Nuuk maajip 21-anni 2007
Ukiuni tulleriiaani oqartussaasut tusagassiuutitigut naqitatigullu avatangiisinut tunngasut sammitillugit oqaatsitigut qanoq issusiat nikerartorujussuusimavoq. Kalaallisut taaguuterpassuit avatangiisinut tunngasuusut nutserinermiit nutserinermut “nassaarineqartarsimapput”. Kalaallisut taaguutit takisuumik passukkuminaatsumillu allaaserineqarnerusarput aamma naqitami ataatsimi assigiinngitsunik nutserneqartarsimallutik.
Taamatullu Kalaallit Nunaanni avatangiisinut tunngasunik oqallinnermi eqqaavilerinermullu tunngasut qitiusutut maluginiarneqalernerannut atatillugu isumasiuutit eqqortut pisariaqartinneqaannaratik, kisiannili aamma oqaatsit ataasiakkaat qanoq isumaqarnerisa paasissutissiissutiginissaat sukkasuumik ajornanngitsumillu pisariaqarpoq, soorlu dioxin qanoq isumaqarpa? Sooq avatangiisinut navianartutut isigineqarpa, sutigullu peqqinnissamut ajoqusiisinnaava?
Politikkerit ilisimasassaattut suut pingaaruteqarpat, eqqakkanut tunngasunik imermullu minguttumut tunngasunik suliniutinik annertuunik aningaasartuuteqartunut tunngasunik aalajangissatillutik.
Taamaattumik 2005-imi KANUKOKA-p kommunini avatangiisinut tunngasumik pilersinniakkamik siunnerfilimmik suliaqarnermut tunngatillugu atuakkamik ujarlerfissiassamut tunngatillugu suleqatigiinnissamut aallarniissutissamik Oqaasileriffik attaveqarfigivaa, nutserisut, ingerlatsisut politikkerillu avatangiisinut tunngasunik taaguutinik qupperfigisinnaasassaat, aamma taaguutip imaata eqqortup qallunaatut kalaallisullu isumasiuutaata nassaarinissaanut tunngatillugu.
Oqaatsit tungaatigut pitsaassuseq annerpaaq aalajaallisarniarlugu suliaq Oqaasileriffik suleqatigalugu piviusunngortinneqarsimavoq. Massakkullu inernerilerpaa Avatangiisilerinermi taaguusersuutit assigiissaarneqarsimanerat, pingaarnertut tassaallutik taaguutit eqqaavilerinermut tunngasuusut 205-it isumasiuutitallit Oqaasiliortunillu akuerineqarsimasut.
Sisimiuni aallartitat ataatsimiinnissaanni maajip 22-anni KANUKOKA-p siulittaasuanit Lars Karl Jensenimit ’Avatangiisilerinermi taaguusersuutit’ pisortatigoortumik saqqummiunneqassapput, Katuamilu ikinngutigiit inaanni maajip 23-anni 2007-mi pingasunut malunnartinneqassallutittaaq.
Suliamut tunngatillugu Kitte Vinter-Jensen KANUKOKA aamma Lisathe Møller Kruse Oqaasileriffik attavigineqarsinnaapput.
Martha Labansen Carl Chr. Olsen
Pisortaq Pisortaq
KANUKOKA Oqaasileriffik
Miljøteknisk terminologi -
Avatangiisilerinermi taaguusersuutit
Redaktion: Kitte Vinter-Jensen, cand. phil.
& Lisathe M. Kruse cand. mag.
ISBN 978-87-990324-2-6
56 sider
2000 eks.
Pris: kr. 100
