Innermik millisaassutit brom-ertallit stoffit uumassusilinneersut ataatsimoortut ilagaat pinngoqqaammik brom-imik akullit. Taaguutaasa ersersitaattut ikuallatsaaliuutaasinnaapput, tassalu innermik millisaassutit brom-ertallit soorlu asersuutigalugu angallassissutini, elektronik-ini atortunilu innaallagiartortuni, tamakku kissarujussuartarnerat pissutigalugu ikuallannaveersaatitut, atorneqartarput.
Innermik millisaatit ilaat eqqakkatut/elektronik-ikutut avatangiisinut siammarneqartarput, kisianni soorlu qarasaasiat TV-kkulluunniit isiginnaarutit pigineqarnerini stoffit tamakku ilarujussui atortunit ikumasunit kissartunillu aalannguullutik aniasarput, taavalu inunnit najuussorneqartarlutik.
Silaannarissaasaritsi!
Taamaattumik silaannarissaalluaqqissaartarnissaq inassutigineqassaaq, pingaartumik meeqqat inaanni atorneqartumik qarasaasialimmi meeqqallu siniffigisaani.
Peqqinnissamut navianarpa?
Stoffit ilaat nungutikkuminaatsuupput (persistent-iupput) taamalu inunni avatangiisinilu katersuutiinnarsinnaallutik. Tamakku ilaat pasineqarput kinguaassisinnaassutsimik annikillisitsisinnaasoralugit, aammalu naartut ajoquserneqarnerannut kræft-eqalernermullu pissutaasinnaasoralugit.
Stoffit nalorninarnerpaasut ilaannut taarsiunneqarsinnaasunik ullumikkut peqarpoq, tamakkulu nioqqutissiortunit amerliartuinnartunit atorneqarput. Stoffit nalorninaateqarnerpaat ilaannut marlunnut (penta-BDE aamma octa-BDE) EU-p inerteqqutaa 2004-ip qiteqqunnerani atuutilersussaavoq.
