Kommuneqarfimmi Upernavimmi eqqagassalerinikkut pitsanngorsaaniarnermi suliassat nukinginnartut amerlaqaat, aningaasallu atorneqarsinnaasut killeqarmata suliassat naammassineqarsinnaanngitsutut isikkoqarsinnaasarput.

Nunaqarfinnut tikeraaqattaarnermi erseqqissiartuinnarpoq siunissaq ungasinnerusoq eqqarsaatigalugu sinaakkutissiisoqartariaqartoq iliuuseriniakkat nutaat ataqatigiissumik nalilerneqarsinnaasaqqullugit.

Eqqakkat assigiinngitsut pitsaanerusumik passunneqartarnissaannut "periaasissarsiornerinnaq" naammannavianngilaq. Aammali eqqaavilerisut sulinerminni atugarisaat piaarnerpaamik pitsanngorsartariaqarput; soorlu atisalersortarfeqalersitsinikkut asattarfeqalersitsinikkullu.

Qamutinut motorilinnut eqqussisarfeqalernissaq aamma pisariaqarpoq, iluarsaassiviusinnaasunik iluamillu inissiiffiusinnaasunik. Kiisalu inissiisarfeqartariaqarpoq eqqaavinnut karsiusanut, puussianut eqqaavinnut il.il.

Tamakku aatsaat pisinnaapput nunaqarfinni tamani eqqagassanik tigooraavimmik illulioraanni.

Tigooraavik ungalulerlugu ikuallaavittalerlugu inissinneqartariaqarpoq najugaqarfiit asiarfiillu mianeralugit. Tigooraaviup saavani inissaqartariaqarpoq eqqakkat ikuallanneqarsinnaasut, ikuallanneqarsinnaanngitsut avatangiisinullu navianartut immikkoortiterneqaqqaartarfissaannik, illumilu qamutinut motorilinnut eqqussiveqartariaqarpoq, quiusaqarluni sulisunullu pikisarfeqarluni.