Tamanna sananeqaatinut assigiinngiiaattunut, tunngaviatigut isigalugu taamaallaat pinngortitami uumasunut naasunullu toqunartuunerminnik assigiissutilinnut ataatsimoortumik taaguutaavoq. Tamatumani eqqarsaatigineqartut tassaagajupput aatsitassat oqimaatsut kattussimasut, aamma kulbrintet klorillit* arlallit (PCB*, DDT* il.il.) toqunartunut avatangiisinut navianartunut ilaasutut isigineqartut. Sananeqaatit tamakku pinngortitami nungutikkuminaatsuupput taamaattumillu uumasut nerisariiaannerisigut* uumasut timaanni katersuuttarlutik. Sananeqaatit ilaat ingerlaannavik toqussutaasinnaapput, allat sivisuatsiamik katersuuteqareersimagaangamik aatsaat sunniuttarlutik. Aamma amerlanertigut imaattarpoq sananeqaatit taamaattut annikitsunnguugaluarlutik sakkortuunik sunniuteqartarlutik.
