|
Ullut tamaasa batteriitortunik atuineq annertoorujussuuvoq, tusartaatiniit pujoralaajaateeqqanut. Juullillu nalaani tunissutit batteriitortut taasassat amerlaqaat – mobiltelefonit, assiliissutit, walkmanit, videoliuutit nalunaaqquttallu tamalaat. Aammami inuusat oqaluttartut, Game Boys, biileeqqat ungasianniit aquttakkat, sakkutuusaarutillu nipiliortut … pinngussat nutaaliat ilarpassui batteriilersugaagamik. Batteriikut tamaasa katersussavavut Imaanngikkaluarpoq batteriit tamarmik navianartuusut. Imaaliinnarluguli takuneqarsinnaaneq ajorpoq sorliit navianartuunersut sorliillu ajoqutaannginnersut. Assersuutigalugit taasariaqarput batteriiaqqat kviksølvitallit eqqaavimmut igiinnarneqarajuttut, mikeqimmata ajoqutaarpasinngimmatalu. Tamakkuli navianarluinnartuupput eqqakkanik navianartunik suliarinnittarfimmut (nunami allamiittumut) nassiuttariaqaraluartut. Tassami kviksølvi toqunartuuvoq sianiutitsinnik ajoqusiisinnaasoq. Qanoq pissavavut? Suliniuteqarnermi anguniagaq siulleq tassaavoq kommunit illoqarfinni nunaqarfinnilu tamani batteriikunik tunniussisarfinnik inissiiortornissaat – karsit, siparnit assigisaalluunniit katersuiffissat tikikkuminartumut inissillugit. Siunertaavorlu katersuiffiit tamakku akuttunngitsumik imaarneqartarnissaat imaasalu immikkoortiterneqartarnissaat. Ilisimasaqarneq pingaaruteqarpoq Igitanik immikkoortiterisartut ilisimasassinneqarnissaat suliniuteqarnermi tassani pingaaruteqartorujussuussaaq. Batteriit navianartut navianannginnerusullu immikkoortitersinnaassagaanni batteriit assigiinngitsut qanoq ittuunerat nalunaaqutsersugaanerallu ilisimasaqarfigisariaqarpoq. Aammami batteriit assigiingitsorpassuupput, nalunaaqutsersorneqartarnerallu nunani tamalaani assigiinnik malittarisassaqartinneqanngilaq. Taamaattumik immikkoortiterineq kommunip eqqakkanik tigooraasarfiani imaluunniit immikkoortiterisarfiani ingerlanneqartariaqarpoq, angerlarsimaffimmi pinnani. Iluamimmi immikkoortiterisinnaassagaanni ilisimasaqartariaqarpoq. Atuisoq imaluunniit ”eqqagassiortoq” Batteriikunik katersuiniarneq Avatangiisinut Pinngortitamullu Pisortaqarfimmit aningaasatigut tapersersorneqartussaq Kanukokap suliniutaani ”Kommunini Avatangiisit”-ni iliuuseriniarneqartut arlallit siullersarissavaat. Tulliullugu iliuuserineqartussaq tassaavoq Nuup Kommuneani eqqagassanik immikkoortitereqqaartarnermik misiliinerup malittareqqinnissaa. Misiliinerup tamatuma inerneri pillugit paasissutissanik siaruarterineq peqataaffiginiarneqarpoq. Eqqagassanik ”immikkoortitereqqaartarnissami” pineqarpoq atuisup imaluunniit ”eqqagassiortup” immikkoortiterisarnissaa. Tassami innuttaasugut paasisariaqaratsigu atuiinnarata aammattaaq eqqagassiortuusugut. |
