taaguusiussanik tigooraavigineqartut tassaapput avatangiisit pillugit peqqussut atuuttoq nalunaarutillu tassunga atasut, avatangiisit pillugit peqqussutissamut nutaamut siunnersuuut 2005-imeersoq, Namminersornerullutik Oqartussat Eqqakkanik passussinissamut Pilersaarusiassaannut 2008-2011 siunnersuut, aamma avatangiisinut tunngatillugit pilersitsiniarluni ingerlassat Dancea aqqutigalugu aningaasaliussanit aningaasaliiffigineqartut arlallit – pilersinniakkatut ingerlassat tamakkua nalunaarsorneqarnerat uani takuneqarsinnaavoq: www.kanukoka.gl/4622
Naqitertitaq una taaguutinik 205-inik imaqarpoq, taakkualu avatangiisit eqqarsaatigalugit teknikimut tunngasut tamakkeqqajanngilaat. Taamaattumik taaguutinut takussutissiaq una saqqummiuteqqaakkatut nutarterneqartuartussatut isigineqarpoq. Taanna suliarineqaleqqaarmalli taaguutinik 200-nik imaqartussatut killiligaavoq, taamaattumillu oqaatsit avatangiisinut tunngatillugu ilaasariaqavissorinarsinnaasut ilarpaalussui ilanngunneqanngillat. Oqaaseq ”Avatangiisit” tamatumani Avatangiisinut Pinngortitamullu Pisortaqarfiup avatangiisinut immikkoortortamut, mingutsitsinerup killilersimaarneqarnissaanut akiorneqarnissaanullu tunngatillugu pisortatigut sulianik ingerlassaqarfiusumut, aamma pinngortitamut immikkoortortamut, pinngortitamik sernissuiniarnermut tunngatillugu pisortatigut sulianik ingerlassaqarfiusumut avinneqarsimanera naapertorlugu isumaqartitaavoq. Tassa imaappoq taaguutit soorlu habitat aamma biodiversitet pinngortitamut tunngassuteqartut ujaraluaraanni nassaarineqarsinnaanngillat.
Naqitertitamik aaqqissuisut tassaapput Cand. Phil. Kitte Vinter-Jensen, KANUKOKA, aamma Cand. Mag Lisathe Møller Kruse, Oqaasileriffik. Cand. Mag. Bolatta Vahl, suliap aallarteqqaarnerani aaqqissuisunut suleqataavoq.
Cand. Phil. Kitte Vinter-Jensenip taaguutit nassuiarneqartussat toqqartugarai qallunaatullu isumasiuutissanut aallarnisaatitut missingersuutit suliaralugit. Taamaaliortoqareermat isumasiuutit tamakkuninnga immikkut ilisimasaqarluartunit uppernarsarneqarput, taaguutillu pineqartumut tunngatillugit eqqortumik, aamma Kalaallit Nunaanni inatsisinut naapertuuttumik isumasiorneqarsimaneri qulakkeerneqarlutik. Taassuma aamma pilersinniakkamik aaqqissuisuusut aqutarai taavalu aamma naqitertinnissaanut nutserneqarnissaanullu aningaasassarsissullugu. Peter Frederik Rosingip taaguutit isumasiuutitaat qallunaatuumiit kalaallisuunngortitarai.
Cand. Mag. Bolatta Vahlip Cand.mag. Lisathe Møller Krusellu taaguutinut takussutissiap nunani assigiinngitsuni taamaattulerisartut akornanni akuerisaasunik periaaseqarluni ingerlanissaa qulakkiigaraat. Taakkua kalaallisut taaguutaareersut nalunaarsorpaat, taavalu kalaallisut taaguutissatut siunnersuusiorlutik periaaserineqartartut taaguutinullu takussutissiortaatsit maleqqissaarlugit, taamalu soorlu assersuutigalugu taaguut isumasiuullu immikkoortilluinnarlugit, aamma taaguutit atoqqiinnarlugit isumasiuutit atornaveersaaqqissaarlugit. Taamaalioreernermi taaguusiutassatut siunnersuutit immikkut ilisimaqqissaartunut kalaallisut oqaasilinnut saqqummiunneqarput, taakkualu tamakku uppernarsaasertarpaat imaluunniit taaguutip eqqoqqissaartumik paasineqarnissaminut pisariaqartumik imaqarnissaa qulakkeerniarlugu taaguusiunneqarsinnaasunik allanik siunnersuuteqartarlutik, taaguutit pioreersut ulluinnarni atuulluartut innimigalugit.
Martha Labansen
Pisortaq
KANUKOKA
Carl Chr. Olsen
Pisortaqarfimmi
Oqaasileriffik
