|
Nuup Kommunea 2003-mi Danmarkimi avatangiisinut pisortaqarfimmit Miljøstyrelse-mit aningaasaliiffigineqarpoq eqqagassat avatangiisinut navianartut immikkoortiterneqaqqaartalernissaannik misiliinissamut atugassaminik. Immikkoortitereqqaartarneq isumaqarpoq eqqagassaatilik (angerlarsimaffik imaluunniit suliffeqarfik) eqqagassanik avatangiisinut navianaatilinnik assigiinngitsunik nammineq immikkoortitereqqaartalissasoq immikkut aajortorneqartussanngorlugit. Eqqakkammi assigiinngitsut avatangiisinut qanittunut ungasissunulluunniit sunniuteqarsinnaaneri naapertorlugit immikkut passunneqartarnissaat pisariaqarpoq. Suliniutissap siunertaraa Nuummi eqqagassat immikkoortiteqqaarneqartalernissaannut periarfissanik ujartuinissaq kommunini allani ajornanngitsumik atorneqarsinnaasussanittaaq.
Nalunaarusiami Carl Bro as-ip kommunillu teknikkeqarfiata suleqatigiillutik suliarisimasaanni immikkoortitereriaatsit assigiinngitsut, aaqqissuussinerit aningaasartuutissartaat, inatsisit aningaasalersueriaatsillu sammineqarput. Aammattaaq immikkoortiterinermi ilisarnaasersuutit (piktogrammit) Nuup Kommuneata qinnuteqarneratigut KANUKOKA-p pisiarisimasaasa atorneqarnissaat kaammattuutigineqarpoq. Ilitsersuummi naatsumik sammineqarput immikkoortiterinermi aaqqissuussinerit assigiinngitsut qanoq pilersinneqartariaqarnersut ingerlanneqartariaqarnersullu, aaqqissuussinernik toqqaaniarnermi tunngavissaqarniassammat. Tassami immikkoortitereqqaarnermi periaatsit assigiinngitsut akuleriissinneqarsinnaasarput tapertariissillugit. Suliniutilli piviusunngortinneqarniarnerani ataasiinnarmik misiliisoqarniarpoq. Tassa viceværteqarnikkut aaqqissuussinissaq. Tamanna 2004-mi marsimi aallartippoq. Taamanikkussamut Nuup Kommunea immikkoortitigassanik tunniussisarfinnik marlunnik pilersitsisisimavoq illoqarfiup ilaani assigiinngitsuni. Najugaqartunut paasissutissat ugguuna aakkit Naliliineq – aaqqissuussineq 2004-2005-ip ingerlanerani naliliiffigineqassaaq. Miljøstyrelse naliliigallarnissamut inaarutaasumillu naliliinissamut aningaasatigut tapiissuteqassaaq. Naqqiut: Ilitsersuummi angerlarsimaffinni eqqagassat navianartut pillugit allassimasoqarpoq (qupp. 3-mi) ”batteriit immikkoortiterneqarsinnaasut avatangiisinut navianartunut avatangiisinullu naviananngitsunut”. KANUKOKA-p ajuusaarutigaa angerlarsimaffinni taamaaliortoqartarnissaata kaammattuutigineqarnera. Batteriikunik katersuiniarnermut tunngatillugu Avatangiisinut Pinngortitamullu Pisortaqarfik aammalu MOKANA I/S isumasioreerlugit aalajangerpugut innuttaasut namminneq batteriinik immikkoortiterisarnissaannut kajumissaarumanagit, Danmarkimi Europamilu nunani allani ilisimaneqarmat innuttaasut batteriit tamaasa avatangiisinut navianartutut tunniutiinnartaraat imaluunniit tamaasa igiinnartarlugit, tassa namminneerlutik immikkoortiterisinnaannginnamik taamaaliornissaminnulluunniit piffissaajarusunnginnamik. Taamaattumillu batteriinik katersueqqusaarinermi uteqattaarneqarpoq batteriit TAMAASA tunniunneqassasut. |
