|
Eqqagassat navianartut pinngorfiini immikkoortiterinermik Nuup Kommuneani siullermeertumik misiliineq aallartissaaq marsi 2004. Sumiiffinni misiliiffiusuni najugaqartunut paasissutissiissutissat maanna piareersimapput PDF-fiilitullu quppernerup matuma ataani aqqut atorlugu aaneqarsinnaallutik.
KANUKOKA Nuuk Kommune suleqatigalugu siullermeertumik misiliinermi paasissutissiissutit ineriartortinneqarneranni peqataasimavoq.
Paasissutissiissutit arlalinnut immikkoortitigaapput:
1. Quppersagaq, tassani innuttaasut eqqagassanit SUUT immik koortitissaneraat SUMULLU eqqakkat navianartut tunniutissaneraat erseqqissumik allaaserineqarlutik.
2. Borgmesterip quppersagaq toqqoqqullugu quppersakkamilu ilitsersuutit maleruaqqullugit innuttaasunut kaamattuilluni nammineq allagai. Tassani aamma pinngorfiini immikkoortiterisarnerup atulertinnissaa SOOQ kissaatigineqarnersoq tunngavilersuutigineqarpoq.
3 Puussiaq avatangiisinut illersuutaasoq, eqqagassanut na vianaatilinnut poorineqarsinnaasoq viceværtimullu tunniullugu. Puussiami navianaatilinnut ilisarnaatit naqin neqarsimapput, suullu navianaateqartut, eqqagassatut navianaatilittut passunneqartussat allattorsimallutik.
4. A3-plakaatit viceværtimut tunniussivissani nivinngagassat.
Paasissutissiissutit arlalinngorlugit immikkoortitersimavagut, makkua pissutigalugit:
- anguniarneqartut tamarmik atuffarissuusariaqanngimmata. Allakkat atuanngitsoorneqarsinnaapput quppersakkamilu paasissutissiissutit pisariaqartut kisiisa atuarlugit.
- atuarneq oqilisaaviginiarlugu ILISARNAATIT atorneqarput, eqqagassat sorliit pineqarnersut ersersinniarlugu. Ilisarnaatit tamakkua plakaatimi aamma atorneqarput. Ilisarnaatitut atorneqartut atuisumut ilisariuminartuunissaat pingaartuuvoq. Inuit nalinginnaasumik avatangiisit pillugit qanoq iliuuseqarusuttuupput, eqqagassalli qanoq iliuuseqarfiginissaasa sivisuuliuutiginissaat eqiagisarlugu.
- atuarneq oqilisaaviginiarlugu eqqagassanik tunniussivissaq takutinniarlugu nunap assinga ilaatinneqarpoq.
- kiisalu paasissutissat immikkoortitigaapput quppersagaq allagartaliivimmut køleskabimulluunniit nivinngarneqarsinnaasumik angissuseqartinniarlugu. Piffissap ingerlanerani inuit qanoq iliornissartik puigortarpaat. Taamaattumik borgmesterip allakkamini inuit kaammattorpai quppersagaq toqqoqqullugu. Nuna tamakkerlugu ingerlanneqartumik paasisitsiniaanermi kaammattuutiginiarparput kajungerisamik køleskabimut atorneqarsinnaasumik ilusiligaasumik quppersakkamut ilanngullugu tunniunneqartussamik sananeqassasoq.
Atortussanik naliliineq:
Massakkut nalilereersinnaalerparput atortussat pitsaanerulersinneqarsinnaasut kommuninit allanit atorneqalersigatik:
1. Navianaatilinnut ilisarnaatit puussiamiittut tunuliaqutai eqqortumik qalipaasserlugit naqinneqarsimasariaqaraluarput. Klorinip puuani ilisarnaat inuit puussiami ingerlaannaq ilisarisinnaasariaqarpaat.
2. Suut navianaateqartuunerannik allattukkat pisariaqanngitsumik amerlavallaaqaat. Paasissutissat taamak amerlatigisut atuarnermik sungiussisimanngitsut inuillu ulapittut paasissutissanik nalinginnaasunik atuarnissaannut akornusiinnarsinnaavaat.
Viceværtimik aaqqiineq:
Siullermeertumik Nuup kommuneani misiliineq viceværtimik aaqqiinermik tunngaveqarpoq, maanna illoqarfimmi sumiiffinni marlunni misiligarneqartumik. Misiliiviusup aappaa tassaavoq eqimattaasunik/pukkitsunik illunik sanaartorfiusimasoq, aappaali blokkeqarfiulluni pingasunik qulereeqarfiusoq. Sumiiffiit toqqarneqarneranni viceværteqarnera eqqarsaatigineqarsimavoq. Siullermeerutaasumik misiliinermi viceværtimik aaqqiinermik toqqaanermut tunngavilersuutit tassaasimapput:
“
-Viceværtimik aaqqiinermi eqqagassat assigiinngitsut toqqarneqartut tamarmik pineqarput. Tamatumani katersuivissatut atortussat assigiinngitsut misiligarneqarsinnaapput (boksit plasikkit eqqakkanut navianartunut, elektronikkimut atortunik eqqagassanut assigisaannullu saviminernik qassutaasanik sinaakkusikkanik katersuivissat) aammalu katersuinermi eqqakkanik passussinermi ataqatigiissaarineq.
-Aaqqissuussinermi viceværteqarneq tunngaviuvoq, viceværteqarfiusuni viceværti aallaaviusumik najugaqartunik igaffimmi eqqagassanik eqqagassat pinngorfiini immikkoortiterinermik ilitsersuussisussaalluni.
-Viceværtimik aaqqiinermi naleqquttumik atuisut attorneqarput, Kalaallit Nunaanni innuttaasut 30-40%-ii inissiani attartortittakkani viceværteqarfiusuni najugaqarmata.”
Carl Bro: “Nalunaarusiaq Avatangiisinut navianaatilinnik eqqagassat assigiinngitsut pinngorfiini immikkoortiterineq”, nov. 2003, qupp. 67.
Aamma takujuk pinngorfiusuni immikkoortiterinerit assigiinngitsut allaaserineqarnerat.
Viceværtinut ilitsersuut naammassingajalerpoq quppersakkamilu www.kanukoka.gl-imi piareerniariarpat takuneqarsinnaalissalluni.
| 
