Arsakut teqqalasut eqqakkanik ikuallaavinni sinikuusartut Kalaallit Nunaanni ullumikkut avatangiisinut tunngasumik ajornartorsiutaanerpaasutut nalilerneqarput.
Kommunit ilaasa massakkut arsakunik teqqalasunik passussisaasiata aatsitassat oqimaatsut avatangiisinut qaninnerusut kinnermikkut kuugunneqarsinnaanerat, taamalu avatangiisinut peqqinnissakkullu navianartorsiortitsisinnaanerat assut aarlerinarsisippaat.
Avatangiisinut Pinngortitamullu pisortaqarfiup (DMN) Sisimiut Kommuneata misiligutaasumik nassitsinera tapersersorpaa, tamatumani tunuliaqutaralugu nalunaarusiaq:"Mulige løsninger for håndtering af flyveaske og slagger i Grønland" Carl Bro A/S 2003 (Arsakut teqqalasut aamakullu Kalaallit Nunaanni passunneqarnerinut aaqqiissutaasinnaasut). Nalunaarusiamik suliarinnittut inerniliillutik ilaatigut oqaatigaat arsakut teqqalasut aamakullu Kalaallit Nunaanni ikuallaavinneersut aatsitassanik oqimaatsunik tungmetaller akulerujussuusut.
DMN’ip taamaattumik arsakut teqqalasut nunani allani uninngatitassanngorlugit nassiunneqartarnissaat aningaasatigut tamatumalu isumagineqarnissaatigut soqutiginaateqarnersoq misissortissallugu soqutiginartuutippaa. Periarfissaq alla tassaavoq arsakut teqqalasut Kalaallit Nunaanni avatangiisinut tunngatillugu isumannaatsumik uninngatinneqarsinnaanerat, taamaassappalli uninngatitsivinnik isumannaatsulianik pisariaqartitsisoqassaaq, taamaattullu nakkutigineqartuartussaapput aamma aatsitassat oqimaatsut killutik kuugunneqartut katersortariaqarlutik/suliarineqartariaqarlutik/tammartinneqartariaqarlutik.
KANUKOKA’p Mokanallu immikkut isumaqatigiissutaat, Kalaallit Nunaanni kommunit aamma Mokanap peqataanissamik isumaqatigiissutaannik, Mokanap eqqakkanik ajornartorsiutitalinnik suugaluartunilluunniit Kalaallit Nunaanni kommuninit tigooraasarnissaanik pisussaaffiliisumik tunngaveqartoq Sisimiut Kommuneta atorpaa. Mokanap arsakut teqqalasut ingerlatseqatigiiffik immikkoortortaaffigisani RenoNord aqqutigalugu Norgemi uninngatitsivimmut nunani tamalaani maleruagassat naapertorlugit isumannaallisakkamut ingerlatittarniarpai. Mokanap taama eqqakkanik navianartunik avammut nassiussinermut atasumik allaffissornikkut ingerlatsineq nalunaaruteqarnerlu Danmarkip Norgellu akornnanni pisussaq isumaginiarpaa.
DMN’ip taama misiliilluni nassiussineq 35.000 kr.-nik tapiifigaa, piumasaralugu taama misiliilluni nassitsinermi aningaasartuutit ingerlatsinermullu tunngasut Sisimiut Kommuneata misissorlugit nalunaarusiussagai. Taama nalunaarusiaq maani aaneqarsinnaavoq.
.
