Suliffeqarfik Niras Greenland nalunaarusiamik, PDF-fil’inngorlugu quppernerup matuma naqqani aaneqarsinnaasumik suliaqartuuvoq. Siunertaavoq ajornartorsiutit annertussusiat ersersinniarlugu asimi eqqakkat amerlassusaannut, suunerinut sumiinnerinullu ilisimasanik nalunaarsuinissaq. Nalunaarsuinermi pingaartumik ilanngunneqarput illoqarfiit nunaqarfiillu killeqarfiisa avataanni naammassereersunik ingerlatsiviusimasut. Killiffik 1-imi sumiiffiit eqqagassanik qimatsiviusimasinnaasut 630-t suussusersineqarsimapput. Aamma tamakku ilaanni kikkut ingerlatsisuusimanersut paasineqarsimapput.

Kalaallit Nunaanni ingerlatsisuusimasut assigiinngitsut paasissutissaataat pigineqartut katersorlugit nalunaarsuisoqarpoq. Nalunaarsuinermi taamaalilluni pisortaqarfiit, ingerlatseqatigiiffiit, kattuffiit, ilisimatusarfiit il.il. apersorneqarneri taakkulu allaganngorlugit paasissutissaataat katersorlugit tunngavigineqarput. Ingerlassat tassaagajuttarsimapput ilisimatusarnikkut suliat, sakkutooqarnikkut ingerlassat, aatsitassanik ikummatissanillu nassaarniarluni misissueqqissaarnerit, radioqarfiit, ilisimasassarsiornerit il.il. Ingerlassat naammassinerini eqqagassanik asimi qimatsisoqarsimasinnaasarpoq. Eqqakkat tamakku assigiinngisitaartumik kusanaallisaataasinnaasarput aamma/imaluunniit mingutsitsinikkut ajornartorsiutinngorsinnaasarlutik.

Eqqakkat suliami amerlanngitsunut immikkoortitigaapput, tassaallutik nappartat ikummatissamut puukut, motorit, elektronikkit, atortut, qamutit, umiarsuit, timmisartut, sanaartornermi maskinat, illut illuliornermilu eqqakkat.

Nalunaarusiaq immini quppernerup matuma naqqani aaneqarsinnaavoq. Mappit ilaliussanik imallit marluk, kiisalu ingerlassat nalunaarsorlugit database pissarsiarineqarsinnaapput uunga saaffiginnilluni

Avatangiisinut Pinngortitamullu Pisortaqarfik
Att. Per Ravn Hermansen
Postboks 16 14
3900 Nuuk
Tlf: +299 34 67 11
e-mail:per@gh.gl

Suliffeqarfik Niras Greenland’ip massakkut killiffik 2 suliaraa. Siunertaa:

1. asimi qimaannakkat avatangiisinut tunngatillugit, kusanassutsimut tunngatillugit kulturikkullu pingaaruteqartut immikkoortiternissaannut najoqqutassanik siunnersuusiornissaq,

2. asimi eqqakkat qimaannakkat pilersitaannik ajornartorsiutinngortut aaqqinniarnissaannut periaasissat naleqquttut allaaserinissaat nalilersornissaallu, avatangiisit aningaasartuutissanullu tunngasut naatsorsuutigalugit.

3. 1 aamma 2 tunngavigalugit asimi eqqakkat passunnissaannut pilersaarummik (-rutinik) siunnersuuteqarnissaq, pilersaarusiap immikkoortuisa ataasiakkaat aningaasatigut kingunerisassaasa nalilersornissaat ilanngullugu,

4. suliap inernerisa naatsumik eqikkarniliornissaat.

Killiffik 2 2004-p naalernerani-2005-ip aallartilaarnerani naammassineqassasoq naatsorsuutigineqarpoq, tamannalu, killiffik 1-itulli, Miljøstyrelsen’imit aningaasalersugaavoq.