Aqerloq katersuuttarpoq tingummi, tartuni, massammi saanernilu. Saanernut akuliutereeraangami ukiut arlallit atorlugit timimit katannialuusaartarpoq. Aqerloq aamma manninni mannissaqarfinnilu katersuuttarpoq. Sianiutitigut nerisallu ingerlaarfiisigut ajoquserneqarneq aqerlumik toqunartoqalersimanermut ersiutaanerpaasarput. Aqerlup aamma akornusertarpai aap aappaluttortai, taamalu aakkut kræfteqalernermik kinguneqarsinnaasarluni. Qaratsamut peroriartortumut ajoqutaasinnaasorujussuuvoq, taamalu meeqqap pissusilersornerinut sunniuteqapilussinnaalluni annikitsuinnarmilluunniit aqerlumik akoqalersimagaanni. Biilit benzinamik aqerlumik akulimmik orsullit pujuisa illoqarfinni mingutsitsiffiusuni ussippallaalertarnerat meeqqat ineriartornerannut sunniuteqapiluttartoq pasitsaasimaneqarpoq. Misissuinerni arlalinni paasineqarpoq meeqqat mingutsitsiffiusuniittut oqalunniarnermikkut, oqaatsinik atuisinnaassutsimikkut eqqarsaatiminnillu katersuisinnaassutsimikkut ajornartorsiuteqalersartut.

Avatangiisinut aqerlumik akoqalersitsisartut:

Benzinamik aqerlumik akulimmik atuineq pissutaanerpaasimavoq nunarsuarmi tamarmi avatangiisit aqerlumik akoqaleriartorsimanerannut, benzinalli aqerlumik akoqanngitsup atugaalerneratigut aammalu akkumulatorit aqerlumik akullit atornikut immikkut katersorneqartalerneratigut mingutsitsineq malunnartumik millisimavoq. Aqerlumik mingutsitsinermik pilersitsisartut inuit pilersitaat allat ilaatigut tassaapput aatsitassarsiorfiit saffiugassanillu suliarinnittarfiit kiisalu aallaasit imassaat eqqakkanillu ikuallaasarnerit. Issittumi aqerlup katersuuffii annikilliartorput.

Inunnut aqerlumik akoqalersitsisartut:

Inuit timimikkut aqerlumik akoqalertarnerat qanorpiaq pisarnersoq ilisimaqqissaarneqanngilaq, aqerlumilli piffigineqarnerusarunarput silaannaq, nerisassat imerlu.

Najoqqutaq:
Issittumi mingutsitsinermik apeqqutit: Issittumi avatangiisit killiffiannik nalunaarut
Linki taanna Danmarkimi Miljøstyrelsep nittartagaanut atavoq.

Arctic Pollution 2002, AMAP, 2002