Imaqarnersiorlugu:
Illumit sanilerisamit imermik igitassamik eqqaanerup ajoqutaanera pinngitsoortinniarlugu iluarsiiniarnermut kommunip peqataasimannginnera, kiisalu kommunip suliamik suliarinninnera pillugit maalaaruteqartoqarpoq.
Aalajangiinermi Avatangiisit pillugit Maalaaruteqartarfik pissutissaqarsoraaq inatsisitigut tunngavigisat pillugit ilaatigut makkua uparuaatigissallugit:
- kommuni inatsisinik tunngaveqarnermini ersernerluttumik amigaateqartumillu ingerlatsisimasoq.
- DMN-ip avatangiisit pillugit peqqussummi tunngavissaq imermik errortuutikumik imikoornermik killilersuissutaasussamik nalunaarusiornissamut atortariaqaraa.
- imermik errortuutikumut tunngasumik malittarisassaqartitsinermi inatsisitigut tungavissatuaammat avatangiisit pillugit peqqussummi § 34, imm. 3, imermik errortuutikumik imikoornissamik killilersuutissamik malittarisassaliornissamut tunngavissatut ersarissuunngitsoq. Tamatuma saniatigut aamma § 34, imm. 2 aamma imm. 3 imminnut naapertuutinngillat. DMN piumasaqaatinik pilersitsiniarluni avatangiisit pillugit peqqussummi qularnaannerusumik tunngavissiissummik pilersitsisariqarpoq, piumasaqaatit illuutilinnut ataasiakkaanut aningaasartuutitaqartussaammata.
- Avatangiisit pillugit peqqussummi suliffeqarfinnik eqqartuinermi ingerlatsinerit suugaluartulluunniit pisortatigoortumik inuinnarnilluunniit ingerlanneqartut tamarmik pineqarput. Tamatumani naatsorsuutigineqarpoq § 34, imm. 3-mi aalajangersarneqartunik piumasaqaatit malinneqanngippata kommuni peqqussuteqarlunilu inerteqquteqarsinnaasoq, takuuk avatangiisit pillugit peqqussummi § 10.
- Avatangiisit pillugit Maalaaruteqartarfiup paasivaa avatangiisit pillugit aamma nunaminertat sanaartornerlu pillugit inatseqartitsinerni killissarititaasunut tungasut ajornartorsiutitaqartut. Imermik igitassamut tunngasumik nalunaajaatinik atuineq avatangiisit pillugit malittarisassanut ilaanngilaq, sanaartornermulli inatsiseqartitsinermut ilaagunarluni. Avatangiisit pillugit Maalaaruteqartarfiup suliap nutaamik kommunimit suliareqqinneqarnissaa innersuussutigaa, kommunili sianigisassanik arlaqartunik suliap suliareqqinneqarnerani naatsorsuutigineqartussanik piumasaqarfigalugu.
- Kommuni imermik misissueqqissaarnermik suliaqassaaq peqqinnissaqarfimmillu nakkutilliisoqarfik peqqinnissamut tunngasut naliliiffigineqarnissaat siunertaralugu peqataatillugu.
- Ukioq tamaat atuuttumik imermut aqqusiinerup imermik igitassaqarnerulerneq kingunerisarpaa.
- Erngup errortuutikup iginneqartarneranut atatillugu kommuni arlaqartutigut erseqqissumik piumasaqaateqassaaq. Iluaqutissat ajoqutaasussallu nalilersorneqassapput, tamatumani aamma eqqaanerup qanoq pissuseqarneranut atatillugu aningaasat tungaasigut oqimaalutaaneq. DMN qitiusumik oqartussaasutut peqataatinneqartariaqarpoq, erngup errortuutikup kuutsinneqarnerani akuerineqarsinnaasumik ajoqutaasunut killissat suuneri ataatsimut isigalugit isummerfigineqartariaqarmata, iluarsiissutaasunut aningaasartuutinut sanilliussilluni.
- Kommunip naliliinermini ilanngutissavaa tunngaviusumik periuseq avatangiisit pillugit peqqussummi § 4, imm. 3-miittoq ima oqaasertalik: mingutsitsinerup killilersimaniarneranut atasumik aningaasartuutit mingutsitsisup nammineq akilissavai.
