Inatsisartut peqqussutaat nr. 3, 1997 - siunnersuummut nassuiaatit

1. Nalinginnaasumik oqaaseqaatit.
Imaani avatangiisit illersorneqarnissaat pillugu Inatsisartut peqqussutaat nr. 4, 3. november 1994-imeersoq 1. januar 1995-imi atortuulerpoq, unalu peqqussummik iluarsiineruvoq siulleq.

Imaani avatangiisinut peqqussummut ilassutissatut maannakkut siunnersuutaasumi Naalakkersuisut uumasunik toqoraanerni perlukunik, pisuussutit tamakkua allanut atorneqarnissaannut periarfissaqanngikkaangat, eqqaanissamut akuersissuteqartarnissaannut periarfissinnissaat siunertarineqarpoq.

London-Konventionimut Annex 1 tunngavigalugu perlukunik pinngortitami uumassusilinnit pisunik eqqaasarnissaq ajornartitaanngilaq. Taamaalilluni Danmark isumaqatigiissummik qulaani taaneqartumik atsiuinermini Kalaallit Nunaat pillugu aalajangiigallarnerminik ingerlatsiinnarnissaminut periarfissaqarpoq.

2. Aalajangersakkanut ataasiakkaanut oqaaseqaatit.
§ 19 pillugu:
Aalajangersakkami tassani aalisakkanik aalisakkallu perlukuinik immallu naqqaneersunik qaqitanik, angallatinillu kiversaanissaq kisiisa pinnagit sunilluunniit eqqaanissaq inerteqqutaavoq. Allannguutissamik siunnersuuteqarnikkut Naalakkersuisut aammattaaq perlukunik pinngortitami uumassusilinnit pisunik eqqaanissamik akuersinissamut periarfissinneqarput.

§ 20, imm. 1 pillugu.
Naalakkersuisunit akuersisoqarpat aalisakkanik aalisakkallu perlukuinik eqqaanissamut periarfissat attatiinnarneqarnissaat naleqqutuutinneqarpoq. Tassunga perlukunik pinngortitami uumassusilinnit pisunik eqqaanissamut periarfissaqarnissaa ilassutigineqarpoq. Ilassummut tun-ngaviupput tunisassiat sinnikuinik ajornartorsiutit, nersutinik toqoraavinni akuerisaasuni toqoraanernit saqqummersut. Manna tikillugu periaasiugaluarpoq perlukut pinngortitami uumassusilinneersut nunamut assaanneqartarnerat.

Kalaallit Nunaanni pinngortitami uumassusilinnit pisut sukkaatsuinnarmik asiujartortarnerat pissutaalluni pinngortitami uumassusilinnit pisut sinnikui nunamiittut amerliartuinnarput. Tassunga ilanngunneqarsinnaavoq ukiumi toqoraanernit sinnikut aputip aanneratigut saqqummerartartut ajornartorsiutaanerat, taamaalillutik perlukut teriannianut ussassaarutitut neriniarfittullu ilertarlutik, taamaalillunilu perlerornermik nappaalalernissamut navianaat annerulertarluni.

Toqoraavinnit perlukut pinngortitami uumassusilinnit pisut eqqarnerannut akuersissutip tunniutinngikkallarnerani perlukut nioqqutissianut allanut atorneqarsinnaanerat nalilerneqaqqaartassaaq, uani assersuutigalugu eqqarsaatigineqarput qimminut nerukkaatissatut allatulluunniit imaluunniit nunamut naggorissaatitut atorneqarsinnaanerat.